زین صدیقی
پانی انسا نی زندگی کی بنیادی ضرورت ہے، لیکن صاف پانی انسانی صحت کیلئے انتہائی ضروری ہے۔ملک کو آلودہ پانی کا مسئلہ
درپیش ہے اور اس سے نمٹنے کیلئے حکومتی سطح پر تو کوئی خاطرخواہ کاوش نظر نہیں آتی ،مگرالخدمت خدمات کے دیگر شعبہ جات کی طرح صاف پانی کے شعبے میں گزشتہ کئی دہا ئیو ںسے مو ثر انداز کام کررہی ہے۔ اس وقت الخدمت کے” کلین واٹر پروجیکٹ “کے تحت شہرکے مختلف علاقوں میں 44واٹرفلٹریشن پلانٹس نصب ہیں، جہاں یومیہ ہزاروں شہریوں پینے کا صاف پانی فراہم کیا جارہا ہے اوران پلانٹس سے سالانہ ایک کروڑسے زائدلوگ استفادہ کر رہے ہیں ۔
الخدمت اورترک سرکاری تنظیم ٹرکش کوارڈینیشن ایجنسی ( ٹکا )کا باہمی اشترک گزشتہ 3برس سے ہے اورٹکا کواس بات کا ادراک ہے کہ پاکستان میں صاف پانی کے مسائل درپیش ہیں ،اسی لیے اس نے الخدمت کی صاف پانی کے شعبے میں خدمات کو سراہتے ہوئے فیصلہ کیا کہ اس شعبے میں الخدمت کے ساتھ مل کر کام کیا جائے ۔ ٹکا کے تعاون سے الخدمت پہلے بھی لانڈھی نمبر4اوربفرزون میں 2آراو واٹر فلٹریشن پلانٹ نصب کر چکی ہے ۔لاکھوں روپے مالیت کے اب مزید 4پلانٹس نصب کرے گی، جن میںسے ایک پلانٹ کی تنصیب اورنگی ٹاؤن سیکٹرپندرہ ڈی میں کردی گئی ہے ۔چندروزقبل اس آراوواٹر فلٹریشن پلانٹ کا افتتاح کر دیاگیا ۔
پلانٹ کا افتتاح ترک وزیرثقافت وسیاحت کے مشیر کامل کولابس ،کنٹری کوارڈینیٹر ٹکا ابراہیم کٹرجی اور چیف ایگزیکٹوالخدمت کراچی انجینئر سلیم اظہر نے کیا ۔افتتا ح کے موقع پر ایگز یکٹوڈائریکٹر الخدمت راشد قریشی و دیگر ذمہ داران اورعلاقہ مکینوں کی بڑی تعداد موجودتھی۔
اس موقع پرموجود بچوں نے پاکستان اورترکی کے پرچم لہرا کرترک مہمانوں کا استقبال کیا اورانہیں گلدستے پیش کیے ۔ترک مہمانوں نے بچوں کو پیار کیا اورشفقت کے ساتھ ان کا شکریہ ادا کیا ۔ٹکا کے رہنما ؤں کو پلانٹ کا دورہ کروایا گیا اورانہیں پلانٹ سے متعلق بریفنگ دی گئی۔ترک مہمانوں کو بتایا گیا کہ اس پلانٹ سے یومیہ ایک ہزارسے زائد افراد استفادہ کریں گے ۔ان کے سوال کہ جس علاقے میں یہ پلانٹ نصب کیا گیا ہے ،یہاں کس قسم کی آبادی ہے اورپانی کے کیا مسائل ہیں پرٹکا کے رہنماؤں کو بتا یا گیا کہ یہاں لوگوں کو پینے کا صاف پانی میسر نہیں ۔آلودہ پانی سے لوگ امراض کاشکارہیں جبکہ یہ غریب آباد والا علاقہ ہے ۔ بعدازاں آراوواٹر فلٹریشن پلانٹ کا افتتاح کیا گیا اورٹکاکے رہنما ؤں نے اپنے ہاتھ سے لوگوں کوپانی اورواٹر کین تقسیم کیے۔
افتتاحی تقریب سے خطاب کرتے ہوئے مشیر برائے ترک وزیرثقافت وسیاحت کامل کولابس نے کہا کہ صاف اور محفوظ پانی انسانی زندگی کی بنیادی ضرورت ہے۔
ٹکا اس خواب کو پورا کرنے کیلئے الخدمت کے ساتھ مل کر صاف اور محفوظ پانی کے منصوبے پر کام کررہی ہے ۔یہ پلانٹ اورنگی کے مکینوں کیلئے ترک عوام کا تحفہ ہے۔ کامل کولابس نے کہا کہ پاکستان ترکی کا دوست ہے اوردنوں ملکو ں کے عوام کے دل ایک دھڑکتے ہیں۔ الخدمت کے ساتھ تعاون آئندہ بھی جاری رکھیں گے۔
ٹکا کے کنٹری کوارڈینیٹرابراہیم کٹر جی نے کہا کہ ٹکا پاکستانیوں کوپانی سے پیدا ہونے والی بیماریوں سے محفوظ رکھنے کیلئے آراوواٹر فلٹریشن پلانٹ نصب کر رہی ہے ۔انہوں نے اس عزم کا اظہار کیا کہ الخدمت کے ساتھ مل کر کام کریں گے۔
چیف ایگزیکٹو الخدمت کراچی سلیم اظہرنے کہا کہ ترک تنظیم ٹکا کے تعاون سے تیسراواٹر فلٹریشن پلانٹ نصب کیا گیا ہے ۔ہم اس تعاون پر ٹکا اور ترک عوام کا شکریہ اداکرتے ہیں ۔
انہوں نے کہا کہ یہ الخدمت کے شعبہ کلین واٹر کی شاندار کاوش ہے کہ اسے قلیل وقت میں مکمل کیا اورآج اسے علاقہ مکینوں کیلئے پلانٹ شروع کردیا گیا ہے میں شعبہ کلین واٹر کو ان کی بہترین کارکردگی پر مبارکباد پیش کرتا ہوں ۔اس پلانٹ سے لوگوں کو صاف اور معیاری پانی میسر آئے گا اور ہزاروں لوگ استفادہ کریں گے۔انجینئر سلیم اظہر نے کہا کہ ترک تنظیم ٹکا کے تعاون سے جلد کراچی اورحیدرآبادمیں مزید تین واٹرفلٹریشن پلانٹ نصب کیے جائیں گے ۔
دریں اثنا علاقہ مکینوں نے بھی الخدمت اورٹکا کی جانب سے پلانٹ کی تنصیب کو سراہااور خوشی کا اظہار کیا۔
