لطیف النساء

حیا کا لفظ صرف عورتوں سے ہی کیوں منسوب کیا گیا ہے؟حیا تو ایک پاکیزہ ایمان افروز اور اللہ کا پسندیدہ رویہ ہے, جسے ہر شخص کو اپنانا چاہیے،عمر

کی کوئی قید نہیں ہر عمر میں حیا کا پہلو آپ کے مشاہدے میں ہوتا ہے۔ میری تین سالہ پوتی پہلی دفعہ جب میں اس کو نہلانے لے کر گئی کپڑے اتارنے لگی تو وہ کچھ بے چین نظر آئی پھر جب میں نے بالوں پر پانی ڈالا،جسم پر صابن لگاتے لگاتے جب اس کے جسم سے پوشیدہ حصوں کی صفائی کرنے لگی تو میں دیکھ کر حیران ہو گئی کہ پہلے وہ تھوڑا پریشان اور حیران ہوئی مما بولی اور پھر خاموش ہو گئی، میں سمجھ گئی کہ اس کو اچھا نہیں لگا، اس طرح لڑکے بھی حیا رکھتے ہیں۔

 میں نے ایک بچے کو چھیڑنے کے لیے کہا کہ تمہاری نیکر پھٹی ہوئی ہے! تم شیم شیم لگ رہے ہو! تو وہ معصوم پیچھے ہاتھ رکھ کر کمرے کی طرف بھاگا! مطلب شرما گیا گویا حیا کا عنصر پایا گیا جو کپڑوں کی حد سے آگے ہے۔ یہ تو خیر بہت ہی معمولی بات ہے ہم تو کہاں تک بڑھ گئے ہیں، حدود ہی کراس کر بیٹھے ہیں احساس رکھتے ہوئے پھر کہتے ہیں ہم تو ٹھیک ہیں، آج کا دور ہے ایسا ہی چلتا ہے! مطلب سب چلتا ہے! اتنا ہلکا لیتے ہیں۔

شروع سے لڑکیوں لڑکوں کو آزاد چھوڑا ہوا ہے۔ والدین بھی بہت آگے بڑھے ہوئے ہیں کیونکہ ان میں بھی ابھی حیا کا مکمل شعور نہیں، نہ انہوں نے خود سے سمجھنے کی کوششیں کیں، بس جو سن لیا یا سمجھ لیا اس کو بھی اپنی ہی مرضی سے موقع مناسبت سے کبھی کبھی اپنا لیا تو کبھی بالکل اڑا دیا ،لباس سنگھار بیان سے آگے بے پردہ ٹک ٹاک چل رہا ہے۔ خوب سے خوب تر نظر آئیں کیونکہ میڈیا تو کیا پوری دنیا پر چھا جاؤ کہ ہزاروں لاکھوں لائیکس ملیں گے ،بچے بچیوں کو پہلے ہی اتنا کھلا چھوڑ دیا ہے کہ ان کی حیا خود ہی نکال دی اب انہیں احساس ہی نہیں کیا صحیح ہے کیا غلط،گھر میں خاندان میں بڑے بہن بھائیوں، باپ،چاچا،تایا،نانا،دادا  دادی تو خیر ان کے علاوہ ہزارہا خالہ،ماموں، تایا زاد شہزادے ہوتے ہیں ان کا کیا؟ ان کے سامنے بھی یہی حلیے،جب ماں باپ ہی نہ روکیں کوئی اور کیا کرے انہیں تو کسی اور کا کہنا بھی برا لگتا ہے خود بھی نہ روکیں نہ دوسروں کو بولنے دیں تو وہ خود ہی کہہ اٹھتی ہیں، جب میاں ہی بیوی کو نہ روکے ٹوکے تو باقی کیا بچا؟ کہتے ہیں کہ عورت کا حسن محبت کے لیے ہے اور بے وقوف اس لیے تاکہ وہ بھی محبت کر سکے مرد سے، یہ ایک الگ بات ہے مگر محبت کے ساتھ حیا کا پہلو بہرحال مقدم ہے۔

حیا عورت کا زیور اور گھر کی عزت ہے واقعی ساتھیوں ہم ہی اپنے اوپر سب سےبڑا ظلم کرتے ہیں کہ بیٹیوں کی تربیت میں پہلی چیز پردہ شامل نہیں کرتے،انہیں محرم نامحرم کا شعور نہیں دیتے۔ انہیں معلوم ہو کہ تمام لڑکوں سے جن سے نکاح کیا جا سکتا ہے پردہ لازم ہے، بہنوئی بھی اس میں شامل ہے۔یہ پردہ صرف لباس کی حد حجاب یاعبائے کا نام نہیں ہے،نقاب نہیں، نہ ہی آنکھوں کی حفاظت کا نام ہے بلکہ انہیں صحیح شعور دلائیں کہ اللہ تعالی کا حکم ہے تمام اہل ایمان کے لیے۔بیٹیاں سمجھیں گی اٹھنے بیٹھنے بولنے چالنے کے آداب،لباس کے تقاضوں کے ساتھ ساتھ نگاہوں کی حفاظت اور اللہ کے حدود کی حفاظت اولین کام ہے۔ ساتھ ساتھ بیٹوں کو بھی عورت کا،بہن کا، بیوی کا اور بیٹی کا احترام سکھائیں، بلاوجہ کی بے تکلفی ہزارہا فساد جنم دیتی ہے ،لہٰذا خود بھی محترم رہیں دوسروں کی بہن بیٹیوں کی عزت کریں۔ مائیں خود بھی باپردہ ہوں تو اولاد خود باپردہ ہوگی ورنہ یہ دنیا تو واقعی ایک ا سٹیج سے کم نہیں!موبائل کا زمانہ! پورا ہی دیوانہ کسی نے کیا خوب کہا ہے کہ

نادان یہ عورت کیا جانے

سب گھات لگائے بیٹھے ہیں

باتوں میں تو کیسے آئے گی

سب بات بنائے بیٹھے ہیں

کب قدم تیرے رستہ بھٹکیں

سب نظریں جمائے بیٹھے ہیں

یہ مال سمجھتے ہیں تجھکو

بازار سجائے بیٹھے ہیں

منہ سے تجھے مظلوم کہیں

سوچوں میں نچائے بیٹھے ہیں

تو بہن بھی ہے تو ماں بھی ہے

سب رشتے بھلائے بیٹھے ہیں

یہ عورت مرد کے رشتے کو

بس کھیل بنائے بیٹھے ہیں

یہ بد ہیں, بدکردار بھی ہیں

صورت کو چھپائے بیٹھے ہیں

گر ایسا نہیں تو چپ کیوں ہیں

کیوں دین بھلائے بیٹھے ہیں

سبق ہیں جو اللہ نے دیے

کیوں سارے بھلائے بیٹھے ہیں

تو ان پہ بھروسہ نہ کرنا

یہ جال بچھائے بیٹھے ہیں

خود اپنی حفاظت کرنی ہے

یہ شرم مٹائے بیٹھے ہیں

نادان یہ عورت کیا جانے

سب گھات لگائے بیٹھے ہیں

ساتھیو! ایمان و حیا ساتھ ساتھ ہے جس میں ایمان نہیں وہ کیا حیا کرے گا؟ ایک حدیث کامفہوم ہےایمان کےکئی درجوں میں سےایک درجہ حیاہےاورجس میں حیا نہیں وہ جو چیز چاہے کرتا پھرے! بہرحال میں تو یہی کہوں گی کہ ہمیں ہر وقت اپنے اعمال کا، نعمتوں کا، خوبصورتی کا،عمر کا،جوانی کا، اپنے فرائض کا اور ہر نعمت کا حساب دینا ہے،وہ بھی اچانک موت کیا بھروسہ! آج ہے کل نہیں تو کیوں نہ احکام خداوندی بجا لائیں سورہ نور، سورہ احزاب ہی نہیں پورے قرآن کو اپنی لائحہ عمل بنائیں اوررہنمائی حاصل کریں۔رستہ معلوم ہو تو سفر آسان اور منزل پر پہنچنا آسان ہو جاتا ہے۔ اللہ پاک ہماری دنیا اور آخرت کی تمام منزلیں آسان فرمائے۔ آمین