اسلام آباد (ویب ڈیسک ،خبرایجنسی ) وزیراعظم عمران خان نے کہا ہے کہ کم آمدنی والے طبقوں کی بنیادی ضروریات کا خیال رکھنا
ریاست کی ذمہ داری ہے جو موجودہ حکومت نے اٹھائی ہے، پناہ گاہوں اور لنگر خانوں کا قیام حکومت کی جانب سے کمزور طبقہ کی معاونت کے عزم کا عملی مظہر ہے اس سلسلہ میں نجی شعبہ اور مخیر حضرات کا حکومت کے ساتھ اشتراک کار قابل تحسین ہے۔
وز یر اعظم نے یہ بات کم آمدنی والے طبقہ کو ریلیف فراہم کرنے کے حوالے سے اجلاس کی صدارت کرتے ہوئے کیا۔ اجلاس میں وزیرِ منصوبہ بندی اسد عمر، مشیر خزانہ ڈاکٹر عبدالحفیظ شیخ، مشیر اصلاحات ڈاکٹر عشرت حسین، معاون خصوصی برائے سماجی تحفظ ڈاکٹر ثانیہ نشتر، سابق وزیرِ خزانہ شوکت ترین و دیگر سینئر افسران نے شرکت کی۔
اجلاس میں مختلف شعبوں سے تعلق رکھنے والے کم آمدنی والے طبقوں کو ریلیف کی فراہمی کے حوالہ سے حکومت کی جانب سے کئے جانے والے اقدامات اور ان کو مزید موثر بنانے کے حوالہ سے تجاویز وزیرِاعظم کو پیش کی گئیں۔
معاون خصوصی برائے سماجی تحفظ ڈاکٹر ثانیہ نشتر نے وزیرِاعظم کو ملک بھر میں جاری غربت کے ازسرنو سروے کی پیشرفت سے بھی آگاہ کیا۔ وزیرِاعظم نے اجلاس سے خطاب کرتے ہوئے کہا کہ کم آمدنی والے طبقوں کی بنیادی ضروریات کا خیال رکھنا ریاست کی ذمہ داری ہے جو موجودہ حکومت نے اٹھائی ہے۔ انہوں نے کہا کہ کم آمدنی والے طبقوں کی بنیادی ضروریات کو پورا کرنے کو یقینی بنانے کےلئے حکومت ہر ممکنہ کوشش کرنے کےلئے پرعزم ہے۔
وزیرِاعظم نے کہا کہ معاشرے کے کمزور طبقوں کو بنیادی اشیاءضروریہ کی فراہمی کےلئے حکومت کی جانب سے یوٹیلیٹی سٹور نیٹ ورک کے ذریعے معاونت فراہم کر رہی ہے تاکہ کہ ایسے افراد اور خاندانوں کو آٹا، گھی، چینی اور دالوں جیسی روزمرہ کی بنیادی اشیاءضروریہ کے حصول میں آسانی میسر آئے۔
انہوں نے ہدایت کی کہ کم آمدنی والے طبقہ کو مزید ریلیف کی فراہمی کےلئے پیش کی جانے والی تجاویز پر تفصیلی غور کیا جائے تاکہ قابل عمل تجاویز پر عملدرآمد ممکن بنایا جا سکے۔ وزیراعظم نے موجودہ حکومت کی جانب سے پناہ گاہوں اور احساس لنگر پروگرام کا خصوصی طور پر ذکر کرتے ہوئے کہا کہ پناہ گاہوں اور لنگر خانوں کا قیام حکومت کی جانب سے کمزور طبقہ کی معاونت کے عزم کا عملی مظہر ہے۔ انہوں نے اس منصوبہ میں نجی شعبہ کی شرکت کو سراہتے ہوئے کہا کہ بے سہار ا اور کمزور طبقوں کی معاونت کےلئے نجی شعبہ اور مخیر حضرات کی حکومت کے ساتھ پارٹنرشپ قابل تحسین ہے۔
