نیویارک،میڈرڈ،پیرس،تہران (ویب ڈیسک) دنیا بھر میں مہلک کورونا وائرس کے متاثرین کی تعداد 30 لاکھ سے تجاوز کرگئی
جبکہ اموات کی تعداد 206,997 ہوگئی ہے۔ پیر کو امریکی ذرائع ابلاغ کے مطابق کورونا سے امریکا میں اب تک 55415ہلاکتیں ہوئی ہیں۔
دنیا بھر میں کورونا وائرس اب بھی پھیل رہا ہے تاہم بعض ملکوں میں اس کے پھیلاؤ کی رفتار کم ہوئی ہے۔کورونا وائرس سے سب سے زیادہ متاثرہ ملک امریکہ ہے جہاں مصدقہ متاثرین کی کل تعداد 987322ہے۔ کورونا وائرس سے اٹلی میں 26644اور سپین میں 23190 افراد لقمہ اجل بن گئے ہیں۔جانز ہاپکنز یونیورسٹی کے جاری اعداد و شمار کے مطابق اس وقت کورونا وائرس سے متاثرہ افراد کی تعداد 30 لاکھ جبکہ اموات206,997 تک پہنچ گئی ہے۔
امریکہ اموات کی تعداد کے حوالے سے سرفہرست ہے جہاں اب تک 55ہزار سے زیادہ ہلاکتیں ہوئی ہیں۔ برطانیہ میں کورونا وائرس سے ہونے والی اموات کی تعداد20732 سے تجاوز کرگئی ہے۔ فرانس میں مہلک وائرس سے ہلاکتوں کی تعداد 22856ہوگئی ہے۔
بھارت میں وائرس سے 881افراد ہلاک ہوئے ہیں جبکہ مریضوں کی تعداد 27890ہے۔ کورونا وائرس سے دنیا بھر میں تقریباً 30 لاکھ افراد متاثر ہو چکے ہیں جبکہ ہلاک ہونے والوں کی تعداد دو لاکھ سے بڑھ گئی ہے تاہم سپین اور اٹلی میں اموات میں کمی آئی ہے۔
دنیا بھر میں جان لیوا وائرس کورونا سے اب تک 878,955مریض صحت یاب ہوئے ہیں۔ اٹلی کے وزیراعظم نے اعلان کیا ہے کہ چار مئی سے ملک میں معمولات زندگی پر لگی پابندیوں کو نرم کرنے کا آغاز ہوگا۔ اس وقت امریکہ اور یورپ سب سے زیادہ متاثرہ ہیں۔ یورپ میں ایک لاکھ سے زیادہ اموات ہوچکی ہیں جبکہ امریکہ میں مصدقہ متاثرین کی تعداد ساڑھے نو لاکھ سے بڑھ گئی ہے۔جاپان میں ناگاساکی میں لنگر انداز اطالوی جہاز پرسوار عملے کے 148 افراد میں کورونا وائرس کی تصدیق ہوگئی ہے۔
