اسلام آباد (ویب ڈیسک) پاکستان کرکٹ بورڈ نے فاسٹ باولر عمر گل کے اعزاز میں تقریب کا اہتمام کیا۔
اس موقع پر چیئرمین پی سی بی احسان مانی نے فاسٹ باولر عمر گل کی خدمات کا اعتراف کرتے ہوئے انہیں اعزازی شیلڈ سے نوازا۔
تقریب کا اہتمام پاکستان اور بنگلہ دیش کے درمیان سیریز کے تیسرے اور آخری ٹی ٹونٹی میچ کے روز کیا گیا۔ عمر گل نے انگلینڈ میں کھیلے گئے آئی سی سی ٹی ٹونٹی ورلڈکپ 2009ءمیں نیوزی لینڈ کے خلاف 3 اوورز میں 6 رنز کے عوض 5 کھلاڑیوں کو پویلین کی راہ دکھائی تھی جو کہ اس وقت ایک عالمی ریکارڈ تھا۔
عمر گل نے ایونٹ میں سب سے زیادہ 13 وکٹیں حاصل کی تھیں۔ میگا ایونٹ کے فائنل میں پاکستان نے سری لنکا کو 8 وکٹوں سے شکست دی تھی۔ عمر گل کا یہ ورلڈریکارڈ اگست 2011ءمیں سری لنکا کے اجنتھا مینڈس نے اس وقت توڑا جب انہوں نے آسٹریلیا کے خلاف پالی کیلے میں 16 رنز کے عوض 6 وکٹیں حاصل کی تھیں۔
ٹی ٹونٹی کرکٹ میں فی الحال بہترین باولنگ کا ریکارڈ بھارت کے دیپک چہار کے پاس ہے۔ انہوں نے بنگلہ دیش کے خلاف نومبر 2019ءمیں 7 رنز دے کر 6 وکٹیں حاصل کر رکھی ہیں۔
فاسٹ باو¿لر عمر گل نے 2013ءمیں ایک بار پھر ٹی ٹونٹی کرکٹ کے ایک میچ میں 5 وکٹیں حاصل کی تھیں۔ انہوں نے سنچورین میں جنوبی افریقہ کے خلاف 6 رنز کے عوض 5 کھلاڑیوں کو پویلین کی راہ دکھائی تھی۔ عمر گل نے کہا کہ انہوں نے اپنے ٹی ٹونٹی انٹرنیشنل کرکٹ کیریئر میں پاکستان کےلئے زیادہ سے زیادہ کامیابیاں سمیٹنے کی کوشش کی۔ انہوں نے کہا کہ انہیں پاکستان کی نمائندگی کرنے پر فخر ہے۔
