ٹاؤنٹن(اسپورٹس ڈیسک )انگلینڈ اور ویلز میں جاری12ویں کرکٹ ورلڈ کپ کے ایک اہم میچ میں بنگلا دیش نے ویسٹ انڈیز کو
آؤٹ کلاس کرتے ہوئے322رنز کے بڑے اسکور کا ہدف42اوورز میں ہی عبور کرکے سات وکٹوں سے فتح حاصل کی اور مخالف ٹیموں پر اپنی دھاک بٹھادی۔
بنگلا دیش نے ٹاس جیت کر ویسٹ انڈیز کو پہلے بیٹنگ کی دعوت دی۔ ویسٹ انڈیز کے سب سے تجربہ کار اور خطرناک بلےباز کرس گیل چوتھے اوور میں سیف الدین کی گیند پرکوئی رن بنائے بغیر کیپر کے ہاتھوں کیچ آؤٹ ہوگئے ہیں۔
تاہم اس کے بعد ایون لوئس اور شائے ہوپ نے محتاط بیٹمنگ کرتے ہوئے 122 رنز کر شراکت کی۔ ایون لوئس 70 رنز بنا کر آؤٹ ہوئے اور ان کی وکٹ شکیب الحسن نے لی۔ویسٹ انڈیز کو تیسرا نقصان اس وقت ہوا جب نکولس پورن 25 رنز بنا کر شکیب الحسن کی گیند پر آؤٹ ہوگئے۔چوتھی وکٹ شمرون ہٹمائر کی گری جو کہ اپنی نصف سنچری مکمل کرتے ہی آؤٹ ہوگئے۔ ان کے بعد آندرے رسل بھی صفر کے انفرادی سکور پر آؤٹ ہوگئے۔تاہم ان کے بعد جیسن ہولڈر نے آ کر دھواں دار بیٹنگ کی اور 15 گیندوں پر 33 رنز بنا کر آؤٹ ہوگئے۔ویسٹ انڈیز کی جانب سے کامیاب ترین بلے باز شائے ہوپ رہے جنھوں نے اوپنگ سے لر کر 47ویں اوور تک اپنی ٹیم کو سہارا دیا۔ وہ 96 رنز بنا کر آؤٹ ہوگئے۔اختتامی اوورز میں ڈیرن براوو نے دو چھکے لگا کر اپنی ٹیم کی ٹرپل سنچری مکمل کرائی اور مقررہ اوورز میں 8وکٹوں کے نقصان پر 321رنز بنائے۔بنگلا دیش کے مستفیض اور محمد سیف الدین نے تین، تین وکٹیں لیں۔
ہدف کے تعاقب میں بنگلہ دیشی اوپنرزتمیم اقبال اور سومیا سرکار نے شاندار کھیل پیش کرتے ہوئے اپنی ٹیم کو 52رنز کا اچھا آغاز فراہم کیا ۔ سومیا سرکار 29 رنز بنا کر آند رے رسل کی گیند پر سلپ میں کیچ آؤٹ ہوگئے۔133رنز پر تین وکٹیں گرنے کے بعد شکیب الحسن اورلتن داس نے چوتھی وکٹ کے لیے ناقابل شکست 189رنز کی فتح گر شراکت قائم کی۔
شکیب الحسن نے 99 گیندوں پر 124 رنز بنائے اور وہ مین آف دی میچ بھی رہے۔ جبکہ لتن داس نے 69 گیندوں پر 94 رنز کی زبردست اننگز کھیلی۔ان دونوں بلے بازوں نے کالی آندھی کے گیند بازوں کی ایک نہ چلنے دی اور میدان کے چاروں طرف آزادانہ اسٹروکس کھیلتے رہے۔ بنگلا دیش نے جیت کیلئے درکار 322رنز کا ہدف 51گیندوں قبل ہی حاصل کر لیا۔
اس میچ کے بعد اب بنگلہ دیش کے پانچ میچوں میں پانچ جبکہ ویسٹ انڈیز کے پانچ میچوں میں تین پوائنٹس ہوگئے ہیں۔
