اسلام آباد( ویب ڈیسک )امریکی نائب صدر جے ڈی وینس نے وزیرِ اعظم شہباز شریف سے ملاقات کی،
جس میں خطے کی صورتحال، امن و استحکام اور باہمی تعاون کے امکانات پر تفصیلی تبادلہ خیال کیا گیا,جاری اعلامیے کے مطابق امریکی نائب صدر کے ہمراہ خصوصی ایلچی اسٹیو وٹکوف اور جیرڈ کشنر بھی موجود تھے۔
ملاقات میں دونوں ممالک نے خطے میں امن و استحکام کے لیے مشترکہ طور پر کام کرنے پر اتفاق کیا۔ اس موقع پر پاکستان نے خطے میں امن کے فروغ کے لیے اپنی سفارتی سہولت کاری جاری رکھنے کے عزم کا اعادہ کیا۔
وزیرِ اعظم شہباز شریف نے ایران اور امریکا کے وفود کی مذاکرات میں تعمیری اور مثبت شرکت کو سراہا اور کہا کہ یہ مذاکرات خطے میں پائیدار اور دیرپا امن کے قیام کی جانب ایک اہم پیش رفت ثابت ہو سکتے ہیں۔ انہوں نے امید ظاہر کی کہ یہ بات چیت دونوں فریقین کے درمیان اعتماد اور تعاون کو مزید فروغ دے گی۔
وزیرِ اعظم نے اس موقع پر کہا کہ پاکستان خطے میں پائیدار امن کے قیام کے لیے اپنی کوششیں جاری رکھے گا اور ایک ذمہ دار ثالث کے طور پر اپنا کردار ادا کرتا رہے گا,ملاقات میں نائب وزیرِ اعظم اسحاق ڈار اور وزیرِ داخلہ محسن نقوی بھی وزیرِ اعظم کے ہمراہ موجود تھے۔
