
کشف زہرا
شام کے سات بجے تھے۔
سارہ آفس سے نکلی تو اس کا دماغ پھٹ رہا تھا۔ پورا دن لیپ ٹاپ، باس کی ڈانٹ، اور ٹریفک۔ وہ بالکل نچڑ چکی تھی۔گھر آ کر اس نے بیگ پھینکا،
جوتے بھی نہیں اتارے، بس کھڑکی کے پاس بیٹھ گئی۔باہر بادل گرج رہے تھے،پھر بارش شروع ہو گئی۔ کراچی کی پہلی والی تیز بارش۔کھڑکی کھلی تھی، ٹھنڈی ہوا اندر آئی اور اس ہوا کے ساتھ وہی خوشبو... مٹی کی، گیلی سڑک کی۔
سارہ نے آنکھیں بند کر لیں اور لمبی سانس لی۔پتا نہیں اس خوشبو میں کیا تھا، اس کی سارے دن کی تھکن جیسے دھل گئی۔ سر کا درد، دل کا بوجھ، سب ہلکا۔اسی لمحے ہوا سے اس کی الماری پر رکھی ایک پرانی کتاب نیچے گر گئی۔کتاب کھلی تو اس میں سے ایک پیلا سا لفافہ نکلا۔سارہ نے اٹھایا۔ اوپر لکھا تھا، "میری سب سے تھکی ہوئی دوست کے لیےیہ اس کی بچپن کی دوست زینب کا لکھا ہوا تھا، جو اب کینیڈا میں ہوتی ہے۔ یہ خط اس نے 12ویں کلاس میں دیا تھا، جب سارہ بورڈ کے پریشر سے تھک جاتی تھی۔
سارہ نے خط کھولا
لکھا تھا
"سارہ
مجھے پتاہے تم جب یہ خط کھولو گی تو بہت تھکی ہوئی ہو گی۔ تم ہمیشہ تھک جاتی ہو، ہر چیز کو دل پر لے لیتی ہو۔تو میری بات یاد رکھنا،تھکن دو طرح کی ہوتی ہے، ایک جسم کی، جو سونے سے اتر جاتی ہے اور ایک دل کی، جو صرف بارش سے اترتی ہے۔جب بھی بہت تھک جاؤ تو کسی سے بات مت کرنا، بس بارش کا انتظار کرنا۔
کھڑکی کھولنا، آنکھیں بند کرنا ، اس خوشبو کو اندر جانے دینااور یاد رکھنا، تم اکیلی نہیں ہو۔ تمہاری یہ دوست چاہے کتنی بھی دور ہو، ہر بارش میں تمہارے ساتھ ہے۔تمہاری تھکی ہوئی دوست کی تھکی ہوئی دوست زینب سارہ کی آنکھوں میں آنسو آ گئے لیکن وہ تھکن والے نہیں تھے۔وہ مسکرا دی۔ اس نے موبائل سائیڈ پر رکھا، چائے بنائی اور کھڑکی کے پاس بیٹھ کر بارش دیکھنے لگی۔
باہر بارش ہو رہی تھی، اندر اس کی تھکن اتر رہی تھی۔
کبھی کبھی ہمیں کسی دوا کی ضرورت نہیں ہوتی، بس ایک بارش کی، ایک خوشبو کی، اور ایک پرانے خط کی ضرورت ہوتی ہے جو یاد دلائے کہ کوئی ہمیں آج بھی یاد کرتا ہے۔




































