دوحہ (ویب ڈیسک)کون بنے گا فٹ بال کا عالمی چیمپئن؟، فرانس اور ارجنٹائن کے درمیان بائیسویں فیفا ورلڈ کپ کا فائنل معرکہ 18 دسمبر کو ہوگا ۔ قطر میں

جاری 22 واں ورلڈ کپ فٹ بال ٹورنامنٹ اپنے اختتامی مرحلے میں داخل ہوچکا ہے ۔
فٹ بال ورلڈ کے قطر میں سجے عالمی میلے میں شائقین فٹ بال کو انتہائی دلچسپ اور کانٹے دار مقابلے دیکھنے کو مل رہے ہیں۔ دفاعی چیمپئن فرانس اور دوبار کی سابق عالمی چیمپئن ارجنٹائن کی ٹیمیں میگا ایونٹ کے فائنل میں پہنچ چکی ہیں جن کے درمیان فائنل معرکہ 18 دسمبر کو لوسیل آئیکونک اسٹیڈیم، لوسیل میں ہوگاجو پاکستان کے معیاری وقت کے مطابق رات 8 بجے شروع ہوگا۔
اس سے قبل ارجنٹائن کی ٹیم نے میگا ایونٹ کے پہلے سیمی فائنل میچ میں کروشیا کو باآسانی 0-3 گول سے ہرا کر فائنل کیلئے کوالیفائی کیا تھا جبکہ دوسرے سیمی فائنل میچ میں دفاعی چیمپئن فرانس نے مراکش کو 0-2 گول سے ہرا کر فائنل کے لئے کوالیفائی کیا تھا۔ ارجنٹائن اور فرانس کی ٹیمیں اس سے قبل دو ،دو مرتبہ عالمی چیمپئن رہ چکی ہیں ۔
ارجنٹائن کی ٹیم اس سے قبل دو مرتبہ 1978 اور 1986 میں عالمی کپ جیت چکی ہے ،جبکہ وہ 1930،1990، اور 2014 میں رنر اپ رہ چکی ہے۔دفاعی چیمپئن فرانس کی ٹیم 1998 میں پہلی جبکہ 2018 میں دوسری مرتبہ ورلڈ چیمپئن بنی تھی۔ فرانس کی ٹیم 2006 کے عالمی کپ میں رنر اپ رہی ہیں۔ میگا ایونٹ میں تیسری پوزیشن کے لئے میچ کل ہفتہ کو کھیلا جائے گا جس میں مراکش اور کروشیا کی ٹیمیں آمنے سامنے ہوں گی۔