کراچی(ویب ڈیسک)متحدہ اپوزیشن کے صوبائی رہنماؤں نے کہا ہے کہ سلیکٹڈ حکومت اور سلیکٹر دونوں سے قوم تنگ آچکی ہے۔
سلیکٹر 70سال سے جو کھیل کھیل رہے ہیں اس سے اب باز آجائیں۔
جمعیت علماء اسلام کے مولانا راشد سومرو، پاکستان پیپلز پارٹی کے وقار مہدی،عوامی نیشنل پارٹی کے شاہی سید،پاکستان مسلم لیگ ن کے علی اکبر گجر، جے یوپی کے مفتی محمد غوث صابری،پختونخواملی عوامی پارٹی کے نذیر جان،جمعیت اہلحدیث کے مولانا محمد یوسف قصوری،نیشنل پارٹی کے محمد رمضان میمن، قومی وطن پارٹی کے عبدالقیوم ایڈووکیٹ ودیگر نے کراچی پریس کلب میں مشترکہ پریس کانفرنس کرتے ہوئے کہا کہ آر ٹی اے سسٹم کیسے اور کس نے فیل کروایا ہمیں بتایا جائے۔
ہم فری اینڈ فئیر الیکشن چاہتے ہیں۔یہ کیسی نیب ہے جوایک صوبے کے کیسزز دوسرے صوبے میں چلارہی ہے۔ ایک کروڑ نوکری دینے کے بجائے لاکھوں لوگوں کو بے روز گار کردیا گیا۔
روز مرہ اشیا کی قیمتیں آسمانوں سے باتیں کرہی ہیں مگر موجودہ حکومت کے کان پر جوں تک نہیں رینگتی۔سیاست کی شائستگی ختم ہوکرگالم گلوچ تک باقی رہ گئی ہے.انہوں نے کہا کہ کل سندھ کی 9 سیاسی جماعتوں کی آل پارٹیز کانفرنس کراچی کے مقامی ہوٹل میں منعقد ہوئی، جس میں صوبائی سطح پر سندھ میں رہبرر کمیٹی تشکیل دی گئی۔9 سیاسی جماعتوں کی آل پارٹیز کانفرنس جے یو آئی کے صوبائی سیکرٹری جنرل مولانا راشد محمود سومرو کی صدارت میں کراچی کے مقامی ہوٹل میں منعقد ہوئی۔
آل پارٹیز کانفرنس میں نو اپوزیشن جماعتوں کے صوبائی قائدین نے شرکت کی۔ جس میں اپوزیشن رہنماؤں نے واضح کیا کہ دھاندلی کی بیساکھی پر قائم حکومت کی جڑیں تاریخ ساز آزادی مارچ نے ہلا کر رکھ دی ہیں اپوزیشن اتحاد نااہل حکومت کے خاتمے تک اس کا تعاقب جاری رکھے گی۔ کانفرنس میں آزادی مارچ پلان اے اور بی کے بعد ملک کی سیاسی صورتحال کا جائزہ بھی لیا گیا۔کانفرنس میں فیصلہ کیا گیا کہ آزادی مارچ پلان سی پر سندھ میں عمل درآمد کیا جائے گا اور 26 نومبر کو تمام اپوزیشن جماعتوں کی جانب سے دوپہر 2 بجے کراچی میں الیکشن کمیشن کے دفتر کے سامنے عوامی قوت کا بھرپور مظاہرہ کیا جائے گا۔
