کعب حسین انصاری

امی ، امی، بابا ابھی تک گھر نہیں آئے۔

بیٹا آرہے ہوں گے ، نماز پڑھنے گئے ہیں تھوڑا وقت تو لگےگا۔ آپ جب تک اپنا سکول کا کام تو مکمل کریں۔

جی امی، وہ ہی کررہا ہوں ۔

احمد ، احمد دروازہ کھولو شاید بابا آئے ہیں ۔

جی امی ، جا رہا ہوں

السلام علیکم بیٹا،آپ نےسکول کا کام مکمل کرلیا

جی کرلیا لیکن مجھے آپ سے کچھ پوچھنا ہے

ہاں بیٹا ، کیوں نہیں ۔ پہلےکھانا کھالیتے ہیں پھر آپ پوچھ لینا ۔

احمد نے کھانا کھالیا تھا اوراب اس انتظار میں تھا کہ بابا کھانا کھالیں تووہ اپنے ذہن میں موجود سوالات کا تسلی بخش جواب حاصل کرسکے ۔

بلآخر دونوں باپ بیٹے فارغ ہوچکےتھےاوراب وقت تھا ایک محفل جمنےکا،احمد کے سوالات ہوتے اور عاصم کے جوابات ۔

بابا ، بارش کو باران رحمت کیوں کہتے ہیں ؟

دیکھو بیٹا،بارش اللّہ کی رحمت ہوتی ہےکیوں کہ جب بارش ہوتی ہے تووہ زمین جس پرپودے نہیں اگ سکتے،جسےہم بنجرزمین بھی کہتےہیں وہ زرخیز ہو جاتی ہے۔پودے نکل آتے ہیں ، فصلوں کو اور باغات کو ایک نئی زندگی ملتی ہے اور پھر ہم ان سے فائدہ حاصل کرتے ہیں ۔ جانوروں کو پانی ملتا ہے اور وہ تندرست ہو جاتے ہیں ، ہم انسان بھی بارش کےموسم سےلطف اٹھاتےہیں،اس میں نہاتے ہیں ، فصلوں کے لیے اور اپنے استعمال کے لیے پانی ذخیرہ کرتےہیں۔بارش کے فائدے ہی فائدے ہیں بیٹا ۔

لیکن بابایہ سیلاب بھی توآجاتاہے،پھر یہ کیسی رحمت ہوئی ؟

دیکھو بیٹا،طوفان اورسیلاب وغیرہ ہماری لالچ،ہمارے گناہوں اورہماری غلطیوں کا نتیجہ ہیں

وہ کیسے بابا؟ اسکول میں تو مس کہ رہی تھیں کہ اس کے پیچھےسائنسی وجوہات ہوتی ہیں ؟

میں یہ ہی توآپ کوسمجھارہاہوں کہ ہماری لالچ اور غلطیاں بھی اس میں شامل ہیں۔دیکھو بیٹا ، ہم اپنی ضروریات سے بڑھ کر جب قدرت پر یعنی جنگلات پر بوجھ ڈالتے ہیں تو اس کا نتیجہ قدرتی آفات کی صورت میں نکلتا ہے۔جب جنگلات کو ختم کیا جاتا ہے تو گرمی کی شدت میں اضافہ ہوتا ہے اور اس گرمی کی شدت میں اضافے کی وجہ سے غیر موسمی بارشیں ہوتی ہیں اور ہماری مشکلات میں اضافہ ہوتا ہے ۔ اسی طرح ہمارے گناہوں کا نتیجہ بھی ہوسکتا ہے جس طرح پچھلے ہفتے ہم نے حضرت نوح علیہ السلام کی قوم کی تباہی کے بارے میں بات کی تھی ۔

ا چھا بابا ، بادلوں کا پھٹنا کیا ہوتا ہے ؟

بادلوں کے پھٹنے کے عمل میں ہوتا یہ ہے بیٹا کہ جب گرمی کی شدت بڑھتی ہےتو بادل بنتےہیں اور اگر ہوا میں بھی نمی زیادہ ہو تو بادل اور زیادہ پانی جمع کرلیتے ہیں ، اس طرح جب پہاڑوں سے ٹکڑا کر ہوا اوپر اٹھتی ہے تو بادل پھٹ سکتے ہیں اسی لیے بادل پھٹنے کا عمل پہاڑی علاقوں میں ہی ہوتا ہے ۔

بابا، اس کا حل کیا یے؟ہمارے علاقے میں جب دیکھو سیلاب آجاتا ہے،اتنا نقصان ہوتا ہے ۔

بیٹا اس کے لیے ہماری حکومت کے پاس ٹھوس پالیسیاں ہونی ۔۔۔

   عاصم ، عاصم ۔

رکو بیٹامیں آتا ہوں،باہر سے کوئی آواز دے رہا ہے ۔

جلدی آیے گا بابا ، مجھےجواب سننا ہے۔

ہاں نعمان، کیا ہوا؟ خیریت تو ہے ؟

نہیں بھائی ، خیریت ہی تو نہیں ہے۔ابھی اطلاع آئی ہےکہ پچھلےعلاقےتک سیلاب کا پانی پہنچ چکا ہے،ہمیں اپنا علاقہ چھوڑنا ہوگا،وقت نہیں ہے ۔

لیکن ہم جائیں گے کہاں ؟

کسی محفوظ جگہ کی تلاش میں ، یہاں رہےتوہمارازندہ بچنا بہت مشکل ہے۔ہمیں آگےکسی علاقےمیں پہنچناہوگا جوسیلاب کےراستے میں نہ آتا ہو۔جلدی کرو ، گھر والوں کو ساتھ لو، کچھ ضروری سامان اٹھاؤ اور جلدی ہمارے ساتھ  نکل چلو، سب لوگ علاقہ خالی کررہے ہیں ۔

ٹھیک ہے،ٹھیک ہےتم بھی تیاری کرو،میں فورا ًکچھ کرتا ہوں ۔

ہاں، جلدی کرو۔اپنا خیال رکھنا، اللہ حافظ۔۔

تم بھی ، اللّہ حافظ۔۔

احمد آؤ،جلدی کرو،امی کو بلاؤ فوراً،ہمیں نکلنا ہوگا ۔

بابا کدھر جانا ہے؟پہلے میرے سوال کا جواب تو دیں،اس کاحل تو بتائیں ۔

بیٹا یہ سوال جواب کا وقت نہیں ہے ہمیں نکالنا ہوگایہ علاقہ چھوڑنا ہوگا ، سیلاب آرہا ہے ۔

چلو احمد، نادیہ جلدی کرو ، ضروری سامان سمیٹو۔

بس ایک بیگ میں ہی تھوڑا بہت سامان ڈال دو۔

بابا، یہ اتنی خطرناک آواز کیسی ہے ؟

آواز سننے کی دیرتھی کہ عاصم نے احمد کوگودمیں اٹھایا،نادیہ کو ساتھ لیااوروہ گھر سےباہر تھے،باہر قیامت صغریٰ تھی ۔ سب ایک طرف بھاگے جا رہے تھے۔ اس کے خاندان والے ، اس کے بھائی ، گھرکی خواتین اور وہ بھی احمد اور نادیہ کو اپنےساتھ لیے ان کے پیچھے دوڑ پڑا ۔ کتنا دہشت ناک منظر تھا ! سیلاب کی بے رحم موجیں اس کے پیچھے تھیں اوران موجوں کا ہراول دستہ اس کے علاقے اوراس کے ملک کے حکمران اور سیاستدان تھے ، وہ جن سے اس نے وفاداری نبھائی تھی، جن کی خاطر سڑکوں پر احتجاج کیا تھا ،جسم پر ڈنڈے کھاۓ تھے۔ وہ کل بھی محفوظ تھے اور آج بھی محفوظ ، کل بھی عاصم اور اس کے جیسے نوجوانوں کو مارا گیا تھا اور آج بھی یہ نوجوان اپنے گھر والوں کےلیےسیلاب کی بے رحم موجوں کے آگے ایک عارضی بند تھے۔

احمد کا سوال اور عاصم کا ادھورا جواب اب عاصم کے کانوں میں گونج رہا تھا،احمد کی آنکھوں میں صرف اور صرف خوف تھا ۔پھراچانک ایک جھٹکا اور دوڑتا ہوا عاصم گرپڑا ، احمد ہاتھ سے نکل چکا تھا اور نادیہ نے احمد کو کھینچ لیا تھا لیکن عاصم اب اپنی طرف بڑھتے سیلاب کو محسوس کرسکتا تھا ۔ اس نے نادیہ اور احمد کو قریب ہی اونچائی پر چڑھنے کا کہا اور اب عاصم بھی بہتے سیلاب کا ایک حصہ تھا ، اس نے اپنے حکمرانوں کی ناقص پالیسیوں کا حساب چکا دیا تھا اور احمد کو اتنی کم سنی ہی میں ادھورے جواب کا مکمل جواب مل چکا تھا۔ وہ جواب جس کو تلاش کرنے کے لیے لوگوں کی عمریں گزر جاتی ہیں لیکن جواب ادھورا ہی رہتا ہے ۔

       سیلاب کا ریلا گزر جانے کے بعد اپنے پیچھے زمین پرایک نئی تہہ چھوڑگیاتھااوریہ نئی تہہ آج دوبارہ اسی حکمران کےپروٹوکول کودیکھ رہی تھی جو اس صوبے کا وزیر اعلیٰ تھا اور خدمت خلق سے سرشار ان نوجوانوں کو بھی دیکھ رہی تھی جو اپنے ساتھ امدادی سامان کے ٹرک لے کر آئے تھے ۔ اب یہی وقت تھا زندہ بچ جانوں والوں کے لیے ، اس ادھورے جواب کو مکمل کرنے کے لیے کہ ان کا ہم درد اور غم خوار یہ پروٹوکول والے ہیں یا امدادی سامان والے۔