
عصمت اسامہ /لاہور
مقابلہ افسانہ نگاری ( دوم پوزیشن )
صبح کا وقت تھا۔سورج ابھی تک طلوع نہیں ہوا تھا۔سرد ہواکےجھونکوں کے ساتھ درختوں سے پتےگررہے تھے۔ ہاسپٹل کےاحاطے میں قدم رکھتے ہی
ہینڈ بیگ سے پرفیوم اسپرے کرکے میں او پی ڈی میں داخل ہوگئی۔ بیگ ٹیبل پر رکھا اور کرسی پر بیٹھ گئی۔کچھ موبائل پیغامات دیکھے پھر مریض آنا شروع ہوگئے۔ ایک خاتون ننھی سی بچی کو گود میں اٹھائے داخل ہوئی،غالبا" ایک ڈیڑھ سال کی ہوگی۔ بڑی بڑی آنکھیں ،گورا رنگ اور براو¿ن بال۔سرخ سویٹر پہنے ہوئے۔ یوں لگتا تھا کہ کوہ قاف سے کوئی پری اتر آئی ہے۔
کیا نام ہے اس کا ؟ میں نے پوچھا۔
" خوب صورت" اس کی ماں نے جواب دیا۔
" یہ کیا نام ہوا ؟" میں نے مسکراتے ہوئے سوال کیا۔
" اس کے سوا کوئی دوسرا نام مجھے جچا ہی نہیں" بچی کی ماں نےجواب دیا۔
بچی کو بخار تھا ،میں نے ٹمپریچر چیک کرکے سیرپ لکھ دیا۔
وہ جانے لگی تو میں نے آواز دی ،وہ رک گئی۔
"سنو ، اپنی بچی کا روزانہ صدقہ دیا کرو"
" ڈاکٹر صاحبہ، روزانہ صدقہ ؟ میں دم کردوں گی".وہ چلی گئی۔
اس کے جانے کے بعد مریضوں کا رش ہوگیا - چند دن بعد میں اس بچی کوبھول چکی تھی کہ ایک دن وہ خاتون اپنی بچی کولے کردوبارہ ہاسپٹل آئی۔
"ڈاکٹر میری بچی کو پہلے دیکھیں،اسے کچھ ہوگیا ہے!" وہ چیخ رہی تھی۔
" بی بی پ±رسکون ہوجاو¿، بچی کو یہاں لٹاؤ،میں نے اسٹریچر کی طرف اشارہ کیا اور اسٹیھسکوپ دراز سے نکالا۔
میری ہمسائی اسے اپنے گھر لے گئی تھی .وہاں سے آئی ہے تو ایک دم بے ہوش ہوگئی" اس نے آنسو پونچھتے ہوئے کہا۔
میں نے بچی کے کچھ ارجنٹ ٹیسٹ کروا? تو معلوم ہوا کہ اسے زہر دیا گیا ہے۔میں نے اس کی ماں کو تنبیہہ کی کہ آئندہ اپنی بچی کسی کو نہیں پکڑانی۔بچی کو ہاسپٹل میں داخل کرکے دن رات ایک کردئیے۔ کچھ روز بعد وہ ٹھیک ہوگئی اور اس کی ماں مجھے دعائیں دیتے ہوئے چلی گئی۔
مجھے ایک میڈیکل کورس کے لئے بیرون ملک جانا تھا،وقت کے گزرنے کا پتہ نہیں چلا۔ تین سال بعد میں وطن واپس لوٹی تو وہی ہاسپٹل میرا منتظر تھا۔ڈیوٹی ختم ہونے کے بعد میں نے اپنی گاڑی نکالی اور گھر کوروانہ ہوگئی۔راستے میں ایک جگہ سڑک پر مجمع اکٹھا تھا۔ کچھ آدمیوں کے لڑنے جھگڑنے کی آوازیں آرہی تھیں۔پہلے تو سوچا کہ چپ چاپ گزر جاوں ،پھر خیال آیا کہ کسی کو طبی امداد کی ضرورت نہ ہو تو گاڑی روک دی۔
" تیرے گھر میں ماں بہن نہیں ہیں کیا؟ " ایک آدمی نے دوسرے کا گریبان پکڑ رکھا تھا۔دوسرا اسے مکے مار رہا تھا۔
"کیا ماجرا ہے؟" میں نے ایک راہ گیر سےپوچھا۔
" کم بخت رکشے والے نے چھوٹی سی بچی کو آگے اپنےساتھ بٹھایا ہوا تھا جب کہ پیچھے رکشہ خالی ہے" اس نے جواب دیا۔
" اوہ ،بچی کہاں ہے؟"میں نے پوچھا تو اس نے ایک طرف کھڑے رکشے کی طرف اشارہ کیا۔
میں بھیڑ میں سےراستہ بنا کے رکشے تک پہنچی تو اسکول یونیفارم میں ایک چار سالہ ننھی بچی خوف زدہ سی بیٹھی ہوئی تھی۔اس کا رنگ زرد تھا اور گھبرائی ہوئی تھی۔ میں اس کے قریب گئی تو ایک دم جھٹکا سا لگا۔گورا رنگ اور براؤن بال۔ صورت جانی پہچانی سی تھی۔
" بیٹا تمہارا نام کیا ہے؟" میں نے پوچھا۔
" خوب صورت!" اس نےکانپتی ہوئی آواز میں کہا۔
" بچے،کیا تم بتا سکتی ہوکہ تمہارا گھر کہاں ہے ؟" وہ میرے ساتھ لپٹ گئ۔
" بتاو¿ شاباش ، گھر کہاں ہے ؟" میں نے دوبارہ پوچھا۔
"اس اگلی سڑک سے دائیں مڑ کے"۔وہ بمشکل بولی۔
میں اس بچی کے ساتھ بھیڑ کی طرف گئی،وہاں اپنا تعارف کروایا کہ میں فلاں ہاسپٹل میں ڈاکٹرہوں اوراس بچی کو اس کے گھر چھوڑنے جارہی ہوں ،یہ میرا کارڈ ہے"۔ ایک شخص نے میرا کارڈ پکڑ لیا اور کچھ لمحوں کے لئے خاموشی چھا گئی۔لوگوں کے چہروں پر اطمینان کی جھلک محسوس ہوئی تو میں بچی کو اپنی گاڑی میں اس کے گھر تک لے گئی۔اس کی والدہ کو سارا ماجرا سنایا وہ پہلے تو پریشان ہوکے رونے لگی ،پھر کھانا کھلانے پر اصرار کرنے لگی۔مجھے دیر ہورہی تھی، معذرت کرکے اٹھ کھڑی ہوئی اور سختی سےتاکید کی کہ اتنی چھوٹی بچی کو اجنبی رکشہ ڈرائیور کے ساتھ بھیجنے کی بجائے گھر میں خود پڑھاؤ یا اپنی گلی کے کسی ٹیوشن سنٹر ڈال دو مگر اتنی دور کے اسکول مت بھیجو" اور گاڑی سٹارٹ کرکے روانہ ہوگئی۔
ڈاکٹرز کی زندگی مسلسل جدوجہد میں گذرتی ہے ، وقت کےساتھ مزید تعلیم حاصل کرتے اور جاب کرتے بال سفید ہوجاتے ہیں۔ انھی دنوں میرے بھائی اور بھابھی نے عمرے کا پروگرام بنایا، مجھے بھی ساتھ چلنے کو کہا لہذا میں عمرے پرچلی گئی۔حیرت انگیز طور پر وہاں وہ ننھی بچی مجھے بار بار یاد آتی رہی۔نجانے کتنی بار میں نے خانہئ کعبہ کے سامنے ہاتھ اٹھا کے اس کے لئے دعا کی ہوگی! یا رب العالمین ،سب بہنوں بیٹیوں کی آبرو کی حفاظت فرما،انھیں ہر شر سے محفوظ فرما۔آنسو تھے کہ ٹپکتے چلے آتے تھے۔ بھابھی حیران ہورہی تھیں کہ میری اپنی تو کوئی بیٹی نہیں مگر دعائیں کس کے لئے مانگ رہی ہوں؟ انھیں کیا پتہ کہ بیٹیاں تو سانجھی ہوتی ہیں!
عمرے سے واپسی ہوئی تو میں اپنا کلینک سیٹ کرنے میں مصروف ہوگئی۔ یہ کلینک میرے علاقے میں تھا اور میں اس میں تمام جدید مشینری ،آلات اور لیب کا اہتمام کرنا چاہتی تھی۔ شوہر صاحب کے ساتھ بھائی صاحب بھی میرے اس جنون کی تکمیل میں دست و بازو بنے رہے۔اگلے چند سالوں میں میرا کلینک شہر کا مقبول ترین کلینک بن چکا تھا کیوں کہ میرا مقصد غریب اور نادار طبقے کی مسیحائی تھا۔میرے دامن کو ان کی پرخلوص دعائیں اتنا بھر دیتی تھیں کہ مجھے کبھی کسی چیز کی کمی محسوس ہی نہ ہوتی تھی۔
ایک دن کچھ خواتین ایمر جنسی میں ایک نوجوان مریضہ کولےکرآئیں،جس کا ایک بازو بری طرح جھلساہوا تھا اور وہ رورہی تھی۔خواتین نے بتایا کہ ولیمہ کا فنکشن تھا جس میں کسی جاننے والے نے ،مارے حسد کے آتش بازی کا سامان دلہن پر پھینک دیا اور بھاگ گیا ،دلہن نے اس جلتے ہو? انار کو اپنے بازو پر روک لیا ورنہ اس کا چہرہ جل جاتا۔شادی کی تقریب میں افراتفری پڑ گئی۔
" اوہ ،یہ حسد کرنے والے بھی جینا مشکل کردیتے ہیں!" میں نےتاسف سے کہا۔
نرس کو ڈریسنگ کا سامان لانے کو کہہ کر میں مریضہ کا معائنہ کرنے لگی۔ بیل بوٹے بنے ہو نازک حنائی ہاتھوں پر دھوئیں نےسیاہ نشان ڈال دئیے تھے۔بازو کا حال بھی ابتر تھا مگر بچت ہوگئی۔ "چند روز آپ کو پٹی کروانا ہوگی ،پھر یہ بازو ٹھیک ہوجائے گا ، اسے پانی سے بچائیے گا۔آپ کا نام کیا ہے؟" میں نے پرچی پر ادویات لکھتے ہو? پوچھا۔لڑکی نے آنسوؤں سے بھری پلکیں اٹھا کے میری طرف دیکھا اور آہستہ سے بولی خوب صورت۔( ختم شد)




































