رسالپور : پی اے ایف اکیڈمی رسالپور میں پاسنگ آؤٹ پریڈ سے خطاب کرتے ہوئے ائیر چیف مارشل ظہیر احمد بابر سدھو نے کہا
کہ آپریشن بنیانِ مرصوص میں پاکستان ائیر فورس نے دشمن کو واضح اور تاریخی شکست دی۔ انہوں نے بتایا کہ 10 مئی کو دشمن کے جدید ایئر ڈیفنس سسٹم کو نہایت مؤثر انداز میں نشانہ بنایا گیا، جو پاک فضائیہ کی پیشہ ورانہ برتری اور وہ صلاحیت ظاہر کرتا ہے جس پر پوری قوم کو فخر ہے۔ ائیر چیف کے مطابق 6 اور 7 مئی کی رات جب پاکستان کی خودمختاری کو چیلنج کرنے کی کوشش کی گئی تو پاک فضائیہ نے بھرپور اور فیصلہ کن ردِعمل دیا اور رافیل سمیت دشمن کے جدید ترین لڑاکا طیاروں کو ناکام بنایا۔
انہوں نے یہ بھی کہا کہ دفاعِ وطن صرف فضائی آپریشن تک محدود نہیں تھا بلکہ سائبر وارفیئر میں بھی پاکستان نے اپنی برتری ثابت کی اور دشمن کی ہر نقل و حرکت کو لمحہ بہ لمحہ مانیٹر کیا۔ ائیر چیف مارشل ظہیر احمد بابر سدھو نے فخر سے کہا کہ رافیل جیسے جدید طیاروں کی صلاحیت پاکستان ائیر فورس کی مہارت کے سامنے صفر ثابت ہوئی، اور تمام کارروائیاں نہایت حساب شدہ، منظم اور پیشہ ورانہ انداز میں سرانجام دی گئیں۔
اپنے خطاب میں انہوں نے یہ بھی واضح کیا کہ پاکستان کی سالمیت اور خودمختاری پر کبھی سمجھوتہ نہیں کیا جائے گا۔ پاک فضائیہ کا ہر جوان اور افسر ملک کی حفاظت کے لیے ہر وقت تیار ہے۔ انہوں نے آرمی چیف جنرل سید عاصم منیر کا ذکر کرتے ہوئے کہا کہ انہوں نے اس معرکۂ حق میں نہایت مضبوط اور قائدانہ کردار ادا کیا، جس نے تمام افواج کو یکسوئی اور اعتماد کے ساتھ میدانِ عمل میں ثابت قدم رکھا۔
ائیر چیف نے کہا کہ پاکستان ایک امن پسند ملک ہے، مگر اگر کسی نے ہماری امن کی خواہش کو کمزوری سمجھ کر کوئی قدم اٹھایا تو اسے سخت اور مؤثر جواب دیا جائے گا۔ انہوں نے اس بات پر بھی زور دیا کہ پاک فضائیہ کی کامیابیاں نہ صرف قوم کے اعتماد کا باعث ہیں بلکہ بین الاقوامی سطح پر بھی اس کی کارکردگی کو سراہا جا رہا ہے۔ ان کے مطابق قوم کا اعتماد، افواجِ پاکستان کی اصل قوت ہے اور یہی وہ جذبہ ہے جو ملک کے دفاع کو ہر چیلنج کے مقابل مضبوط اور ناقابلِ تسخیر بناتا ہے۔
