
پشاور( ویب ڈیسک ،فوٹو فائل ) وزیراعظم شہباز شریف کی زیر صدارت گورنر ہاؤس پشاور میں ہونے والے اعلیٰ سطح کے اجلاس میں دہشت گردی
کے مکمل خاتمے پر اتفاق کیا گیا ہے۔
اجلاس میں صوبے کی سیاسی صورتحال اور حالیہ پیش رفت کا جائزہ لیا گیا۔ اجلاس میں وفاقی وزرا محسن نقوی، اعظم نذیر تارڑ، عطا اللہ تارڑ، امیر مقام اور رانا ثنا اللہ کے علاوہ گورنر خیبر پختونخوا فیصل کریم کنڈی، چیف سیکرٹری، انسپکٹر جنرل پولیس اور کور کمانڈر پشاور بھی شریک ہوئے۔
ذرائع کے مطابق اجلاس میں مسلح افواج، پولیس اور عوام کی قربانیوں کو خراج عقیدت پیش کیا گیا اور دہشت گردی کے مکمل خاتمے کے عزم کا اظہار کیا گیا۔
اس موقع پر وزیراعظم شہباز شریف نے کہا کہ آخری دہشت گرد کے خاتمے تک چین سے نہیں بیٹھیں گے اور ہمارے جوانوں اور افسران کی قربانیاں رائیگاں نہیں جائیں گی۔انہوں نے نے شرکا کو یقین دہانی کرائی کہ صوبے میں پولیس، محفوظ شہروں کے منصوبوں اور انسداد دہشت گردی کے محکمے کو درکار تمام وسائل وفاقی حکومت فراہم کرے گی۔
ذرائع کے مطابق وزیراعظم کی جانب سے دہشت گردی کے خلاف جنگ میں شہید ہونے والوں کے اہل خانہ کے لیے خصوصی امدادی پیکج کا اعلان بھی متوقع ہے۔




































