دبئی (رنگ نوڈاٹ کام۔ فوٹو:پی ایس ایل) پاکستان سپر لیگ کے 16ویں میچ میں ملتان سلطانز نے
شاندار باؤلنگ اوربیٹنگ کا کے نتئجے میں اسلام آباد یونائیٹڈ کو 6 وکٹوں سے شکست دے دی
دبئی اسپورٹس سٹی میں کھیلے جانے والے میچ میں ملتان سلطانز کے کپتان شعیب ملک نے ٹاس جیت کر پہلے باؤلنگ کرنے کا فیصلہ کیاتھا۔
ملتان سلطانز کے باؤلرز حریف ٹیم پر ابتدا سے ہی چھائے رہے اور اسلام آباد یونائیٹڈ کے کسی بھی کھلاڑی کو کھل کر کھیلنے نہیں دیا۔گزشتہ میچ کی طرح کیمرون ڈیلپورٹ اس مرتبہ بھی یونائیٹڈ کے لیے کچھ نہ کر سکے اور 4 رنز بنا کر پہلے ہی اوور میں محمد الیاس کا شکار بنے۔
دوسری جانب سے جارح مزاج لیوک رونکی نے اپنا روایتی کھیل جاری رکھا اور اسکور کو 34 رنز تک پہنچایا لیکن اس مقام پر صاحبزادہ فرحان نعمان علی کی گیند پر اسٹمپ آؤٹ ہوگئے۔اسکور 42 پرپہنچا تھا کہ لیوک رونکی گیند کو باؤنڈری کے باہر پہنچانے کی کوشش کرتے ہوئے محمد الیاس کی گیند پر شعیب ملک کے ہاتھوں کیچ آؤٹ ہوگئے۔ پٹیل کی 20، آصف علی کی 22 اور فہیم اشرف کی 16 رنز کی مزاحمت کی وجہ سے اسلام آباد یونائیٹڈ 121 رنز بنا کر آؤٹ ہوئی۔
ملتان سلطانز کی جانب سے ڈینیئل کرسچن نے 3، شاہد آفریدی، نعمان علی اور محمد الیاس نے 2، 2 جبکہ محمد عرفان نے ایک کھلاڑی کو آؤٹ کیا۔جواب میں ملتان سلطانز کا شاندارآغاز ہوا،جہاں جیمز وینس اور عمر صدیق نے ٹیم کو 7 اوور میں 54 رنز کی پارٹنر شپ دی۔
جیمز وینس 28 رنز بنانے کے بعد سمت پٹیل کی گیند پر 54 کے اسکور پر آؤٹ ہوئے تو وکٹ پر آنے والے جانسن چارلس 4 رنز بنانے کے بعد شاداب کی گیند پر 59 کے مجموعے پر ایل بی ڈبلیو ہوئے۔کپتان شعیب ملک نے اوپنر عمر صدیق کے ہمراہ 40 رنز کی پارٹنرشپ قائم کرکے ٹیم کے لیے دوسری فتح کو یقین بنایا۔
عمرصادق 99 کے اسکور پر 46 رنز بنانے کے بعد رومان رئیس کی گیند پر کیچ آؤٹ ہوگئے، تاہم ان کی وکٹ سے ملتان سلطانز کی فتح متاثر نہیں ہوئی۔
پی ایس ایل 2019 میں یہ ملتان سلطانز کی دوسری کامیابی ہے جبکہ اس ٹیم کی پہلی کامیابی بھی اسلام آباد یونائیٹڈ کے ہی خلاف تھی جب گروپ کے پہلے میچ میں سلطانز نے 5 وکٹوں سے فتح سمیٹی تھی۔
