
کشف زہرا
مہنگی کافی شاپ نہیں چاہیے، نہ ہی 5 اسٹار ریسٹورنٹ۔ زندگی جینے کے لیے بس 4 پرانے دوست چاہئیں ، پلاسٹک کی 4 کرسیاں اور ایک کیتلی چائے۔ بس
پھر دیکھو دنیا جہان کی سارا ٹینشن کیسے خود بخود ہوتی ہے ۔پلان ہمیشہ ایک ہی طرح بنتا ہے، گروپ میں کوئی ایک میسج کرتا ہے "یار کل ملتے ہیں؟" اور دوسرے فوراً جواب دیتے ہیں "ہاں یار بہت دن ہو گئے"۔
وقت فکس ہوتا ہے شام 5 بجے کا لیکن حقیقت میں سب 7 بجے پہنچتے ہیں۔ یہی تو دوستی ہے۔شروع کے دس منٹ تو بس حال چال میں نکل جاتے ہیں۔ "کیسا ہے؟ فیملی کیسی ہے؟ نوکری کیسی چل رہی؟" اس کے بعد شروع ہوتی ہے، اصل گپ شپ۔ سیاست سے بات نکلتی ہے کرکٹ پر، کرکٹ سے فلموں پر، فلموں سے ایکس پر، اور پھر شادی اور مہنگائی پر آ کر ختم ہوتی ہے۔
تین گھنٹے گزر جاتے ہیں اور کوئی ایک مسئلہ بھی حل نہیں ہوتا لیکن دل اتنا ہلکا ہو جاتا ہے جیسے 10 کلو کا بوجھ دل ودماغ سے اتر گیا ہو۔دوستوں کی بیٹھک کے اپنے ہی قانون ہوتے ہیں۔ پہلا یہ کہ موضوع کبھی فکس نہیں ہوتا۔ بات شروع ہوتی ہے موسم سے اور پہنچ جاتی ہے 2016 کی یونی کی یادوں پر۔
دوسرا قانون چائے کا ہے۔ ایک کپ منگواتے ہیں اور ریفل چار بار کرواتے ہیں۔ "بھائی ایک اور بنا دو" کہتے ہوئے جو اپنائیت ہوتی ہے نا وہی اصل محبت ہےاور تیسرا قانون ٹائم کا ہے۔ آتے ہیں ایک گھنٹے کے لیے اور گھر سے تین بار فون آ جاتا ہے "کہاں ہو؟"سب سے بڑا جھوٹ ہم یہی بولتے ہیں کہ "بس تیس منٹ بیٹھتے ہیں" اور گھڑی تین گھنٹے بعد بتاتی ہے کہ "اوہو اتنی دیر ہو گئی" لیکن سب سے سچی بات یہ ہے کہ مہنگی گاڑی میں اکیلے بیٹھنے سے بہتر ہے پرانی موٹر سائیکل پر دو دوستوں کے ساتھ چائے پینا۔
گھر آ کر امی ضرور پوچھتی ہیں "بیٹی اتنی دیر دوستوں کے ساتھ؟" تو میں ہنس کر کہتی ہوں "امی چارج ہو کر آئی ہوں، اب پورا ہفتہ نکال لوں گی"اور سچ میں ایسا ہی ہوتا ہے۔ حساب لگاؤ تو مہنگی کافی 800 روپے کی پڑتی ہے اور سکون ملتا ہے صرف 30 منٹ کاجبکہ سستی چائے 50 روپے میں مل جاتی ہے اور ساتھ میں ملتا ہے 3 گھنٹے کا سکون اور 100 یادیں۔
آخر میں بس یہی کہوں گی کہ زندگی میں بڑے بڑے خواب پورے نہ بھی ہوں تو کوئی بات نہیں، اگر 2-4 ایسے دوست ہوں جن کے ساتھ بیٹھ کر دل کھول کر ہنس سکو تو سمجھو تم دنیا کے سب سے امیر انسان ہو۔ پیسہ آتا جاتا رہے گا لیکن یہ بیٹھکیں، یہ باتیں، یہ قہقہے۔۔۔۔ یہی اصل بینک بیلنس ہے۔




































