نگہت فرمان

غزہ کی وہ رات ساکت تھی لیکن فضا میں دکھ اور درد چیخ رہے تھے۔ایک چھوٹے سے خیمے میں ایک ماں اپنی بچی کے بال سنوار رہی تھی۔ اس کی

آنکھوں میں برسوں کا دکھ تھما ہوا تھا لیکن چہرے پر ایک عجیب سا سکون جو صرف وہی محسوس کر سکتے ہیں جنہوں نے سب کچھ لٹا کر بھی صبر کو گلے لگایا ہو۔

غزہ کی بوسیدہ مٹی پر قائم اس خیمے میں زندگی نہیں، سانسیں تھیں۔دیواریں نہ تھیں لیکن ماں کی آغوش ہی چھاؤں تھی۔دھماکوں کی گونج میں جب رات سوتی نہ تھی تو ماں اپنے دل کے زخم سلا کر لوری سنا کر ننھی فاطمہ کو سلاتی تھی۔ فاطمہ جو آخری پھول تھی اس کے باغ کا جو بھائیوں کی خوشبو لیے ہوئے ہر وقت اپنے بھائیوں کو یاد کرتی کہ باپ تو بہت پہلے ہی گمنام راہوں کا راہی بن کر جدا ہوچکا تھا اور اس کی شہادت کی خبر نے گھر میں ماتم نہیں بلکہ حوصلہ و ہمت دیا تھا کہ یہی ان کی تربیت اور ان کا معمول تھا۔

“امی، زید بھائی خواب میں آئے تھے،انہوں نے کہا ہم تمہیں یاد کرتے ہیں۔”

ماں مسکرائی۔۔ جیسےسورج غم کی بادلوں میں سے جھانک رہا ہو۔

ماں نےنرمی سےاس کےچہرے کو ہاتھوں میں لیا۔“زید، علی، اورحسان۔۔۔ تینوں جنت کےباغوں میں ہوں گے۔بیٹا۔ہم ان سےپھرملیں گے۔۔۔ وہاں جہاں بم نہیں گرتے،جہاں ماں کے دل نہیں چھلنی ہوتے۔جہاں بس سکون و امن ہوگا ۔

بیٹی، وہ تمہیں آسمان کے کنارے سے دیکھتے ہیں۔چاند کی اوٹ میں سےمسکراتے ہیں۔ ہم ایک دن اس نیلے در پردستک دیں گےاورسب اکٹھے ہو جائیں گے "۔

فاطمہ کے آنسو اس کے گالوں پر موتیوں کی طرح لڑھک رہے تھے اور ماں ان موتیوں کو اپنے دامن میں سمیٹ رہی تھی۔ وہ جانتی تھی،یہ آنسویادوں کا وضو ہیں۔ باہر سے ہر کچھ دیر بعد دھماکوں کی آوازیں آرہی تھیں جو  معمول بن چکی تھیں۔ جیسے جنگ کے شور میں زندگی نے ہار مان لی ہو۔

صبح کی سرخی ابھی افق کو چوم رہی تھی، ماں نے پیارسے فاطمہ کو تیار کیا۔فاطمہ، وہ ننھی کلی جو ہرصبح چمکتے چہرے کے ساتھ اسکول کومکتبِ خواب کہتی تھی۔

“امی، کل استانی جی نے کہا تھا امن صرف خواہش سےقائم نہیں ہوتا بلکہ جب کوئی ہماری زمین پر قبضہ کرلے،ہم پر ناجائز حکمرانی کرے تواسے ختم کرکے ہی امن قائم ہوتا ہے اور ایک دن ہم امن کے پرندے بنیں گے "۔

امی میں جب پرندہ بن جاؤں گی تو آسمان پر اڑتے ہوئے پنے بھائیوں کو آواز دوں گی!”

ماں مسکرائی لیکن دل جیسےکسی چپ چاپ نوحے میں ڈوبا ہوا تھا۔وہ سوچتے ہوئے کہہ نہیں سکی کہ “پرندے اونچا اڑتے ہیں، بیٹا… لیکن یہ زمین ان کے پر نوچ لیتی ہے۔”

فاطمہ نے اسکول بیگ کو سنوارا،جیسے وہ صرف کتابیں نہیں بلکہ یادوں کے سفینے لے جا رہی ہو۔

ماں نے اسے ماتھے پر بوسہ دیا اور دعائیہ کلمات کے ساتھ اللہ کے سپرد کردیا۔فاطمہ نے خیمہ سے باہر قدم نکالنے سے پہلے موڑ کر مسکرا کر ماں کو دیکھا ،اس کی نظروں سے ماں گھبراگئی جیسے روح روح کو الوداع کہہ رہی ہو ۔

اسکول کی گھنٹی بجی تھی، بچے نغمے پڑھ رہے تھے — "ہم زندہ رہیں گے، ہم سیکھیں گے!""ہم اقصی کے محافظ ہیں، دشمن کو زیر کردیں گے "۔

اور پھر…

آسمان نے کروٹ بدلی،جیسے قہر برسنے کو جھکا ہو۔

ایک لمحے میں چیخیں تھیں، دھواں تھا، اور پھر خاموشی

وہ مکتب، جو علم کا گہوارہ تھا، اب خون کا مقتل بن چکا تھا

فاطمہ

جس کے ہاتھ میں تختی تھی، جس پر محبت لکھنی تھی — وہ تختی اب خون سے لکھی گئی اور آخری حرف شاید "ماں" تھا۔

ماں دوڑی، جیسے روح بدن سے نکل کر دوڑ رہی ہو۔جب پہنچی، تو صرف ملبہ تھا اور کچھ ٹوٹی ہوئی گڑیاں، بکھرے بستے، جلی ہوئی کتابیں۔ایک سرخ ربن جو فاطمہ کی چوٹی میں تھا، وہ راکھ پر پڑا تھا۔ماں ساکت رہی، آنکھیں برسیں۔۔ پر ہونٹ بند۔

کیونکہ وہ چیخ نہیں سکتی تھی، وہ ان ماؤں میں سے تھی جنہوں نے اپنی آواز قبر میں دفنا دی ہوتی ہے۔اس نے ربن اٹھایا، سینے  سے لگایا ،چوما اور پھر آسمان کی طرف دیکھا،“ربِ کریم! ایک اور پھول تیرے باغ میں بھیجا۔۔۔  مجھے یقین ہے اپنے بھائیوں سے مل کر بہت خوش ہوئی ہوگی ۔”

لیکن اس کا غم اکیلی کا تو نہیں تھا۔اس دن کی دوپہر غزہ کی گلیوں میں صرف خون نہیں آہیں بھی بہتی تھیں۔کسی ماں کی انگلیاں اپنے بیٹے کے بستے میں الجھی تھیں، جیسے وہ اسے پھر سے اسکول بھیجنا چاہتی ہو۔کسی کی گود خالی تھی لیکن آنکھیں بچوں کے نام دہرا رہی تھیں، جیسے ان کے نام وظیفہ ہوں۔

وہ سب مائیں ایک جیسی تھیں

غم کی باجماعت اذان دے رہی تھیں

ان کی کوکھوں نے ایسے مجاہد پیدا کیے، جنہوں نے قلم بھی اٹھایا اور بموں کے مقابل بھی کھڑے ہو گئے۔ان ماؤں کے اپنے بچے چلے گئے تو کیا ۔کتنے ہی بچوں کے والدین نہیں ، چپہ چپہ ظلم کی ،یتیمی کی تصویر بنا ہوا ہے ۔جو مائیں اب تنہا تھیں ان میں وہ بھی تھی ۔اس نے ان بچوں میں سے ایک کو گود میں لیا، اس کے بال سنوارے، اس کے زخموں پر مرہم رکھا۔

"میرے بچے چلے گئے، لیکن تم سب میرے ہو۔"

 وہ ایک ماں نہیں قوم کی دھڑکن ہے۔اس کے آنسو بہتے نہیں وہ دعا بن چکے ہیں۔ وہ ان بچوں کو سبق پڑھاتی ہے شجاعت کا ،حمیت کا ،جنت کا یقین دلاتی ہے،وہ انھیں لوریاں بھی سناتی ہے اور گیت بھی گاتی ہے ،دشمنوں کا مقابلہ کرنے کا حوصلہ بھی دیتی ہے اور ان کے لیے دعا کرنے کا بھی کہتی ہے ۔اس کا ماننا ہے کہ اگر میرے بچوں کے قاتلوں کو بھی ایمان کی یقین کی اور علم کی روشنی مل جائے تووہ بھی جان جائیں گے ۔ مکتب جلا کر نہ دنیا ملتی ہے نا آخرت اور غزہ کی رات ہر شہید کے بعد چاہے وہ بچے کی ہو ،جوان کی  اور زیادہ روشن ہو جاتی ہےکیونکہ ہر مکتب، ہر بستہ، ہر تختی ،ہر ادارہ شہادت کا پرچم ہے اور انہیں شکست کون دے سکتا ہے، جنہیں زندگی نہیں موت پیاری لگتی ہو ۔