
اسلام آباد (ویب ڈیسک)فیڈرل بورڈ آف ریونیو (ایف بی آر) نے جاری مالی سال کے پہلے چارماہ میں 4.06 ٹریلین روپے کے ٹیکسز جمع کیے ہیں، جس میں
اسے 124 ارب روپے کے شارٹ فال کا سامنا کرنا پڑا ہے تاہم اسے یہ امید ہے کہ ہفتے کے روز ٹیکس گوشواروں کے ساتھ مزید چند ارب روپے وصول ہو جائیں گے۔
جولائی تا اکتوبر 2026کی وصولی کے نتائج پر گہری نظر رکھی گئی تھی، جو دو غیر معمولی پیش رفتوں کے بعد سامنے آئے ہیں جن میں ایک نیا ٹیکس ادارہ قائم کرنے کی حکومت کی تجویز اور پین ڈاؤن اسٹرائیک کی دھمکی دینے پر ان لینڈ ریونیو سروس آفیسرز ایسوسی ایشن کے عہدیداروں کے خلاف سخت کارروائی شامل ہے۔
مہینے کے آخری سرکاری کام کے دن یعنی جمعہ تک، الیکٹرانک یا عارضی اعداد و شمار کے مطابق جو کہ دیر شام تک مرتب کیے گئے، ایف بی آر جاری مالی سال کے جولائی تا اکتوبر کے عرصے کے لیے نسبتاً کم ہدف مقرر کرنے کے باوجود 4.06 ٹریلین روپے اکٹھے کر سکا۔ یہ وصولی گزشتہ مالی سال کے مقابلے میں صرف 220 ارب روپے یا تقریباً 6 فیصد زیادہ تھی، جو سالانہ ہدف حاصل کرنے کے لیے درکار 17 فیصد رفتار سے بہت کم تھی۔ اکتوبر کے مہینے میں ٹیکس وصولیاں 974 ارب روپے رہیں، جو 1.132 ٹریلین روپے کے ہدف سے 158 ارب روپے کم تھیں۔ ایک سال پہلے کے مقابلے میں ماہانہ وصولی میں اضافہ صرف 23 ارب روپے یا 2.5 فیصد رہا۔
تاہم، ٹیکس حکام کو امید تھی کہ وہ گوشوارے جمع کرانے کی دو بار توسیع شدہ آخری تاریخ کے آخری دن یعنی 31 اکتوبر کو انکم ٹیکس ریٹرنز کے ساتھ 20 ارب سے 25 ارب روپے مزید حاصل کر سکتے ہیں۔ ریٹرنز کے ساتھ ادا کیے جانے والے ٹیکسز صحت مند رجحان کی عکاسی نہیں کر رہے تھے، حالانکہ ریٹرنز کی تعداد زیادہ تھی۔
اٹھائیس اکتوبر تک، پچھلے سال ریٹرنز کے ساتھ ادا کیے گئے اٹھاسی اعشاریہ 5ارب روپے انکم ٹیکس کے مقابلے میں اس سال ٹیکس محکمے کو 85.2 ارب روپے موصول ہوئے،حکام کو امید تھی کہ ہفتے کی دیر شام تک یہ فگر سو ارب روپے سے تجاوز کر جائے گی۔ اس سے ٹیکس شارٹ فال کم تو ہو جائے گا لیکن مکمل طور پر ختم نہیں ہوگا۔
ایف بی آر نے جاری مالی سال کے جولائی تا اکتوبر کے دوران 4.06 ٹریلین روپے کے ٹیکس حاصل کیے، جو ہدف سے 124 ارب روپے کم ہیں۔ گزشتہ مالی سال کے اسی عرصے کے مقابلے میں صرف 6 فیصد یا 220 ارب روپے کا معمولی نمو دیکھنے میں آیا۔ یہ اعداد و شمار اگلے 24 گھنٹوں میں ٹیکس ریٹرنز کے ساتھ ساتھ درآمدی ٹیکسوں کی مد میں مزید ادائیگیاں موصول ہونے کے بعد بہتر ہوں گے۔
موجودہ مالی سال کے لیے، حکومت اور آئی ایم ایف نے ایف بی آر کو 15.263 ٹریلین روپے کا سالانہ ٹیکس ہدف دیا ہے۔ اس کے لیے پچھلی سال کی وصولی کے مقابلے میں 17.4 فیصد نمو کی ضرورت ہے۔ ماضی کے برعکس، آئی ایم ایف نے ٹیکس کے اہداف کو پورا کرنا لازم قرار دیا ہے اور چھٹی لون قسط کی منظوری نصف سال کے ہدف کے حصول سے مشروط ہوگی۔
تاہم، ذرائع کا کہنا ہے کہ ایف بی آر کے اندرونی تخمینے سے پتہ چلتا ہے کہ وہ جون 2027 میں موجودہ مالی سال کے اختتام تک 14.3 سے 14.6 ٹریلین روپے تک پہنچنے کے قابل ہو گا، اس طرح شارٹ فال رہے گا۔




































