اسلام آباد(ویب ڈیسک) صدر مملکت ڈاکٹر عارف علوی نے کہا ہے کہ سی پیک کے تحت 20 منصوبے مکمل کیے جاچکے ہیں جن کے ثمرات سامنے
آناشروع ہوگئے ہیں۔ خطے پر سی پیک کے اثرات سے متعلق ویبنار سے ویڈیو لنک کے ذریعے خطاب کرتے ہوئے صدر نے کہاکہ سی پیک کے تحت ملتان سکھر موٹروے پر کام جاری ہے، پشاور سے کراچی ریلوے منصوبہ ایم ایل ون کا جلد سنگ بنیادرکھا جائے گا۔
چین کے تعاون سے دیامر بھاشا ڈیم پر بھی کام جاری ہے۔ صدر مملکت نے کہاکہ دیامیر بھاشا ڈیم کی تعمیر سے 16 ہزار ملازمتوں کے مواقع پیدا ہوں گے۔ سی پیک کی تکمیل سے ملک کے اندر بھی تجارت میں اضافہ ہوگا۔ انہوں نے کہاکہ کورونا وباء کی وجہ سے سیاحت کا شعبہ کافی متاثر ہواہے۔ کورونا سے نمٹنے کے معاملے پر چین نے ہرممکن تعاون فراہم کیا۔
چین کی طرف سے ڈاکٹرز کی ٹیم پاکستان آئی جنہوں نے کورونا سے نمٹنے میں رہنمائی کی۔ انہوں نے کہاکہ تعمیراتی شعبے میں سرگرمیوں سے غربت کے خاتمے میں مدد ملے گی۔ سی پیک صرف سڑکوں کی تعمیر کامنصوبہ نہیں بلکہ معیشت کے تمام شعبوں میں تعاون شامل ہے۔ انہوں نے کہاکہ پاکستان اور چین کے درمیان آئی ٹی کے شعبے میں تعاون بھی انتہائی اہمیت کا حامل ہے۔
صدر نے مزید کہاکہ سی پیک کی تکمیل سے ملک کے اندر بھی تجارت میں اضافہ ہوگا۔صدرنے کہاکہ سی پیک سے خطے میں امن ترقی اور خوشحالی کے نئے مواقع پیدا ہوں گے۔ انہوں نے کہاکہ بعض قوتیں بلوچستان میں مداخلت کرکے سی پیک کیخلاف سرگرم ہیں۔
چینی سفیر یا وجِنگ نے کہا کہ وہ وبا شروع ہونے کے بعد ہی سے دونوں ممالک کے مابین باہمی تعاون کا مشاہدہ کر رہے ہیں۔ چین کو جب کووڈ-19 بحران کا سامنا تھا تو فروری میں پاکستان نے نہ صرف چین کو مدد فراہم کی بلکہ صدر پاکستان عارف علوی نے دورہ چین کے ذریعے سے چین سے یکجہتی کا اظہار بھی کیا۔
