لطیف النسا
ہمارا ملک سال کے نو دس مہینے گرمیوں کی زد میں ہوتا ہے۔ صرف دسمبر جنوری یا فروری میں سرد موسم ہوتا ہے۔ وہ بھی مسلسل نہیں کبھی زیادہ سرد کبھی کم اورکبھی
حیرت انگیز طور پرگرم۔دن میں تو لگتا ہی نہیں کہ سردیاں ہیں مگر شام کے بعدراتیں کافی یخ(ٹھنڈی) ہوجاتی ہیں ،اسی طرح صبحیں بھی قدرے ٹھنڈی رہتی ہیں۔سردیوں کی چھٹیاں ہفتہ بھر یا دس دن کی ہوتی ہیں اور پھر جنوری سےاسکول کھل جاتے ہیں لیکن سردیوں میں موسم اتنا ہوتا ہے کہ ذراسی بے احتیاطی بھاری پڑجاتی ہے۔ اسکولوں کے بچے اساتذہ والدین اور معمر حضرات سب ہی اس کا شکا ر ہوتے ہیں اور ایک دم ہوتے ہیں لہٰذا احتیاط ضروری ہے ۔ ایسے میں والدین اور اساتذہ سے میری التماس ہے کہ اپنے بچوں کا خصوصی خیال رکھیں۔ بچے بچے ہیں ان کی مرضی پرانہیں کبھی نہ چھوڑیں ۔ سردیوں میں اپنی ذمہ داری بھرپور طور پرنبھائیں۔انہیں اچھا ناشتہ کروا کر، کریم لگا کرجوتے موزے،سوئیٹر، ٹوپی اوراگر زیادہ سردی ہوتو دستانےتک پہناکراسکول بھیجیں ،اپنی سی پوری کوشش کریں۔بچوں کو رات جلد سلوائیں اورصبح سویرے خود اٹھ کران کے کام کروائیں۔ نماز تلاوت کے بعد دیگر تمام کاموں کو مل جل کرکرنے کی عادت ڈالوائیں اور انہیں دُعاؤں کے ساتھ گھر سے رخصت کریں ۔ اس طرح باپ بھائیوں اورشوہروں کو بھی کہ یہ ہمارا مستقبل ہیں اورہماری ذمہ داری!اسی طرح اساتذہ کی بھی بڑی بھاری ذمہ داری بنتی ہے اورہاں کئی والدین کی شکایت میں نے پڑھی تھی شکایت نہیں۔ گزارش تھی کہ پرائیوٹ اسکولز کے مالکان اور معزز پر نسپل اور اساتذہ کرام اپنے اسکول اسٹاف کو یہ ہدایت کر دیں کہ اگر کوئی بچہ، یا بچی آؤٹ آف پیٹرن جیکٹ یاشوزپہن کر اسکول آجائے تونہ جرمانہ عائدکریں، نہ سزا دیں کیونکہ شدید سردی اورمہنگائی نے والدین سے نئی جیکٹ اور شوز وغیرہ کی خریداری کی طاقت کھینچ لی ہے۔
بات درست تو ہے مگر اساتذہ سے پہلے والدین کو حکمت عملی سے کام لینا ہوگا! انہیں بچوں کو اندرسےسوئیٹروغیرہ پہنانا ہوگا۔ اسی طرح شوز بھی سنبھالنے ہوں گے۔اس کے علاوہ بھائی چارے کو فروغ دیں، اسکول کے اساتذہ بھی بچوں کو سمجھائیں یہ سب آپس میں بھائی بھائی ہیں۔ ایک دوسرے کے چھوٹے بڑے سوئیٹرز اور شوز اگلی کلاس میں جاکر کتابوں کی طرح قابل استعمال ہو سکتے ہیں۔
ہمارے گورنمنٹ اسکولوں میں تو اسی طرح ہوتا تھا دو مہینوں کی سردیوں کیلئے بعض دفعہ واقعی جوتے وغیرہ کا انتظام کرنا مشکل ہو جاتا ہے بڑھتی عمر کے بچوں میں آئے دن یہ مسائل جنم لیتے رہتے ہیں اگر سمجھداری سے اپنی سلیم فطرت کو برقرار رکھا جائے اور ایک دوسرے کا لحاظ کیا جائے تو پریشانیاں کم محبتیں زیادہ اور ماحول پر سکون اور خوش گوار ہو سکتا ہے اور آئندہ زندگی میں بچوں کو مخلص اور معاون رہنے کا درس ملتا ہے۔ اخلاق سنورتے ہیں جذبہ نیک ہو تو پھر تو خوشی کا ایک حسین رنگ ہی آکر اگلوں پر چھا جاتا ہے نیکی کا رنگ، محبت کا رنگ،نیکی اور غیر سگالی کا رنگ۔ ہر مصیبت اور مشکل میں اپنے ساتھیوں کی مدد کر نا ہم سب پر فرض ہے الحمد للہ ہم مسلمان ہیں اور ہم فطری طور پر سلیم فطرت لئے ہوئے ہیں۔ انہیں برقراررہنے دو، ان سے منہ موڑنا۔ فطرت کے خلاف چلناہمارا شیوہ نہیں ہونا چاہئے، مانا کہ منظم رہنے کیلئے بعض دفعہ زیادہ سختیاں برداشت کرنی پڑتی ہیں مگر کتنی سردی ہو، کیسے ہی نا مناسب حالات ہوں! ہمیں ہی انسانیت کے دائرے میں رہتے ہوئے ایسے کام کرنا ہے کہ بچوں یا والدین کی عزت نفس بھی متاثر نہ ہو، کسی کو کوئی بیماری نہ ہوا ور نہ دینے والوں میں اکڑاور غرورہو، نہ ہی بے جا سختیاں اور تلخیاں پیدا کر کے نفرتوں کے بیج بوئیں۔ بلکہ خوشی خوشی انکی صحت کو مقدم جان کر سخت ترین موسم میں بھی ایک دوسرے کیلئے معاون و مددگار بن جائیں کیونکہ تعلیم کا تو مقصد ہی مہذب اور مخلص، فرض شناس شہری بنانا ہے۔ اساتذہ روحانی والدین ہوتے ہیں۔ ان میں پیار، محبت،نرمی، عاجزی اور انکساری ہو نی چاہئے کہ بچے خوشی خوشی اسکول آئیں اور خوشی خوشی کام کریں۔ جب تک والدین بچوں کے سب سے قریبی دوست بن کر انکے کاموں کو آسان نہیں بنائیں گے، ان میں اسکول جانے کی لگن پیدانہیں ہوگی، اسی طرح اساتذہ بچوں سے عزت و احترام سے پیارو محبت سے ان کے مسائل کو حل نہیں کرینگے ان کی انمول محبت سے محروم رہیں گے اور بجائے اسکول سے جڑے رہنے کے، اسکول سے دُور بھاگیں گے۔ اس طرح ان کا دل بھی تعلیم پر کم لگے گا۔ اسٹیٹس کے چکر میں اپنی ہی اخلاقیات بگاڑ بیٹھیں گے جو ہمیں کبھی گوارا نہ ہوگا۔ پرائیوٹ اسکولز والوں کو کبھی بھی بقول ہمارے سسر کے حرفیت نہیں دِکھانی چاہئے۔
مطلب دیکھا دیکھی شو مارنا یا اپنے آپ کو بلند معیار،خواہ مخواہ دِکھانا!وقت تو گزرہی جاتا ہے مگر اپنےکرتوت خوش نما یا بد نما ایسےبچوں کے ذہنوں پر چھوڑ جاتا ہے جسکی تلافی تو ناممکن ہو جاتی ہے۔ یہ مستقبل کے معمار والدین اپنی نسلیں اپنے ان روحانی والدین کے سپرد بڑے اعتماد سے کرتے ہیں تو ان اساتذہ کو بھی اپنے کردار سے ان کے دلوں کو جیتنا اور دنیا میں نامور بنانا ہے،معاشرے کے کار آمد اور مفید معزز شہری بنانا ہے گویا کہ نسلوں کی سدھار کی ذمہ داری انکے مستقبل کا بنیادی اخلاقی ڈھانچہ ایسا مضبوط اور منظم بنانا ہے جس سے ایک معزز معاشرہ جنم لے اور جو دنیا کے چیلنجوں کا مقابلہ علمی اور عملی میدان میں سلیم فطرت کے مطابق کریں اور معاشرے کو پر سکون رکھیں، انکی صحت، انکی قابلیت اور اہلیت کو دینِ اسلام کے اصولوں پرہموار کر کے متوازان فضا قائم کریں۔اونچ نیچ سے بالا تر ہو کر تعلیم صحیح معنوں میں معلم بن کر دیں۔ جیسے ہمیں علم ہے کہ پیارے نبیؐ اخلاق کے بلند ترین مقام پر تھے بقول آپؐ کہ میں معلم الاخلاق بنا کر بھیجا گیا ہوں! تو مبارک ہیں وہ اساتذہ جنہیں یہ نوکری نہیں منصب عطا کیا گیا ہے۔ نسلوں کی تعمیر کا!معاشرے کے سدھار کا!والدین کو اور صاحبِ حیثیت افراد کو چاہے وہ کوئی بھی ہوں مستقبل کے ان معماروں کی بھر پور مددکرنی چاہئے۔
کسی بھی سلسلے میں ہو!چراغ سے چراغ جلتا ہے۔قطرہ قطرہ دریا بنتا ہے،کر بھلا ہو بھلا!یہ سب جملےمعنی رکھتے ہیں!کہنے کے نہیں بلکہ سہنے کے ہیں۔ وقت پر ہی کیا گیا کام نفع دیتا ہے۔احساس کے رشتے عظیم ہوتے ہیں۔ اللہ تو ہے ہی قدر دان یقین جانئے کتنے حالات خراب ہیں۔ گھروں میں گیس نہیں، بجلی نہیں تو کہیں پانی نہیں، مہنگائی کے ماروں کے پاس آٹا نہیں، پیسے نہیں وسائل نہیں! مسائل ہی مسائل! انھیں مزید نہ بڑھائیں جتنا ممکن ہو تعاون کریں! نیکی اور بھلائی ہی رنگ لاتی ہے۔
وقت جب بدلتا ہے تو آدمی کی اوقات بتا دیتا ہے۔ اچھے وقت کی قدر کیجئے اور شکر کیجئے اور مزید اچھے کیلئے محبت خلوص سے نیک نیتی کے ساتھ محنت کیجئے کہ محنت میں ہی عظمت ہے۔ مایوسی کفر ہے۔ میانہ روی اپنا ئیے بقول امی کے بانٹ کھاؤ ایمان پاؤ آج سمجھ آتا ہے کہ برکت اسے کہتے ہیں۔ ذراسی چشم پوشی ذرا سا تحمل ذراسی برداشت بڑے کام کر جاتی ہے بس ہمارے لوگ صحت مند ایمان والے ہوں محنتی اور فرض شناس ہوں تو سمجھیں ہم سلیم فطرت لئے ہوئے ہیں ورنہ تو ہم انسان کہلانے کے بھی مستحق نہیں۔
