کراچی ( نمائندہ رنگ نو ) ہمدررد پاکستان کی جانب سے 14۔اگست یوم آزادی کےسلسلےمیں ہمدرد کارپوریٹ ہیڈ آفس میں ملّی نغموں، قومی ترانوں اور سبز ہلالی پرچم سے سجی خصوصی تقریب کا انعقاد کیا گیا۔
ہمدرد فاونڈیشن پاکستان کی صدر محترمہ سعدیہ راشد نے بطور مہمان خصوصی شرکت کی اورکیک کاٹا۔ تقریب میں ہمدردپاکستان کی منیجنگ ڈائریکٹر اور چیف ایگزیکٹو آفیسرفاطمہ منیراحمد،چیف آپریٹنگ آفیسر فیصل ندیم سمیت سینئر مینجمنٹ اور کارکنان نےشرکت کی، جنہوں نے وطن عزیزکی سلامتی و ترقی کے لیے دعائیں مانگیں۔
محترمہ سعدیہ راشد نے کہاکہ14۔ اگست ایک ایسا دن ہےجب ہم اپنے بزرگوں کی جدوجہد ِ آزادی اورقربانیوں کو خراج تحسین پیش کرتےہیں جوقائد اعظم محمد علی جناح کی قیادت میں قیامِ پاکستان کے حصول میں ثابت قدم رہے۔آج کے دن ہمیں اپنے ملک کی خدمت و ترقی میں اپنا کردار ادا کرنے کے عزم کا اعادہ کرنا ہے۔ ملک کے شعبہ صحت وتعلیم میں ہمدرد پاکستان کی گراں قدر خدمات ادارے کی حب الوطنی، ایثار اور عزم کا مظہر ہیں۔ہمدرد پاکستان کو شہید حکیم محمد سعید نے وطن عزیز کی خدمت کرنے کے عزم سے قائم کیا تھا، چناں چہ ہمدرد پاکستان میں تمام قومی دنوں بہ شمول ۱۰رمضان یوم باب الاسلام اور 27 رمضان المبارک کو بھرپور قومی و ملی جذبے کے ساتھ خصوصی طور پر منایاجاتا ہے۔ہمیں’’ایمان، اتحاد، تنظیم‘‘اور شہید حکیم محمد سعید کے قول ’’پاکستان سے محبت کرو، پاکستان کی تعمیرکرو‘‘ جیسے سنہرے اصولوں پر عمل پیرا رہنے کا عزم کرنا ہے۔
اس موقع پر کارکنان نے بانی شہید حکیم محمد سعید کے روشن و خوشحال پاکستان کے خواب، نونہالوں کے اذہان کو روشن کرنے کے وژن، خدمت خلق کے اقدامات اور صحت کے شعبے میں نمایاں خدمات کو یاد کرکے انہیں خراج تحسین پیش کیا گیا۔
