اسلام آباد ( ویب ڈیسک )وفاقی کابینہ نے وزیراعظم عمران خان کی ایران اور سعودی عرب کے درمیان
غلط فہمیاں ختم کرانے کی سہولت کاری کی توثیق کردی ہے اور کابینہ نے وزیراعظم پاکستان کے ان رابطوں پر اظہار اطمینان کیا ہے، وزیراعظم نے بڑھتی ہوئی مہنگائی، زخیرہ اندوزی کا نوٹس لیتے ہوئے جمعہ کو چاروں وزراءاعلیٰ کو اسلام آباد طلب کرلیا۔
وزیراعظم کی صدارت میں کابینہ کا اجلاس اسلام آباد میں ہوا، اہم خارجہ امور کے علاوہ ملکی داخلی صورتحال کا بھی جائزہ لیا گیا۔ کابینہ نے قانون سازی سے متعلق کمیٹی کی 4اکتوبر اور مرتب کی جانے والی سفارشات کی منظوری دیدی ہے جبکہ آزادی مارچ کا معاملہ صوبائی حکومتوں پر چھوڑ دیا گیا ہے۔
کابینہ نے زندگی بچانے اور دیگر89 ادویات کی قیمتوں میں کمی کا فیصلہ کرتے ہوئے فوری طورپر متعلقہ وزارت سے سمری طلب کرلی ہے جبکہ وقف املاک کو مفاد عامہ کے استعمال اسلام آباد کے ماسٹر پلان، جی سکس کے پائلٹ ہاﺅسنگ منصوبے کی بھی منظوری دیدی گئی ہے ، سی ڈی اے کے پالیسی سازی اور انتظامی امور کو الگ الگ کرتے ہوئے ادارے کو آزاد و خودمختار بنایا جائے گا۔
قیمتوں کے نظام کو صوبوں میں یکساں بنانے کیلئے جمعہ کو اہم اجلاس طلب کرلیا گیا ہے۔ صوبوں کو ہدایت کی گئی ہے کہ اشیاءضروریہ کی طلب و رسد پر خصوصی نظر رکھی جائے۔ کابینہ نے اس توقع کا اظہار کیا ہے کہ چین کی طرح اگر دونوں برادر اسلامی ملک سعودی عرب اور ایران بھی پاکستان کے آہنی بازو بن گئے تو اس سے پاکستان کی طاقت میں کئی گنا اضافہ ہوگا اور وہ اسٹرٹیجک معاشی اور دفاعی طورپر علاقے اور مسلم ورلڈ میں کلیدی کردار ادا کرنے کی پوزیشن میں ہوگا۔
معاون خصوصی اطلاعات و نشریات ڈاکٹر فردوس عاشق اعوان نے میڈیا بریفنگ میں بتایا کہ کابینہ اجلاس میں 12 نکاتی ایجنڈے پر غور کیا گیا۔وزیراعظم نے دورہ چین اور ایران پر کابینہ کو اعتماد میں لیا۔وزیراعظم نے منگل کو دورہ سعودی عرب کے حوالے سے بھی کابینہ کو اعتماد میں لیا :ڈاکٹر فردوس نے کہا کہ وزیراعظم کے دورہ چین نے سرکاری طورپر کشمیر کو متنازعہ علاقہ تسلیم کیا۔ایران اور سعودی عرب ملت اسلامیہ کے دو اہم ترین اور ہمارے برادر دوست ملک ہیں۔وزیراعظم کی کوششوں کو ایرانی قیادت نے پذیرائی بخشی۔
ڈاکٹر فردوس عاشق اعوان نے کہا کہ وزیراعظم نے اشیائے ضروریہ کی قیمتوں کے کنٹرول کیلئے متعلقہ حکام کو ضروری ہدایات دی ہیں ۔وزیراعظم نے ذخیرہ اندوزوں اور ناجائز منافع خوروں کیخلاف سخت کارروائی کی ہدایت کرتے ہوئے صوبائی حکومتوں کو ضلعی پرائس کمیٹیوں کو فعال بنانے کی ہدایت کی ہے۔فردوس عاشق اعوان نے کہا کہ مہنگائی کی لہر کی وجہ سے وزیر اعظم نے تمام وزرائے اعلی کو جمعہ کو طلب کر لیا ہے کابینہ نے بنیادی اشیائے ضروریہ کی قیمتیں مستحکم رکھنے کی ہدایت کی۔ معاون خصوصی اطلاعات و نشریات نے بتایا کہ کابینہ اجلاس میں متروکہ وقف املاک کے اثاثہ جات پربریفنگ دی گئی۔
