عالیہ عثمان

اللہ تعالی نے انسان کی تخلیق جوڑے کی شکل میں اس لیےفرمائی کہ وہ دونوں مل کر زندگی کا نظام چلائیں اور باہمی ملاپ سےمعاشرتی زندگی اور

خاندانی نظام کی بنیاد رکھیں۔ اس میں کوئی شک نہیں کہ عورت اور مرد انسان ہونے کے لحاظ سے بالکل برابر ہیں اوریہ لحاظ انسانیت یکساں عزت و احترام کے قابل ہیں_
لیکن صلاحیتوں اور قوت کے لحاظ سے ان کا دائرہ کار ایک جیسا نہیں ہےدونوں کا جسمانی نظام اور نفسیاتی ساخت ایک دوسرے سے مختلف ہے_
صدیوں سے معاشرے میں تقسیم کار کچھ ایسی رہی کہ باہر کے کام مردوں کے اور گھر کے کام عورتوں کے ذمہ داری سمجھےگئے _ حالانکہ عام عورت شروع سے زرعی کاموں میں شریک رہی۔
خوشی کی بات یہ ہے کہ زیادہ تر کامیاب تجربات کے پیچھے عورت ہی کھڑی نظر آتی ہے_
دور حاضر میں ایسے لوگوں کی کمی نہیں جو خواتین کو کمتر اور کمزور سمجھتے ہیں _
دین اسلام نے خواتین کو مردوں کے لیے بہر صورت محترم بنایا اور ہر حیثیت میں انہیں مردوں کی ذمہ داری قرار دیا ہے_
گھر اس دنیا میں آرام و سکون کا مرکز اور تہذیب کی بنیاد ہے انسان گھروں کو آباد کرتے ہیں اور گھر انسان کو چھت فراہم کرتے ہیں لیکن گھر کو سکون کا گہوارہ بنانے میں مرد سے زیادہ عورت کا کردار اہم ہوتا ہےذمہ داریوں میں گھری اس عورت کے نا جانے کتنے روپ ہیں پہلے بیٹی بن کر ماں باپ کی آنکھوں کو ٹھنڈک دیتی ہے ،خود چھوٹی ہوتی ہے تو اپنے ناز اٹھواتی ہے اور جب ککڑی کی بیل کی طرح بڑھتی ہے تو گھروالوں کے ناز اٹھاتی ہے جس گھر میں بچپن میں چیز یں پھیلاتی ہے شعور سنبھالنے پر گھر کی بکھری چیزیں سمیٹتی بھی ہے ۔
گھر کے کسی فرد کو رات کی چائے بنا کر دینا ، کسی کو علی الصباح وضو کا پانی دینا تو کبھی ماں کے کاموں میں ہاتھ بٹانا ،ابا کی فائلز سنبھال کر رکھنا ہےپھر پیا دیس ایک نئے سفر پر روانہ ہوتے ماں باپ کی آنکھوں کو گیلا کر جانا اسی عورت کا ایک رنگ ہے۔ بہن کے روپ میں بھائیوں کا مان رکھنا کسی نئے مکان کو گھر بنانا اور ہنستے مسکراتے زندگی کے سب اتار چڑھاؤ دیکھنا عورت ہی کا ظرف ہے
مشرق ہو یا مغرب اعلی تعلیم یافتہ ہو یا دو چار جماعتیں پڑھی ہوئ ، انسانی تہذیب کو ہمیشہ عورت کے انہی کرداروں کی ضرورت رہی ہے _
جہاں وقت بدلا، اس کے ساتھ ہی خود عورت کا اپنا کردار بھی بدلا ہےاس پر ذمہ داریاں بڑھی ہیں ۔مختلف میدانوں میں بے شمار کارنامے انجام دیئے اس نے خلا کا سفر بھی کیا اور چاند پر قدم بھی رکھا قلم کی دنیا میں سکہ بھی منوایا اور سائنس طب اور جراحی کے میدان میں بھی خود کو منوایا ، نوبل پرائز بھی حاصل کیا اور حکومتوں کی سربراہی کا تاج بھی پہنا_ تاریخ عورت کے کارناموں سے بھری پڑی ہے عورت اور مرد کو گاڑی کے دو پہیوں کی مانند قرار دیا جاتا ہے _
اردو کی ایک افسانہ نگار نے کتنا صحیح لکھا ہے ۔"مجھے یقین ہے عورت جب چاند سے واپس آئی ہو گی تو اس کے شوہرنے پوچھا ہوگا تمہیں پتا ہے میرے موزے کہاں رکھے ہیں ؟" تو اس سوال کا جواب عورت کو کل بھی دینا تھا اور آج بھی دینا ہے.
یعنی یہ سب کچھ تو عورت کر رہی ہے لیکن آج کے دور میں دشمنان اسلام بلکہ دشمن انسانیت کو اسلام میں خواتین کو ملی ہوئی عزت و شرافت اور تحفظ سخت ناگوار لگ رہا ہے وہ عورتوں کو تباہی و بربادی اور ہلاکت کے ایک ایسے وسیلے اور اپنے جال کی شکل میں دیکھنا چاہتے ہیں ۔ جس کے ذریعے وہ کمزور ایمان ،بے قابواور خواہشات وہوس سے مغلوب لوگوں کو اپنے پھندے میں گرفتار کر سکیں _
اللہ رب العزت ایسے لوگوں کے حق میں ارشادفرمایاہے ۔" ترجمہ اور جو لوگ خواہشات نفس کے پیرو ہیں وہ چاہتے ہیں کہ تم اس راہ راست سے ہٹ جائو ۔" النساء 270_
یعنی بیمار دل اور کمزور عقیدے کے مسلمان خواتین کے تعلق سے یہی چاہتےہیں کہ شیطانی خواہشات رکھنے والے تاجروں کے شورومز میں انکو سستے سامانوں کی طرح رکھا جائے جو خریداروں کے سامنے بالکل کھلے رکھے جاتے ہیں تاکہ ان کے خوبصورت مناظر سے لطف اندوز ہوسکیں اور خواتین اپنے گھروں کی چار دیواری سے نکل کر مردوں کے دوش بدوش ان کے کاموں میں ہاتھ بٹائیں _یا مختلف ذرائع ابلاغ میں بحیثیت اناؤنسر کام کریں جہاں وہ اپنی صورت اور آواز سے لوگوں کےفتنے جگائیں _
اس طرح بعض تاجروں اور صنعتی کمپنیوں نے فحش تصویروں کو اپنے سامان کی تجارت اور اپنے پروڈکٹ پر آویزاں کر کے انہیں فروغ دینے کا ذریعہ بنا رکھا ہے _ضرورت کے تحت عورت کو گھر کے باہر مجبوری کے تحت سروس یا دیگر کام کرنے کی تو اسلام میں بھی چھوٹ ہے لیکن گھریلو ذمہ داریوں کو ادا کرنے کے بعد ہی وہ گھر کے باہر سروس کر سکتی ہے کیونکہ گھریلو ذمہ داریوں کو بنیادی حیثیت حاصل ہے _ارشاد نبوی ہے کہ ترجمہ "یعنی عورت اپنے شوہر کے گھر کی محافظ و نگہبان ہےاور اس سے اس کی رعیت کے بارے میں پوچھا جائے گا _"بخاری ومسلم"
عورت چراغ خانہ یا شمع محفل نہیں ہے وہ آب دار موتی ہے جس کی روشنی میں عالم کو منور کرتی ہے _

عورت سے زندگی کا سفر مشکبار ہے
عورت خزاں راتوں میں نقیب بہار ہے۔(ڈاکٹر نثاراحمدنثار)