کراچی ( ویب ڈیسک ) سانحہ گل پلازہ میں شہید ہونے والے افراد کے اہلخانہ کیلئے سندھ
کابینہ کی جانب سے ایک کروڑ روپے فی کس مالی امدادکی منظوری دے دی گئی ہے۔
وزیراعلیٰ سندھ مراد علی شاہ کی زیر صدارت ہونے والے صوبائی کابینہ کے اجلاس میں بتایا گیا کہ سانحہ گل پلازہ سے متاثرہ دکانداروں کو فوری ریلیف کے طور پر پانچ، پانچ لاکھ روپے کچن اور یوٹیلیٹی اخراجات کے لیے کمشنر کراچی کے ذریعے ادا کیے جا رہے ہیں،اجلاس میں متاثرہ دکانداروں کو ایک، ایک کروڑ روپے بلاسود قرض فراہم کرنے کی بھی منظوری دی گئی۔ وزیراعلیٰ مراد علی شاہ نے کہا کہ یہ قرضہ دکانداروں کو دوبارہ کاروبار شروع کرنے میں مدد کیلئے دیا جا رہا ہے، جبکہ اس پر واجب الادا سود حکومت سندھ خود ادا کرے گی۔
سندھ کابینہ نے سانحہ گل پلازہ پر گہرے دکھ اور افسوس کا اظہار کرتے ہوئے وزیراعلیٰ سندھ کی سربراہی میں ایک سب کمیٹی بھی قائم کر دی ہے۔ سب کمیٹی میں صوبائی وزراء شرجیل انعام میمن، ناصر حسین شاہ، سعید غنی اور ضیاء الحسن لنجار شامل ہیں،سب کمیٹی کمشنر کراچی کی سربراہی میں قائم انکوائری کمیٹی کی رپورٹ کا تفصیلی جائزہ لے گی جس کی روشنی میں آئندہ کارروائی اور لائحہ عمل کا تعین کیا جائے گا۔
وزیراعلیٰ سندھ مراد علی شاہ نے مزید کہا کہ تمام متاثرہ دکانداروں کو دو ماہ کے اندر کاروبار دوبارہ شروع کرنے کیلئے دکانوں کی سہولت فراہم کی جائے گی اور حکومت متاثرین کے تحفظ اور بحالی کے لیے ہر ممکن اقدامات کرے گی۔
