
دبئی: ٹی ٹوئنٹی ایشیا کپ کے سپر فورمرحلےکے دوسرے میچ میں بھارت نے پاکستان کو 6 وکٹوں سے شکست دے دی۔ بھارتی ٹیم نے 172 رنز کا
ہدف 7 گیندیں قبل ہی حاصل کر کے میچ پر اپنی مکمل گرفت کا ثبوت دیا۔ یہ ایونٹ میں پاکستان کے خلاف بھارت کی مسلسل دوسری کامیابی ہے۔
میچ کا آغاز اور ٹاس کا منظر
میچ کا ٹاس بھارتی کپتان سوریا کمار یادیو اور پاکستانی کپتان سلمان علی آغا کے درمیان ہوا۔ ایک غیر روایتی لمحے میں سوریا کمار یادیو نے ٹاس کے بعد پاکستانی کپتان سے ہاتھ نہیں ملایا، جو سوشل میڈیا پر بھی زیر بحث رہا۔ میچ ریفری کے فرائض اینڈی پائی کرافٹ نے انجام دیے۔
پاکستان کی بیٹنگ: فرحان کی نصف سنچری، دیگر ناکام
پاکستان نے پہلے کھیلتے ہوئے مقررہ 20 اوورز میں 5 وکٹوں کے نقصان پر 171 رنز اسکور کیے۔ اوپنر صاحبزادہ فرحان نے 58 رنز کی شاندار اننگز کھیلی، جس میں 3 چھکے اور 5 چوکے شامل تھے۔ دیگر بیٹرز میں صائم ایوب اور محمد نواز نے 21، 21، فخر زمان نے 15 اور حسین طلعت نے 10 رنز اسکور کیے۔ سلمان علی آغا 17 اور فہیم اشرف 20 رنز پر ناٹ آؤٹ رہے۔
بھارت کی جانب سے شیوم دوبے نے 2، جبکہ ہاردک پانڈیا اور کلدیپ یادیو نے ایک،ایک وکٹ حاصل کی۔ محمد نواز رن آؤٹ ہوئے۔
بھارت کی بیٹنگ: اوپنرز کا طوفانی آغاز
ہدف کے تعاقب میں بھارتی اوپنرز ابھیشیک شرما اور شبمن گل نے پہلی وکٹ پر 105 رنز کی شراکت قائم کر کے میچ کو یکطرفہ بنا دیا۔ شبمن گل نے 28 گیندوں پر 47 رنز کی جارحانہ اننگز کھیلی، جس میں 8 چوکے شامل تھے۔ وہ فہیم اشرف کی گیند پر آؤٹ ہوئے۔
کپتان سوریا کمار یادیو بغیر کوئی رن بنائے حارث روف کا شکار بنے۔ ابھیشیک شرما نے 39 گیندوں پر 74 رنز کی دھواں دھار اننگز کھیلی، جس میں 5 چھکے اور 6 چوکے شامل تھے۔ انہیں ابرار احمد نے آؤٹ کیا۔
بھارت کی آخری وکٹ سنجو سیمسن کی گری، جو 13 رنز بنا کر حارث روف کی گیند پر بولڈ ہوئے۔
پاکستان کی جانب سے حارث روف نے 2، جبکہ فہیم اشرف اور ابرار احمد نے ایک، ایک وکٹ حاصل کی۔ شاندار اننگز کھیلنے پر ابھیشیک شرما کو "پلیئر آف دی میچ" قرار دیا گیا۔
ٹاس کے بعد کپتان سلمان علی آغا کا ردعمل
ٹاس کے بعد گفتگو کرتے ہوئے پاکستانی کپتان سلمان علی آغا نے کہا:
"اگر ہم ٹاس جیتتے تو بولنگ کو ترجیح دیتے۔ یہ میچ ہمارے لیے ایک نیا چیلنج ہے، ہم آج بہتر کرکٹ کھیلنا چاہتے ہیں۔"
انہوں نے مزید بتایا کہ ٹیم میں دو تبدیلیاں کی گئی ہیں:
"فہیم اشرف اور حسین طلعت کو حسن نواز اور خوشدل شاہ کی جگہ شامل کیا گیا ہے۔ ٹیم کا ماحول معمول کے مطابق ہے اور سب تیار ہیں۔"




































