
ثمینہ ناہید
دنیا میں کچھ رشتے ایسے ہوتے ہیں جن کی اہمیت کو الفاظ میں بیان کرنا آسان نہیں ہوتا۔ان رشتوں میں ایک نہایت قابلِ احترام اور عظیم رشتہ استاد کا
ہے۔ استاد محض ایک شخص نہیں بلکہ ایک رہنما، ایک مربی، ایک محسن اور ایک ایسی روشنی ہے جو انسان کی زندگی سے جہالت کے اندھیروں کو دور کرکے اسے علم کے اجالوں کی طرف لے جاتی ہے۔
ماں باپ ہماری زندگی کا آغاز کرتے ہیں۔ وہ ہمیں اس دنیا میں لاتے ہیں، ہماری پرورش کرتے ہیں، ہماری ضروریات کا خیال رکھتے ہیں اور ہمیں محبت و شفقت سے پروان چڑھاتے ہیں لیکن استاد وہ ہستی ہے جو ہمیں بتاتی ہے کہ اس دنیا میں جینا کیسے ہے، لوگوں کے ساتھ برتاؤ کیسے کرنا ہے، مشکلات کا سامنا کیسے کرنا ہے اور اپنی زندگی کو مقصد کے ساتھ کیسے گزارنا ہے۔ ماں باپ ہمیں زندگی دیتے ہیں اور استاد اس زندگی کو سنوارنے کا ہنر سکھاتا ہے۔
استاد کا مقام صرف اس لیے بلند نہیں کہ وہ ہمیں کتابیں پڑھاتا ہےبلکہ اس لیے بھی کہ وہ ہمارے اندر سوچنے، سمجھنے، سوال کرنے اور صحیح فیصلے کرنے کی صلاحیت پیدا کرتا ہے۔ وہ ہمیں الفاظ کے معنی ہی نہیں سمجھاتا، بلکہ زندگی کے مفہوم سے بھی روشناس کراتا ہے۔ وہ ہمیں صرف کامیاب انسان بننے کا راستہ نہیں دکھاتابلکہ ایک اچھا انسان بننے کی تربیت بھی دیتا ہے۔
استاد وہ معمار ہے جو قوموں کا مستقبل تعمیر کرتا ہے۔
ایک ڈاکٹر، ایک انجینئر، ایک سائنس دان، ایک جج، ایک ادیب، ایک صحافی اور یہاں تک کہ ایک استاد بھی کسی دوسرے استاد کی رہنمائی سے ہی اپنے سفر کا آغاز کرتا ہے۔ دنیا کی ہر بڑی کامیابی کے پیچھے کہیں نہ کہیں کسی استاد کی محنت، دعائیں اور رہنمائی شامل ہوتی ہیں۔ استاد خود شاید شہرت کی بلندیوں تک نہ پہنچے لیکن اس کے شاگرد اپنی کامیابیوں سے دنیا میں اپنا نام روشن کرتے ہیں۔ اس سے بڑھ کر استاد کی محنت کا صلہ اور کیا ہو سکتا ہے؟
استاد کی زندگی بظاہر ایک کلاس روم تک محدود دکھائی دیتی ہےلیکن حقیقت میں وہ آنے والی نسلوں کی بنیاد رکھ رہا ہوتا ہے۔ وہ بچوں کے ذہنوں میں علم کے بیج بوتا ہے، ان کے خوابوں کو حوصلہ دیتا ہے اور ان کی کمزوریوں کو ان کی طاقت میں بدلنے کی کوشش کرتا ہے۔ کبھی اس کی سختی میں اصلاح کا جذبہ چھپا ہوتا ہے، کبھی اس کی خاموشی میں فکر ہوتی ہے اور کبھی اس کے چند حوصلہ افزا الفاظ کسی مایوس طالب علم کی پوری زندگی بدل دیتے ہیں۔
ہم اکثر اپنی کامیابیوں کا جشن مناتے ہیں، اپنی ڈگریوں پر فخر کرتے ہیں اور اپنے مقام و مرتبے کا ذکر کرتے ہیں، لیکن کیا کبھی ہم رک کر یہ سوچتے ہیں کہ ہماری اس کامیابی کے پیچھے کس کی محنت شامل ہے؟ کس نے ہمیں پہلی بار قلم پکڑنا سکھایا؟




































