کراچی (ویب ڈیسک) آل پرائیویٹ اسکولز مینجمنٹ ایسو سی ایشن سندھ کے مرکزی چیئرمین سید طارق شاہ نے کہا ہے کہ حکومت نے
30اگست سے اسکولز کھولنے کا مطالبہ منظور کر لیا ہے۔
یہ بات انہوں نے صوبائی وزیر تعلیم سید سردار علی شاہ سے ملاقات کے بعد پریس کانفرنس کرتے ہوئے کہی۔ اس موقع پر کراچی سمیت سندھ بھر کی تعلیمی اداروں کی نمائندہ ایسو سی ایشنز کے عہدیداران بھی موجود تھے۔ سید طارق شاہ نے کہا کہ ہم پہلے سے حکومت کی جانب سے تمام احکامات اور ایس او پیز پر مکمل طور پر عملدرآمد کر رہے ہیں،جبکہ اسکولز کے تدریسی اور غیر تدریسی عملے کی بھی100فیصد نہ صرف ویکسین نیشن مکمل کرالی گئی ہے بلکہ طلباء اور اساتذہ اسکولز میں سماجی فاصلے کے ساتھ ماسک اور سینیٹائزر کا استعمال یقینی بنا رہے ہیں۔
سید طارق شاہ نے کہاکہ مجبوراََ آل پرائیویٹ اسکولز مینجمنٹ ایسو سی ایشن سندھ نے تعلیم بچاؤ تحریک کا اعلان کیا تھا جس کے تحت آؤٹ ڈور اسکولنگ کے ذریعے اسکولوں سے باہر گلی،محلوں،کھلے میدانوں اور پارکوں میں تعلیمی سلسلے کو جاری رکھنا تھا انہوں نے کہاکہ اس احتجاجی مظاہرے میں اسکولوں کے طلباء و طالبات،سندھ بھر کی تمام نجی تعلیمی اداروں کی نمائدہ ایسو سی ایشنز،اسکول سربراہان، والدین کے علاوہ اساتذہ نے بھی بھر پورحصہ لیا اور حکومت کو اپنے موقف سے آگاہ کرتے ہوئے مطالبہ کیا کہ صوبے بھر کے تمام نجی اسکولز فوری طور پر کھولے جائیں۔
سید طارق شاہ نے کہاکہ تقریباََ دو سال سے اسکولوں کی بندش کی وجہ سے 20فیصد سے زائد طلباء کا تعلیم کی طرف رجحان ختم ہو گیاتھا اور وہ پڑھنے کے بجائے چائلڈ لیبر بن گئے ہیں جبکہ پہلے ہی ملک میں شرح خواندگی انتہائی کم ہے اورڈھائی کروڑ سے زائد بچے اسکولوں سے باہر ہیں یہ بچے پاکستان کا مستقبل ہیں انہوں نے کہاکہ نجی اسکولوں میں پڑھنے والے بچوں نے وزیر اعلیٰ سندھ سید مراد علی شاہ اور وزیر تعلیم سید سردار علی شاہ سے اسکولز کھولنے کا فوری مطالبہ کیاتھاکیونکہ وہ پڑھنا چاہتے ہیں مگر اسکولوں کی مسلسل بند ش سے صوبے میں نہ صرف تعلیم تباہ ہو رہی تھی بلکہ بچوں کا تعلیمی مستقبل بھی تاریک ہو رہا تھا۔
سید طارق شاہ نے کہا کہ جب پورے ملک میں تعلیمی ادارے تما م تر احتیاطی تدابیر یعنی ایس او پیز کے تحت کھلے ہوئے ہیں تو پھر صرف صوبہ سندھ میں تعلیمی اداروں کو کیوں زبردستی بند کیا جا رہاتھاانہوں نے کہا کہ ہمیں بھی حکومت کی طرح اسکولز میں پڑھنے والے بچوں،اساتذہ اور دیگر عملے کی زندگیاں عزیز ہیں اس لئے ہم نے تدریسی اور غیر تدریسی عملے کی نہ صرف 100فیصد ویکسین نیشن کرائی ہے بلکہ حکومت کی جانب سے تمام ایس او پیز پر بھی سختی سے مکمل عمل بھی کیا جا رہا ہے۔
سید طارق شاہ نے کہاکہ کورونا وائر س کی وبا ء میں سب سے زیادہ نقصان تعلیم اورتعلیمی اداروں کو ہو ا ہے جسے پورا کرنے میں کئی سال لگیں گے سید طارق شاہ نے احتجاجی مظاہرے میں شرکت کرنے والے طلباء و طالبات اوران کے والدین،اساتذہ اورسندھ بھر کی تمام ایسو سی ایشنز کے نمائدوں کو مبارکباد دیتے ہوئے کہا کہ ان کے بھر پور تعاون اور شرکت سے احتجاجی مظاہرہ کامیاب ہو ا۔
