
سرینگر(ویب ڈیسک )مقبوضہ کشمیر میں کل جماعتی حریت کانفرنس کے چےئرمین سید علی
گیلانی نے 27اکتوبر کو کشمیر کی تاریخ کا سیاہ دن قرار دیتے ہوئے کشمیریوں کی اپنے ناقابل تنسیخ حق،حق خود ارادیت کے حصول کی جدوجہد کواسکے منطقی انجام تک جاری رکھنے کے عزم کا اعادہ کیا ہے۔
کشمیر میڈےا سروس کے مطابق سید علی گیلانی کے ترجمان سید عبداللہ گیلانی کی طرف سے اسلام آباد میں جاری ایک بیان میں کہا گیا ہے کہ حریت چیئرمین نے 27اکتوبر کو کشمیر کی تاریخ کا سیاہ دترین دن قرار دیا ہے جس دن 1947 ءمیں بھارت نے تقسیم ہند کے اصولوں اور کشمیریوںکی خواہشات کی کھلی خلاف ورزی کرتے ہوئے اپنی فوجیں سرینگر میں اتاری تھیں۔
انہوں نے کہا کہ 72برس قبل کیاگیا بھارت کا یہ اقدام غیر اخلاقی، غیر آئینی اور جمہوری اقدار کی خلاف ورزی تھا اور اس دن بھارت نے غیر قانونی طور پر کشمیریوں کو ان کی آزادی اور بنیادی حقوق سے محروم کردیاتھا ۔
انہوں نے کہا کہ ظالم بھارتی فوجی نہتے کشمیریوں کو بہیمانہ اور منظم طور پر قتل ،جبری طورپر گرفتار، ظلم و تشدد اور دیگر ظالمانہ اور غیر انسانی ہتھکنڈوں کا نشانہ بنارہے ہیں تاکہ جموںو کشمیر پر وہ اپنا غیر قانونی تسلط برقرار رکھ سکیں۔
سید علی گیلانی نے کہا کہ تاریخ شاہد ہے کہ کسی بھی قوم کو طویل عرصے تک ان ظالمانہ ہتھکنڈوں کے ذریعے محکوم نہیں رکھا جاسکاہے اور کشمیری عوام کسی بھی صورت میں بھارت کے غیر قانونی تسلط کو ہرگز قبول نہیں کریںگے۔




































