زین صدیقی
الخدمت سال ہا سال سے لوگوں کی فلاح و بہبودکیلئے کام کررہی ہے اور اس کے تمام کام خالصتاً اللہ کی رضا اور انسانیت کی خدمت کے عظیم
ترین مقصد کے تحت ہیں ۔کورونا وائر س آیا تو الخدمت نے وہ کام دنوںمیں کر دکھا ئے جس کے بارے میں مہینوں سوچا جاتا ہے۔ الخدمت نے جہاںلاکھوں لوگوں کی عزت نفس کا خیال رکھتے ہوئے ان دہلیز پرراشن پہنچایا،وہاں شہر میں ہونے والے طویل لاک ڈاو ¿ن سے متاثرہ لوگوں تک پکا پکایا کھانا تقسیم کیا ،50ہزار من گوشت لوگوں تک پہنچایا ،شہر بھر میں مساجد ،امام بارگاہوں ،مندروں وگرجا گھروں میں اسپرے کیا،سرکاری ونجی اسپتالوں کو حفاظتی لباس فراہم کیے ۔سستی روٹی پراجیکٹ کے تحت تنور بنائے ۔الخدمت نے لوگوں کی کورونا ٹیسٹ کے حوالے سے پریشانیوں کو دیکھتے ہوئے ناظم آبادمیں کروڑوں روپے کی لاگت سے اسٹیٹ آف دی آرٹ ”کورونا لیب“ قائم کی ،پی ای سی ایچ ایس میں ” ڈرائیو تھرو “کرونا ٹیسٹنگ سینٹر اور گلشن حدید میں کورونا ٹیسٹنگ کلیکشن پوائنٹ قائم کیا ،آکسیجن سلنڈز کی مفت فراہمی کاآغاز کیا۔یہی نہیں الخدمت کفالت یتامیٰ جیسی عظیم ترین خدمت ،بے روزگاروں کو چھوٹے بلاسودی قرضے،بارشوں اور ملک میں آنے والے ہنگامی حالات میں بھی میدان عمل میں نکلتی ہے ،شہر بھرمیں ہیلپ سینٹرز ،کلین واٹر پروجیکٹ کے تحت 40سے زائد واٹر پلانٹس لوگوں کی خدمت میں مصروف ہیں۔شہر کی سب سے بڑی میت بس سروس کی موجودگی کااعزاز بھی الخدمت کے پاس ہے ۔
یہ تمام کام جذبے اورقربانی بعد پایہ تکمیل تک پہنچے ہیں ،لیکن ان تمام کاموں کو وسعت دینے کی ضرورت ہمیشہ ہی رہتی ہے ۔رمضان المبارک اور عید الاضحیٰ کے دو خاص مواقع ایسے ہوتے ہیں، جب لوگ دل کھول کر الخدمت کو نہ صرف عطیات دیتے ہیں بلکہ فی سبیل اللہ قربانی میں بھی حصہ لیکر کر لوگوں کو عید کی خوشیوں میں شریک کرتے ہیں ۔گزشتہ برسوں کی طرح رواں برس بھی عید الاضحی پر الخدمت نے مخیر افراد کی جانب سے بڑے پیمانے پر فی سبیل اللہ قربانی کا اہتمام کیااور اس کا گوشت مستحقین ،غربا ،مساکین اور ضرورت مندوں تک پہنچایا ۔
الخدمت نے شامی مہاجرین اور برمی پنا ہ گزینوں کیلئے بھی بڑی مقدار میں گوشت روانہ کیا ،جس کا مقصد شامی اور برمی متاثرہ پنا گزینوں کو عید کی خوشیو ں میں شریک کرنا تھا ۔یہ تمام کام الخدمت حکومتی امداد کے بغیر کرتی ہے ،تاہم مخےر حضرات ان کاموں میں الخدمت کے شریک سفر رہتے ہیںجو لوگوں کی خدمت کے عظیم مقصد میں پیش پیش رہتے ہیں ۔
الخدمت ہر سال چرم قربانی کی مہم بھی بھرپور طریقے سے چلاتی ہے اور جماعت اسلامی اس کا حصہ ہوتی ہے ،جس سے یہ مہم مزید منظم ہو جاتی ہے ،جماعت اسلامی کا ہر کارکن عید کے تینوں روز بغیر کسی لالچ یا معاوضے کے اللہ کی خوشنودی اور لوگوں کی خدمت کی غرض سے کھالیں جمع کرکے انہیں الخدمت کے تحت قائم ٹینری تک پہنچانے میں مصروف رہا ۔اس مہم میں شریک ہر کارکن ہر رضا کار کے پیش نظر مقصد اللہ کی رضا کا حصول تھا ،یہی جذبہ اور ولولہ تھا کہ تنظیمی لحاظ سے منقسم 10اضلاع سے کھالیں جمع کی گئیں ۔
الخدمت نے کورونا وائرس کی عالمی وبا کے دوران اپنے بے مثال کاموں کی وجہ سے شہر قائد میں اپنی خدمات کا لوہا منوایا اور لوگ اس کی خدمات کے معترف ہو ئے بغیر نہیں رہ سکے ۔یہی وجہ ہے کہ الخدمت کو ماضی کے مقابلے میں قربانی کی ریکارڈکھالیں ملیں ۔یہ تھی الخدمت کے کاموں کی وہ ستائش جو لوگوں کی جانب سے چرم قربانی کی کھا لوں کی صورت میں کی گئی ۔
چرم قربانی مہم گز شتہ کئی دہا ئیوں سے جاری ہے اور بھرپور انداز سے جاری ہے ۔مگر اس بار شہریوں پر نہ قربانی کے حوالے سے کسی قسم کا کوئی دباؤ دیکھنے میں آیا نہ ہی کو ئی چرم قربانی دینے کے حوالے سے کو ئی دباو تھا ۔شہریوں نےبڑے اطمینان بخش طریقے سےقربانی کی اور اپنی مرضی کے مطابق الخدمت کوکھالیں دیں ۔شہر میں امن وامان کے لحاظ سے بھی الحمد اللہ سکون تھا ۔
چرم قربانی مہم میں الخدمت کے رضاکاروں ،جماعت اسلامی کے ذمہ داران اورکارکنان کی طرح الخدمت کے مرکزی ذمہ دارن نے بھی ماضی کی طرح اپنا مثالی کردار ادا کیا اور تینوں دن مصروف عمل رہے ۔امیر جماعت اسلامی حافظ نعیم الرحمن نے شہر بھر میں قائم چرم قربانی سینٹرز کے دورے کیے اور وہاں چرم قربانی جمع کرنے میں مصروف رہنماؤں اور کارکنوں کی دلجوئی کرتے رہے اور ان کا حوصلہ بڑھاتے رہے ۔
ایگزیکٹوڈائریکٹرراشد قریشی،نگر اں مرکزی چرم قربانی مہم انجینئرصابر احمد نےبھی مہم میں انتہائی مصروف وقت گزارااور پوری مہم کی نہ صرف نگرانی کی بلکہ رضاکاروں کی رہنمائی اوران کی مدد میں مصروف رہے ۔
چیف ایگزیکٹو الخدمت انجینئر سلیم اظہراورامیرجماعت اسلامی سندھ محمد حسین محنتی نےبھی مرکزی کیمپ کا دورہ کیا اورالخدمت کےرضاکاروں کی محنت اورلگن کو سراہا،جبکہ مسیحی برادری کے رہنما بھی کیمپ آئے اور الخدمت کے ذمہ داران کو عید الا ضحی کی مبارکباد اور مٹھائی پیش کی ۔
جماعت اسلامی اورالخدمت کی جانب سےشہربھرمیں کیمپس قائم کیےگئے تھے، جہاں نہ صرف لوگوں نے ازخود الخدمت کے ان کیمپس میں قربانی کی کھالیں دیں بلکہ کارکنان نے ٹیلی فونک اطلاعات پربھی گھروں پرجاکرکھالیں جمع کیں ۔الخدمت پر لوگ اعتماد کرتے ہیں،یہ اسی لیے ہے کہ جب خدمت اوردیانت مل جائیں تو لوگوں کا اعتماد حاصل کرنا کوئی مشکل کام نہیں لیکن الخدمت نے اپنا یہ نام کئی دہائیوں کی جدوجہد سے بنایا ہے۔
چرم قربانی مہم کے آخری روز امیر جماعت اسلامی حافظ نعیم الرحمن الخدمت کے تمام رضاکاروں اورجماعت اسلامی کے ذمہ داران اور کارکنوں سےاظہار تشکر کیا اور انہیں کامیاب ”چرم قربانی مہم “مبارکباد پیش کی۔ ان کا کہنا تھا کہ اہلیان کراچی نے اس پر جماعت اسلامی اورالخدمت پر بھرپوراعتماد کا اظہار کرتے ہوئے ماضی کے مقابلےمیں اس بارریکارڈ قربانی کی کھالیں دی ہیں ۔میں کراچی کے شہریوں کا تہہ دل سے شکر گزار ہوں کے وہ الخدمت پر اعتماد کرتے ہیں اور اس کے فلاحی کاموں کوسراہتے ہیں ۔
