زین صدیقی

کورونا کی پہلی لہرآئی تو یہ دنیا کے لیے مشکلات لےکر آئی ۔معیشت کا پہیہ جا م ہوا۔لوگ بے روزگار ہوئے۔اسپتالوں میں ایمرجنسی نافذ تھی ۔

دنیا کے دیگر متاثرہ ممالک کی طرح پاکستان میں بھی ہزاروں اموات ہوئیں اور لاکھوں لوگ اس سے متاثر ہوئے،مگر اللہ کے فضل وکرم سے یہ تعداد دیگر ممالک کے مقابلے میں کم ہے ۔کورونا کی چوتھی لہر برقرار ہے اوراب بھی لوگ اس سے متاثر ہو کر جان کی بازی ہار رہے ہیں ۔

کورنا کی پہلی لہر ہی سے ملک کی سب سے بڑی این جی اوالخدمت عوام کی خدمت کیلئے میدان عمل میں ہے ۔اس نے جہاں کوروناکی وبا سے متعلق شعور وآگا ہی کیلئے کام کیا ،وہا ں لوگوں کو ان کے گھروں ،چوکوں ،چوراہوں پر موجود لاک ڈاؤن سے متاثر ہونے والے افراد تک خشک راشن ،پکا پکایا کھانا ،ہزاروں من گوشت ،تازہ سبزیاں بھی پہنچائیں ۔الخدمت نے کراچی میں ہنگامی بنیادوں پر کورنا ٹیسٹنگ لیب بھی قائم کی، جو اب بھی لوگوں کی خدمت میں مصروف ہے ۔

الخدمت نے کورونا کی جاری چوتھی لہر کے دوران بھی خدمات کے کاموں میں کسر نہیں چھوڑی ۔پہلی لہر کے آغاز پر جو مثالی کام کیے ،ان کی دنیا نے بھرپورتعریف کی ۔ملک بھر میں کورونا کی چوتھی لہر سے اب بھی لوگ متاثر ہو رہے ہیںاوراس دوران بھی الخدمت نمایاں خدمات انجام دے رہی ہے ۔

کراچی میں کورونا کی ویکسی نیشن سینٹر جب بھر گئے اور لوگوں کو ویکسی نیشن میں شدیددشواری کا سامنا تھا تو الخدمت نے عام لوگوں کو ”کورونا وائرس “کی خوفناک بھارتی قسم کے پھیلاو ¿ سے بچانے کیلئے ویکسی نیشن کا عمل کا آغاز کیااورسندھ حکومت کا تعاون سے الخدمت نے ہزاروں مردوخواتین اور نوجوانوں کی ویکسی نیشن کی۔اس مقصد کیلئے الخدمت کی جانب سے خصوصی طور پر ”کورونا ویکسی نیشن موبائل یونٹس “ تیار کیے گئے ،جن کا افتتاح حافظ نعیم الرحمن نے کیا ۔

الخدمت کے موبائل یونٹس نے ڈیفنس ،کلفٹن ،گلبرک اورکورنگی سمیت مختلف علاقوں میں ہزاروں شہریوں کوویکسین لگا ئی ،جبکہ الخدمت ہیڈآفس میں بھی ویکسین لگانے کا عمل جاری رہا ۔ لوگوں نے الخدمت کی اس سہولت سے کسی تکلیف کے بغیر استفادہ کیا اور الخدمت کی کاوش کو سراہا ۔اس مہم کے دوران تاجروں ،سرکاری ونجی اداروں اور فیکٹری ملازمین کی بھی ویکسی نیشن کی گئی ،جبکہ معذور افراد کویہ سہولت ان کے گھروں پر فراہم کی گئی ۔ یہ سہولت آئندہ ماہ ستمبر میں بھی جاری رکھنے کا اعلان کیا گیا ہے ۔الخدمت کے تحت کراچی میں قائم ”کورونا ٹیسٹنگ لیب“ میں اب بھی شہر کے دیگر اسپتالوں کے مقابلے میں انتہا ئی ارزاں نرخوں پر کورونا کا ٹیسٹ تین ہزار روپے میں کیا جا رہا ہے اوراب تک ہزاروں لوگ اس سہولت سے استفادہ کر چکے ہیں ۔

کورونا کی پہلی لہرسے ہی آکسیجن کی اہمیت بڑھ گئی تھی۔ الخدمت نے وائرس میں مبتلا افراد کی ٹوٹتی سانسوں کا تسلسل برقرار رکھنے اور آکسیجن سلنڈر کی مفت اور بلا تعطل فراہمی کا آغاز کیا۔کورونا کی چوتھی لہر کے دوران آکسیجن کی فراہمی کے عمل کو فوری یقینی بنانے کے لیے الخدمت ہیڈ آفس اور لیاقت آباد میں24گھنٹے سہولت فراہم کر نے کا فیصلہ کیا ،جبکہ الخدمت کے شہر میں قائم ہیلپ سینٹرز میں صبح سے شام تک کے اوقات میں یہ سہولت فراہم کر نے کا فیصلہ کیا گیا۔الخدمت کی جانب سے سلنڈر ز کی واپسی، اس کی ضرورت اور درست استعمال کو یقینی بنا نے، آکسیجن کے حصول کے لیے آنے والوں سے محض اصل قومی شناختی کارڈاور ڈاکٹرکی تجویز کردہ آکسیجن کی پرچی لی جاتی ہے تاکہ آکسیجن دینے اور لینے والے کو مکمل اعتماد رہے کہ آکسیجن کی جومقدار دی جا رہی وہ ڈاکٹر کی ہدایت کے عین مطابق ہے ۔الخدمت کی یہ آکسیجن سروس اس غریب وضرورت مند طبقے کے لیے زندگی کی امید ہے جو یا تو آکسیجن سلنڈر خریدنے اور اس کا بھاری ڈپازٹ جمع کروانے کی استطاعت نہیں رکھتے یا پھر انہیں کسی مقام سے آکسیجن سلنڈر نہیں مل رہا ۔الخدمت کی اس سہولت سے بلاتفریق ہر شخص استفادہ کر سکتاہے ،یہ سروس جاری ہے اوراب تک اس سروس سے سیکڑوں لوگ مستفید ہو چکے ہیں ۔

الخدمت کی ہمیشہ سے کوشش رہی ہے کہ شہریوں کو صاف ستھر اماحول فراہم کیا جائے۔اس کیلئے الخدمت کے شعبہ کمیونٹی سروسزنے شہر یوں کو وبائی امراض سے بچانے کیلئے کورونا کی پہلی لہر میں بھرپو رکام کیے ۔مساجد ،امام بارگاہوں ،گرجا گھروں ،فیکٹریوں ،بازاروں ، نجی ،سرکاری اسکولوں اور جامعات کے ساتھ شہر کے رہائشی علاقوں میں بھی اسپرے کیا ۔الخدمت کے رضاکاروں نے یہ” اسپرے مہم“ بڑے منظم انداز میں مکمل کی ۔

 الخدمت نے اسپرے کاکام کورونا کی دوسری ،تیسری لہر میں بھی کیا ،جبکہ رواں ماہ کے آغاز پر”بلدیہ عظمیٰ کراچی کے اشتراک سے شہر بھر میں 6روزہ اسپرے مہم کا آغاز کیا ۔اسپرے مہم کا افتتاح بلدیہ عظمی کے اس وقت کے ایڈمنسٹریٹر لئیق احمد اور چیف ایگز یکٹو الخدمت نوید علی بیگ نے کیا ۔یہ ایک منفرد” اسپرے مہم“ تھی جس میں بیک وقت 35گاڑیوں نے حصہ لیا ۔بلدیہ عظمی کی جانب سے اس مہم میں گاڑیوں اور افراد ی قوت کے لحاظ سے تعاون کیا ،جبکہ الخدمت نے بڑی تعداد میں رضا کار فراہم کیے ،اسپرے میں استعمال ہونے والی ادویہ اور تمام گاڑیوں کے فیول کی ذمہ داری بھی الخدمت نے اٹھائی ۔مہم کا آغاز ضلع جنوبی سے کیا گیا جبکہ ان گاڑیوں کے ذریعے شہر کے تمام اضلاع میں اسپرے کیا گیا ۔شہریوں نے الخدمت کی اس کاوش کو سراہا ۔

الخدمت بلاتفریق لوگوں کی خدمت میں مصردف ہے اورعام حالات میں بھی بے مثال کام کرتی رہی ہے ۔اس کے کاموں کی فہرست بہت طویل ہے ۔صاف پانی ،صحت ،تعلیم ،روزگار،کفالت یتامیٰ ،ڈیزاسٹر مینجمنٹ ،کمیونٹی سروسز اس کے وہ شعبہ جات ہیں ،جن میں یہ کام کر رہی اور یہ شعبے زندگی کی تمام ضروریات کو پورا کرتے ہیں ۔اہل خیر سمیت پورے معاشرے کی ذمہ داری ہے کہ وہ الخدمت کے کاموں میں اس کا ساتھ دے ۔