بیجنگ (ویب ڈیسک ) چین کے شمال مغربی صوبوں گانسو اورچنگ ہائی میں پیر اور منگل کی درمیانی رات 6.2 شدت کے زلزلے سے سینکڑوں افرادہلاک و
زخمی ہو گئے ۔
چینی خبررساں ادارے شنہوا نے زلزلے سے صوبہ گانسو میں اموات کی تعداد105 اور چنگ ہائی میں 11 جبکہ زخمیوں کی مجموعی تعداد 199 بتائی ہے، زلزلے سے ہزاروں مکانات اور دیگر عمارتوں کو نقصان پہنچا اور نقل و حمل، مواصلات، بجلی اور پانی کی فراہمی متاثر ہوئی۔
چائنا ارتھ کوئیک نیٹ ورکس سینٹر کے مطابق زلزلہ رات 11 بج کر 59 منٹ پر آیا،اس کا زلزلے کا مرکز چین کے گانسو اور چنگھائی کی سرحد کے قریب سطح زمین سے 10 کلو میٹر کی گہرائی میں تھا۔ زلزلے سے جیشان میں 6381 مکانات کو نقصان پہنچا ۔
صوبائی ایمرجنسی مینجمنٹ ڈیپارٹمنٹ کے ترجمان ہان شوجن نے کہا کہ صبح 8 بجے تک 32 آفٹر شاکس ریکارڈ کیے گئے ،جن میں سب سے زیادہ شدت 4.0 ریکارڈ کی گئی،زلزلے متاثرہ دیہی علاقوں میں سڑکیں متاثر ہوئیں اور کچھ علاقوں میں بجلی کی فراہمی اور ٹیلی مواصلات کا نظام معطل ہو گیا ۔
امدادی عملہ زلزلے سے تباہ شدہ انفراسٹرکچر کی مرمت کے لیے رات بھر سے کام کر رہا ہے، چین کے صدر شی جن پنگ نے زلزلے سے متاثرہ علاقوں میں فوری اور موثر امدادی کارروائیوں کی ہدایت کی ۔
