اسلام آباد :قازقستان کےصدر قاسم جومارت توقایف وزیراعظم شہبازشریف کی دعوت پر دو روزہ سرکاری دورے پر آج پاکستان پہنچ
گئے۔ نور خان ایئربیس پر صدر مملکت آصف علی زرداری اور وزیراعظم میاں محمد شہباز شریف نے معزز مہمان کا پرتپاک استقبال کیا۔ اس موقع پر قازقستان کے صدر کے ہمراہ سینئر وزراء اور اعلیٰ سرکاری حکام پر مشتمل وفد بھی پاکستان آیا۔
سرکاری ذرائع کے مطابق دورے کے دوران صدر قاسم جومارت توقایف کی صدر مملکت آصف علی زرداری اور وزیراعظم شہباز شریف سے اہم ملاقاتیں ہوں گی، جن میں دوطرفہ تعلقات، علاقائی صورتحال اور باہمی تعاون کے فروغ پر تفصیلی تبادلہ خیال کیا جائے گا۔
اس موقع پر مختلف شعبوں میں تعاون کو وسعت دینے کیلئے متعدد مفاہمتی یادداشتوں اور معاہدوں پر دستخط کیے جانے کا امکان ہے۔ قازقستانی صدر کا یہ دورہ خطے میں امن، استحکام اور مشترکہ ترقی کے لیے دونوں ممالک کے عزم کی عکاسی کرتا ہے۔
پاکستان اور قازقستان کے درمیان تعلقات کو نئی جہت دینے کیلئے تجارت، سرمایہ کاری، لاجسٹکس اور علاقائی روابط کے شعبوں کو خصوصی اہمیت دی جا رہی ہے۔ دورے کے دوران صدر قاسم جومارت توقایف پاکستان قازقستان بزنس فورم سے بھی خطاب کریں گے، جہاں دونوں ممالک کے تاجر اور سرمایہ کار کاروباری مواقع پر تبادلہ خیال کریں گے۔
ترجمان دفتر خارجہ کے مطابق یہ دورہ دوطرفہ تعلقات کے جامع جائزے، اقتصادی تعاون کے فروغ اور عوامی روابط کو مضبوط بنانے کے نئے امکانات تلاش کرنے میں اہم کردار ادا کرے گا۔
