
کشف زہرا
پچھلے ہفتے میرا موڈ بہت خراب تھا۔ نوکری کی ٹینشن، بل کے میسج اور اوپر سے 8 گھنٹے کی لوڈشیڈنگ۔ رات کو لیٹی ہوئی سوچ رہی تھی کہ زندگی میں خوشی ہے ہی نہیں۔
صبح اٹھی تو امی نے چائے کا کپ میرے پاس رکھ دیا۔ میں نے ویسے ہی پہلا گھونٹ لیا۔ گرم چائے، ہلکی سی مٹھاس اور کھڑکی سے آتی دھوپ۔ بس۔ ایک منٹ کے لیے ساری ٹینشن رک گئی۔ میں نے سوچا یار یہ 10 روپے والی پتی میں اتنا سکون کہاں سے آ گیا؟
ناشتے میں پراٹھے کے ساتھ امی کا بنایا ہوا آم کا اچار ملا۔ کھٹا میٹھا۔ ایک نوالہ کھایا اور بچپن یاد آ گیا۔ یہ بھی تو خوشی تھی۔
شام کو باہر نکلی تو ہلکی بارش ہو رہی تھی۔ میں نے جان بوجھ کر چھتری نہیں لی۔ بھیگتے ہوئے گھر آئی اور کھڑکی کھول کر بیٹھ گئی۔ مٹی کی خوشبو آ رہی تھی۔ موبائل پر 20 میسج پڑے تھےلیکن اس وقت مجھے صرف وہ خوشبو یاد تھی۔ پیسے سے یہ نہیں ملتی نا؟
اسی دوران پرانی دوست کا میسج آیا "کیا کر رہی ہو؟ بہت دن ہو گئے"۔ بس 2 لائن کی بات تھی لیکن دل خوش ہو گیا۔رات کو پھر لائٹ چلی گئی۔ گرمی، پسینہ، چڑچڑا پن، 2 بجے اچانک لائٹ آئی تو پنکھے کی ہوا چہرے پر لگی۔ میں ہنس پڑی۔اکیلی کمرے میں بیٹھ کر ہنس رہی تھی کیونکہ یہ خوشی صرف وہی سمجھ سکتا ہے جس نے گرمی میں رات گزاری ہو۔رات کو سونے سے پہلے کتاب کا آخری صفحہ ختم کیا۔ کتاب بند کی تو ایسا لگا جیسے کوئی کام مکمل کر لیا، چھوٹی سی جیت تھی لیکن اپنی تھی۔
اس دن مجھے سمجھ آیا۔ ہم ساری زندگی بڑی خوشی کا انتظار کرتے ہیں۔ "جب نوکری لگے گی تو خوش ہوں گی، جب گھر بنے گا تو خوش ہوں گی اور بیچ میں جو چھوٹی خوشیاں روز آ کر دستک دیتی ہیں انہیں ہم اگنور کر دیتے ہیں۔
امی کا گرم کھانا، بہن کا میسج، اچار والا پراٹھا، بارش کی خوشبو، لائٹ کا آنا، کتاب کا آخری صفحہ، فون کا 100 چارج ہو جانا، بلی کا پاس آ کر بیٹھ جانا۔ یہ سب چھوٹا ہےلیکن یہی تو زندگی ہے۔اس رات میں نے ڈائری میں لکھا: "آج کی 5 چھوٹی خوشیاں: چائے، اچار، بارش، دوست کا میسج، لائٹ اور یقین مانو اس کے بعد سے موڈ کافی بہتر رہتا ہےتو آپ بھی آج ٹرائی کرنا۔ دن میں 3 چھوٹی خوشیاں ڈھونڈنا۔ بڑی خوشی کا انتظار کرتے زندگی نہ گزر جائے۔کیونکہ خوشی مہنگی نہیں ہوتی۔ خوشی فری ہوتی ہے۔ بس نظر چاہیے اسے دیکھنے کی ۔




































