لطیف النساء
نامحرم کی محبت نیند کی طرح ہے۔اس لیے ایک انجیکشن کی طرح اثررکھتی ہے۔ شاید جس کا نشہ رفتہ رفتہ لوگوں میں اترتا ہے ۔ لگتا ہے کہ وہ نیند
پرقابوپالے گا مگر انسان مدہوش ہوجاتا ہے، مجبور ہوجاتا ہے، لاچار ہو جاتا ہےاور جب ہوش آتا ہے تو نہ دنیا سلامت رہتی ہے اور نہ دین۔
البتہ عمربھر کا پچھتاوا اورگناہوں کا ایک بوجھ رہ جاتا ہے اورمتاثرہ لوگ بے موت مر جاتے ہیں ۔شاید اسی لئے رب نے نگاہوں کی حفاظت کا حکم دیا ہے آج کل ہونے والے واہیات اور غیر معمولی واقعات ہمارے معاشرے کی بدحالی، بگاڑ اور دین سے دوری کی کھلی مثالیں ہیں۔ مرد تو مرد عورتوں نے بھی کہیں کا نہ چھوڑا ہوا ہے۔ مرد قوام ہوتے ہوئے اپنی قوامیت کو کھو کر نہ صرف خودذلیل و خوارہو رہے ہیں بلکہ اپنے معصوم بچوں بیویوں کے علاوہ متعلقہ خاندانوں کوتک ناکوں چنے چبوا رہے ہیں اور خود دنیا کے مزے لوٹ رہے ہیں کامیابیوں کے شاید جشن منارہے ہوں؟ معلوم نہیں کہ دنیا میں ملنے والا ایک فیصد سزا کا حصہ بھی سہہ نہ پائیں گے۔
رب کی ناقدری عذاب کے علاوہ کس کی دعوت دے سکتی ہے۔ معصوم بچے جنہیں ابھی بابا تک بولنا نہیں آتا ان کی ماؤں کو طلاق دیکر کتنی بہادری دکھاتے ہیں!تف اُن کی زندگی اور پرورش پر ان کی تربیت کرنے والوں پر جو انسانیت کو یوں قتل کرتے ہیں پھر بھی انہیں کوئی دکھ نہیں۔ آج کل معاشرے میں طلاقوں کی شرح کتنی بڑھتی جارہی ہے۔ وجوہات کچھ بھی ہوں ایک باشعور مسلمان اپنے ضمیر کی آواز کو نیکی اور بھلائی کی پکارکو دبادے تو سمجھو وہ منافق سے بھی بدتر ہے۔ ڈاکٹر صاحبہ جلی کڑی ہوئی تھیں کہ ان کی کزن اچھے بھلے لوگ دیکھ کر بیاہی گئی تھیں مگر نہ جانے کیا اس کے ساتھ سلوک کیا گیا کہ ڈیڑھ ماہ میں خلع لیکر آگئیں! اللہ اکبر!قتل بھی کیا خون بھی نہ نکلا! ایک واقعہ نہیں جگہ جگہ ایسا ہی سننے کو ملتا ہے۔ بارہ سالہ، 17سالہ، 20، 25سالہ شادی شدہ زندگیوں کو گزارکر بھی لمحے میں تم کون؟ ہم کون ہو جاتے ہیں نہ بچوں کا لحاظ، نہ خاندان کا بھرم، نہ اللہ کا خوف، نہ جواب دہی کا احساس، کیا ہو گیا ہے؟
کس قدر ایمان کمزور ہوگیا ہے؟ کہ نہ صبر ہےنہ شکر"ہم بے فکر" نہ روکنےوالےنہ ٹوکنےوالااس کی تو نوبت ہی نہ آئےمیں اورمیری مرضی تو کیسے بسیں گے گھر؟ ثالث کے لفظ سے ہی نا آشنا ہو گئے ہیں، ظاہر ہے خود سر جو اتنے ہوگئے ہیں کہ بڑوں کو بیچ میں ہی کیوں ڈالیں، جب بڑوں کی سنیں ہی نہیں مانیں ہی نہیں تو انکی چلے گی بھی کیسے؟ کس قدر ظلم ہے آج کل کی مہنگائی میں کانچ کا ایک پیالہ ٹوٹ جائے۔ گاڑی، سائیکل یا اسکوٹر کے پہیے سے ہوا نکل جائے تو ا فسوس ہوتا ہے کہ وقت بھی لگے گا، پیسے بھی محنت بھی توزندگی بھر کے رشتے پل میں توڑکر یہ خواتین و حضرات کیسے سکھی رہ سکتے ہیں؟ ا بھی پچھلے سال ایک لڑکی جو اپنےباپ کی چہیتی تھی نازوں کی پلی ہوئی شادی کے چند ہی ماہ بعد طلاق ہوگئی صرف دو بہنیں تھیں۔
دوسری بہن ڈر گئی اور شادی کیلئے تیار ہی نہیں ہوتی جبکہ باپ نےیہ غم دل پر لیا کہ پاگل ہوگیا کچھ یاد نہیں پورا گھرانہ، خاندان پریشان! کیسے ازالہ کریں؟ کسے مجرم ٹھہرائیں؟ کیسے سزا دلوائیں اور کیسے اس دکھی گھر کو سنبھالا دیں! ان دکھیوں کو بھی لوٹنے والے ہزار بیٹھے ہیں! آستین کے سانپ الگ ہیں، بس اے اللہ تو ہی کُن کہہ دے اور ان کو سکھ چین کی پر امن زندگی عطا فرمائے۔ آمین۔ ہم صرف مرد حضرات کو ہی مورد الزام نہیں ٹھہرا سکتے کچھ خواتین بھی اس میں برابر کی شریک ہیں اور کچھ پلڑے میں ان سے بھی دس گنا بھاری،انگلی پکڑنے کا موقع کیوں دیں؟ ایک محترمہ بتارہی تھیں کہ میمن برادری کی خوبصورت محترمہ تھیں اپنے شوہر سے کہا کہ مجھے بیوٹی پارلر کھول دیں۔ خوب کمائی کی بڑا پارلر چلایا۔ کسٹمرز کے مردوں سے بھی ملاقاتیں بڑھیں اور بڑھتی ہی چلی گئیں یہاں تک کہ خود دلہن بن کر اپنی جوان بیٹیوں کو چھوڑ کر کسی غیر مرد کے ساتھ بیاہ کر باہر روانہ ہو گئیں۔
اب بتائیں شوہر کیا کرے؟ دل تو شاید بڑھ کر پھٹ بھی گیا ہو؟عورت تو گھرکی رکھوالی، میاں کے حقوق ادا کرنے کے ساتھ ساتھ بچوں کی تعلیم و تربیت اور اس کی عزت ناموس کی محافظ ہونی چا ہئے۔ بچوں کو معاشرے کا مہذب اور فعال رکن بنانے میں مگن رہنا چاہئے وہ صبح سے شام، دن رات، سردی گرمی، میں سر دھڑ کی بازی لگا کر صبح سے شام تک کسی کے آرام اور آسائش کیلئے کما کر لاتا ہے؟ اور کس بھروسے پر بیوی کو ہر چیز کا اختیار دیتا ہے؟
کیا اس کا بدلہ اس کی مہربانیوں اورنخرے اٹھانے کی اسے ایسی سزا ملنی چاہئے؟اسی طرح ایک اور محترمہ کا سنا کہ وہ بڑی خوبصورت تھیں اور جوان بیٹیاں بھی تھیں کسی پوش علاقے میں گئیں۔ رہائش کے ساتھ نئے لوگوں سے واسطہ پڑا، ماڈرن ازم رنگ لایا تعریفیں شروع ہوئیں،نئے دوست نئے رنگ نہ جانے کیا دماغ میں فطور سمایا،میاں جی نے بزنس ٹرپ کیلئے باہر جھانکا، مہینہ دو مہینہ اُن محترمہ نے جو اتفاق سے اکلوتی تھیں اپنے باپ سے جو خود بھی بڑے بزنس مین تھے اپنا حصہ مانگا، باپ نے کہا بھی کہ جو کچھ ہے تمہیں ہی ملے گا مگر میرے بعد مگر ان کو نہ سمجھ آئی، محترمہ نے رودھو کر باپ سے جائیداد کا ایک بڑا حصہ بٹورا اور عمرہ کا کہہ کر کسی دوست یعنی بوائے فرینڈ کے ساتھ ایسی گئیں کہ واپس ہی نہ آئیں جبکہ باپ کی آنکھیں اس دن سے چھت سے لگی ہیں بیٹیاں الگ شرمندہ اور شوہر صاحب منہ چھپاتے پھر رہے ہیں۔
یہ زیادہ ڈھیل کا نتیجہ نکلا۔ یہی حال گھر گھر میڈیا کی ماری، دین سےدوری، گھروں میں کام کرنےوالی ماسیاں، سیلز گرلزاور دیگر فیشن پرست لڑکیوں کا ہے جنھیں نہ ماں باپ کی پرواہ ہے، نہ رشتے ناتوں کا لحاظ، بس وہ ہیں ان کا موبائل ہے اورنوکری ہے وہ اتنا مصروف ہیں کہ اُن کی دنیا ہی الگ ہے، بالکل اسی طرح کچھ حضرات ہیں انہیں کچھ نہیں معلوم کہ ان کے گھر کیسے چل رہے ہیں، بچے کہاں جارہے ہیں، کیا پڑھ رہے ہیں بلکہ بعض کو تو یہ تک نہیں معلوم کہ کونسا بچہ کیا پڑھ رہا ہے کہاں کیا کام کر رہا ہے؟وہ صرف انکی رکھوالی کھلانے پلانے تک محدود کئے ہوئے ہیں،اسی میں کھپے ہوئے ہیں کہ ان کا بس پیٹ بھر جائے!بس ہم سب مسلمان ہیں مگر شعوری نہیں اسی لئے بلا ضرورت کی چیزیں رکھتے ہیں بلا مقصد اس خوبصورت زندگی کو تباہ کررہے ہیں نہیں سمجھتے کہ اس زندگی کا مقصد کتنا عظیم ہے؟ اور اللہ کی یہ مخلوق انسان کتنا معتبر ہے اس کا حق مارنا اسے تنگ کرنا کتنا بڑا جرم ہے؟ اپنے اند رایمان جگائیں، خدا خوفی پیدا کریں ضمیر کو مردہ مت کریں۔ ایک کُن کہنے سے رب آپکے حالات یکسر بدل دے گا۔ اس مختصر زندگی میں دوسروں کیلئے ہمیشہ نفع بخش بننے کی کوشش کریں۔ کوئی وجہ نہیں کہ قدر دان رب آپکو دونوں جہاں میں کامیاب کر دیگا۔ اس سوچ کے ساتھ جئیں کہ ایک دن بچھڑجانا ہے مرجاناہے توہم رشتوں کی قدر ایسے کریں کہ ہمارے جانے کے بعد احتساب نہ ہو اور اگرہم جانے لگیں تو ہمیں پچھتاوا نہ ہو۔ خود کو اللہ کیلئے اس کے راستے میں تھکا دیں، جو زندگی وقت کے ساتھ ختم ہو جائیگی اور وقت بھی گزر ہی جائے گا ہمارے پاس کیا بچے گا؟ پچھتا وا!!تو ایسی زندگی کا کیا فائدہ جو دوسروں کیلئے تکلیف کا باعث ہو؟ آپ دیکھتے نہیں ٹوٹے ہوئے لوگ کتنے با ہمت،صابر، با ظرف، نرم دل ہوتے ہیں۔ پر سکون وہ اس لئے ہو جاتے ہیں کہ انہوں نے سب کچھ کھوکر بھی اللہ کو پا لیا ہوتا ہے۔ رب سے جڑے لوگوں کے ساتھ رہ کر وہ بس ایک کُن کا انتظار کر رہے ہوتے ہیں جو انہیں برباد کردے گا!!
مگر ایسے ہی مرد یا عورتیں اپنے جائز حقوق ادا نہ کر کے دوسروں کے گھربھی برباد کرتے ہیں اور خود اپنے گھروں اور اپنی ہی اولادوں تک کو قیمہ بنانے والی مشین میں پیس دیتے ہیں جن کیلئے وہ معاشرے کے گھناؤنے مجرم ہوتے ہیں اور جو کبھی بھی کہیں بھی فلاح نہیں پا سکتے دنیا کی رسوائی اور آخرت میں جہنم ہی انکا ٹھکانہ ہے۔
