عریشہ اقبال
وقت کی گرد جب کتابوں پر جم جاتی ہے اور تاریخ سےرشتہ برائے نام رہ جاتا ہے،اس وقت قوم کا مستقبل زوال پذیر ہوتا نظر آتا ہے۔ تاریخِ اسلامی کے جواہر
سے بھری کتابیں گرد آلود تب ہونا شروع ہوئیں جب اس قوم نے، امتِ مسلمہ نے، کلمۂ حق کا ابلاغ اور فکرِ کربلا جیسی عظیم تاریخ سے کنارہ کیا۔ جب ہر بڑھتا ہوا قدم اسے حسینیت سے دور اور یزیدیت کے قریب کرتا چلا گیا، لبوں پر خاموشی چھاگئی اور دل پر قفل چڑھ گیا، حتیٰ کہ حسینؓ کا نام لینے والے ہی حسینیت سے ناآشنا ہوتے چلے گئے۔
جس کلمۂ حق کے لیے آلِ محمد ﷺ نےگردنیں کٹوا دیں، اس قربانی کی روح سےغافل ہو کرروح اور نفس کےدرمیان پردہ حائل کر دیا گیا۔
کیسا پردہ؟
جی ہاں جناب! وہی پردہ جوفکرِکربلا کی ضیاء کو روشن نہیں ہونے دیتا۔ وہی غفلت کی پٹی، جوآنکھوں کو بصیرت سے روکتی ہےاور ہاں! وہی محبت کے دعوے، جو عشقِ خدا میں جانیں فدا کرنے والوں کے حق میں وفا نہیں ہوتے۔
میں کیا دیکھتی ہوں کہ حسینیت کا نام گویا تسبیح ہو، جس کا ورد تو زبان پر تسلسل سے جاری ہےمگر وہ زبان اُس جھوٹ پر خاموش ہے، جس جھوٹ کے اندھیرے کو ختم کرنے کے لیے، شبِ ظلمت کےخاتمے کو، اسی حسینؓ نے کربلا کے میدان میں اپنے لہو کا دریا بہا کر اُمت کے حق میں شمعِ فروزاں جلائی تھی مگر یہی زبان حسینؓ کے کردار سے غافل نظرآتی ہے۔پھر حیا کے موتیوں سے آراستہ کرنے والی نواسیِ رسول ﷺ کے نقشِ قدم کو روندھ کر اپنا وقار کھو دینے والی صنفِ نازک، پیاس کی شدت سےتڑپتےعلی اصغرؓ اور بی بی سکینہؓ کو ہر سال غمِ حسینؓ اور کربلا کی یاد کو گفتار کا حصہ تو بناتی ہےمگر امتی کردار کی عظمت سمجھنے سے قاصر رہتی ہے۔
یہی وجہ ہے کہ معاشرہ یزیدیت کے فسوں میں جکڑا ہوا ہے۔ نظام غیر اسلامی اصولوں پرمشتمل ہے،ارادے مضمحل اورحوصلے پست ہیں کیونکہ دعوے میں سچائی نہیں اور یہ راستہ حسینیت سے وفا کی سمت نہیں جاتا۔ہمیں کربلا کی تاریخ سےاور اپنے اسلاف کی تعلیمات سے مضبوط رشتہ جوڑنے کی ضرورت ہےاور اس ضرورت کا احساس جتنا جلد اور جس قدر زیادہ ہوگااسی قدر نورِ ایمان سے دل اور کردارروشن ہوتے چلے جائیں گے۔بالآخر، اسلام کا سنہری حروف سے لکھا جانے والا ماضی جب حال کی تصویر پیش کرے گا تو اتمامِ حجت، ہر مردِ مومن کے حق میں سعادت اور شہادت کی صورت ہوگا، ان شاء اللہ۔
اللہ تعالیٰ ہم سب کو اہلِ بیت سے سچی محبت اور وفا کا صحیح حق سمجھنےکی توفیق عطا فرمائے۔آمین یا رب العالمین
