احمد آباد: آئی سی سی ٹی 20 ورلڈ کپ کے 43ویں میچ اور سپر ایٹ مرحلے کے اہم مقابلے میں جنوبی
افریقہ کرکٹ ٹیم نے بھارت کرکٹ ٹیم کو 76 رنز سے شکست دے کر گزشتہ فائنل کا حساب چکتا کردیا۔
احمد آباد اسٹیڈیم میں کھیلے گئے میچ میں 188 رنز کے ہدف کے تعاقب میں بھارتی ٹیم 111 رنز پر ڈھیر ہوگئی۔ اس شکست کے ساتھ ہی ٹی 20 ورلڈ کپ میں بھارت کی مسلسل فتوحات کا سلسلہ بھی تھم گیا۔
یاد رہے کہ بھارت نے 2024ء کے ورلڈ کپ میں تمام میچز جیتے تھے اور ٹی 20 ورلڈ کپ میں لگاتار 12 کامیابیوں کے بعد اسے پہلی شکست کا سامنا کرنا پڑا ہے۔ دوسری جانب جنوبی افریقہ نے دفاعی چیمپئن بھارت سے گزشتہ ایڈیشن کے فائنل میں ہونے والی شکست کا بدلہ بھی چکا دیا۔
بھارتی بیٹنگ لائن جنوبی افریقی بولرز کے سامنے بے بس دکھائی دی۔ شیوم دوبے 42 رنز کے ساتھ نمایاں رہے، جبکہ ہاردک پانڈیا اور سوریا کمار یادو 18، 18 رنز بنا سکے۔ دیگر کوئی بیٹر خاطر خواہ کارکردگی نہ دکھا سکا اور پوری ٹیم 19ویں اوور میں 111 رنز پر آؤٹ ہوگئی۔
جنوبی افریقہ کی جانب سے مارکو یانسن نے 4، کیشو مہاراج نے 3 اور کوربن بوش نے 2 وکٹیں حاصل کیں,اس سے قبل جنوبی افریقہ نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر 187 رنز بنائے۔
ڈیوڈ ملر 63 رنز کے ساتھ ٹاپ اسکورر رہے، جبکہ ڈیوالڈ بریوس نے 45 رنز کی جارحانہ اننگز کھیلی۔ کپتان ایڈن مارکرم 4، کوئنٹن ڈی کوک 6، رائن رکلٹن 7، مارکو یانسن 2 اور کوربن بوش 5 رنز بناکر آؤٹ ہوئے,ٹرسٹن اسٹبس 44 اور کاگیسو ربادا صفر رنز کے ساتھ ناٹ آؤٹ رہے۔
بھارت کی جانب سے جسپریت بمرا نے 3، ارشدپ سنگھ نے 2 جبکہ ورون چکرورتی اور شیوم دوبے نے ایک، ایک وکٹ حاصل کی,بھارت اپنا اگلا میچ 26 فروری کو زمبابوے کرکٹ ٹیم کے خلاف کھیلے گا، جبکہ اسی روز جنوبی افریقہ کا مقابلہ ویسٹ انڈیز کرکٹ ٹیم سے ہوگا۔
