
کشف زہرا
ہمارے معاشرے کا سب سے بڑا مسئلہ یہ ہے کہ ہم اپنی زندگی سے زیادہ دوسروں کی زندگی میں دلچسپی رکھتے ہیں۔ ہمیں یہ فکر نہیں ہوتی کہ ہمارا اپنا گھر
کیسا چل رہا ہے، ہمیں فکر ہوتی ہے کہ پڑوسی کا گھر کیسے چل رہا ہے۔ کسی کی شادی کیوں نہیں ہوئی۔ کسی کے بچے کیوں نہیں ہوئے۔ کسی نے نوکری کیوں چھوڑ دی۔ کسی نے یہ کپڑے کیوں پہنے۔ یہ سوال ہمارے ہاں ہر محفل کی زینت بن چکے ہیں۔ ہم دوسروں کی زندگی میں مداخلت کو خیر خواہی کا نام دے دیتے ہیں حالانکہ یہ خیر خواہی نہیں، صرف اور صرف بے جا مداخلت ہے۔
اس مداخلت کی سب سے بڑی وجہ فارغ وقت اور چھوٹی سوچ ہے۔ جب انسان کے پاس اپنا کوئی مقصد نہیں ہوتا، اپنی زندگی میں کوئی مصروفیت نہیں ہوتی تو وہ دوسروں کی زندگیوں میں جھانکنے کو اپنا مشغلہ بنا لیتا ہے۔ وہ ایک جگہ سے بات سن کر دوسری جگہ پہنچاتا ہے۔ اس میں مرچ مصالحہ لگاتا ہے اور یوں ایک چھوٹی سی بات کو ایک بڑا فساد بنا دیتا ہے۔ خاص طور پر ہماری خواتین کی محفلوں میں یہ بہت عام ہے جہاں بیٹھ کر دوسروں کی بیٹیوں، بہوؤں اور ان کے گھروں پر تبصرے کیے جاتے ہیں۔ ہمیں احساس ہی نہیں ہوتا کہ ہمارے یہ تبصرے کسی کا دل کتنا دکھا سکتے ہیں۔
دوسروں کی زندگی میں مداخلت کا سب سے زیادہ نقصان اس انسان کو ہوتا ہے جس کی زندگی میں مداخلت کی جا رہی ہو۔ کتنی ہی لڑکیاں ہیں جو صرف لوگوں کے سوالوں کی وجہ سے ڈپریشن میں چلی جاتی ہیں۔ "تمہاری شادی کب ہوگی؟" "تم موٹی کیوں ہو گئی ہو؟" "تمہارے نمبر کم کیوں آئے؟" یہ چھوٹے چھوٹے جملے سننے میں عام لگتے ہیں لیکن جس پر گزر رہی ہوتی ہے، اس کے دل پر خنجر کی طرح لگتے ہیں۔ کتنے رشتے صرف اس وجہ سے ٹوٹ جاتے ہیں کہ لوگوں نے کان بھر دیے۔کتنے گھر صرف اس وجہ سے اجڑ جاتے ہیں کہ باہر والوں نے اندر کی باتوں میں مداخلت کر دی۔
یاد رکھیں! ہر انسان کی زندگی اس کا اپنا امتحان ہے۔ ہر کسی کا وقت الگ ہے۔ہر کسی کی آزمائش الگ ہے۔ اگر آپ کسی کی مدد نہیں کر سکتے تو کم از کم اس کے لیے آسانیاں تو پیدا کریں۔ اس کی زندگی میں سوال بننے کے بجائےاس کے لیے دعا بنیں۔ اپنے کام سے کام رکھنا کوئی بری بات نہیں بلکہ یہ ایک بہترین تربیت کی نشانی ہے۔
آئیں آج سے یہ عہد کریں کہ ہم کسی کی زندگی میں مداخلت نہیں کریں گے۔ ہرکسی کو اس کی مرضی سے جینے دیں گے۔ اگر بولنا ہے تو اچھا بولیں گے۔ ورنہ خاموش رہیں گے کیونکہ خاموشی بھی کبھی کبھی بہت بڑی نیکی بن جاتی ہے۔




































