لطیف النساء

کراچی کی بارشیں انوکھی ہوتی ہیں کبھی پیشن گوئی صحیح نہیں ہوتی اور کبھی کبھار ہوجاتی ہے۔4فروری کی شادی کا انتظارتھا۔

موسم کافی تپش اورحبس والا تھا لگتاتھاکہ بارش ہوگی مگر پورادن گزر گیا۔

تین فروری کی رات اچانک تیز بارش ہوئی اورگھنٹے بھر میں سارا شہر افراتفری کا شکارہو گیا۔ کئی ہالوں میں کافی نقصان ہوا لوگ وقت پر نہ پہنچ سکے۔ کسی جناح ہال میں تو گھٹنوں گھٹنوں پانی کی وجہ سےتقریب بری طرح متاثر ہوئی۔ ہم بھی دُعا مانگتے رہے،اللہ سب پر رحم فرما اوررحمت والی بارش برسا۔ خیر اللہ اللہ کرکے بارش رکی مگر ساتھ ہی بجلی بھی غائب! شکر اللہ کاموسم زیادہ گرم نہ تھابلکہ خوش گوار ہوگیا تھارات گزر گئی۔ پورا دن بھی بجلی غائب رہی۔ ہمیں شادی میں وہ بھی دوپہرمیں جانا تھا خاصا دورمگر کیا دیکھتے ہیں کہ گیارہ بجےسے پھرتیز بارش شروع ہوگئی اور ذر اسی دیر میں ندی نالے بہہ نکلے،جانے کی تیاری پکڑی ہی تھی کہ اب گھنٹے کا سفر دو گھنٹےمیں ہوگا۔

 کپڑے بھی استری نہیں ہوئےتھے مگرشکر اللہ کا موبائل کام کر گیا، پیغام موصول ہوا کہ ابھی کوئی بھی باہرنہ نکلے کیونکہ جہاں شادی تھی وہاں اور بھی تیز بارش ہورہی ہے۔ ذرا کچھ کم ہو تو دوسرا پیغام دیا جائےگا۔ ہوسکتا ہے کہ یہ تقریب اب تاخیرسے یا رات میں ہی ہو! مگر سب نے بہت دعا کی۔ سبحان اللہ!اللہ کی شان! ساڑھے گیارہ بجے بارش کم ہوتے ہوتےرک گئی اور ایک گھنٹے بعد دوسرا گروپ پیغام ملا کہ اب یہ تقریب جو ڈیڑھ بجے ہونے والی تھی چاربجے ہوگی۔  کافی پانی بیٹھ چکا ہے۔آپ سب چار بجے تشریف لائیں۔ اتنے میں تقریباً ڈھائی بجےبجلی بھی آگئی اور ہم جلدی سے استری کر کے تیارہوکرتین سوا تین بچے شادی کی تقریب میں شرکت کیلئے نکلے، ڈرتے ڈرتے کہ اللہ خیر کرے کہیں زیادہ پریشانی کسی کو نہ ہو۔

الحمد للہ ہمیں خود ہی گاڑی کی آفرمل گئی اور ہم ان مہربان قدردان کے ساتھ دو گاڑیوں میں نکلے اورراستے بھرشکر ادا کرتے رہے،راستہ صاف اور کھلا ملا۔ ٹریفک بھی کم، دکانیں بھی بند، وقت پر پہنچ گئے بس کہیں کہیں پانی اور گڑھوں سے ڈرتے بچتے بچاتے شادی ہال پہنچے۔

سب رشتہ دار استقبالیے کیلئے تیار کھڑے تھے۔مختلف علاقوں اورممالک کے بچھڑے رشتہ دارملے ایک الگ خوشی تھی۔شادی کی خوشی سہانا موسم اوررشتہ داروں عزیزوں کی ملاقات برسوں بعد ملنا ایک الگ خوشی کا تاثر تھا۔ اللہ سب کی خوشیاں سلامت رکھے اورسب کو خوشیوں میں ملائے۔آمین۔ ماشاء اللہ سے بہت ہی سادہ پُروقار تقریب رہی ، نہ کوئی ڈھول باجا، نہ ڈرون مووی، نہ گانا اورمیوزک تھا۔ اس لئے بھی اوراچھالگا۔خوشیوں میں ساتھیوں سےملنا ملانا اوراپنےہی چھوٹے بڑوں کو تیاردیکھنا ایک الگ خوشی کا احساس ہوتا ہےاورسچ کہوں تووقت کےگزرنےکا احساس بھی ہوتا ۔

کتنے جلدی وقت گزرجاتا ہے۔بچے بڑے ہوتےدیر ہی نہیں لگتی۔ لگتا ہے ابھی ننھی پری تھی آج شادی!ماشا ء اللہ اتنی بڑی ہوگئی! ارے تمہارا بیٹا اتنا بڑا ہو گیا؟  سبحان اللہ اس کی شادی ہو رہی ہے؟ سبحان اللہ! گھر سے ہلکا سا کھا کر گئے تھے پانچ سوا پانچ بچے عصر کی نماز کے بعد کھاناہوا۔بہت اچھا کھانا تھا گرم اور پرتکلف ما شاء اللہ! اللہ برکت عطا فرمائے۔ آمین۔ مگر ساری باتوں کی ایک بات کہ انسان کو ہمیشہ مثبت سو چنا چاہیے اور اچھی توقعات رکھنی چاہئیں۔میرے پاس اکثر کے فون آئے ہم نہیں آسکیں گے؟میں نے کہا صبر کریں،کوشش کریں دعا کریں سب ٹھیک ہوجائے گا۔انشاء اللہ ضرورجائیں گے۔جب بارش ہورہی تھی لگتاہی نہیں تھا کہ جاسکیں گےمگر ایک گھنٹے میں منظر یوں بدل جائے گا یہ اللہ ہی کی شان ہےمگر مجھے اتنی خوشی ہوئی سب کو میں نے کہا آنا ہے ۔ ضرور اللہ مدد کرے گا۔  شادی کی تقریب ہے ان کی پہلی شادی ہے اور بھائی کے بیٹے کی شادی ہے وہ بھی اکلوتا! انشاء اللہ کو شش کریں سب جائیں گے اور یقین جانیے اتنی دور پہنچ کر اتنا اچھا لگا سب آئے،مزہ آیا۔

کھانے سے فارغ ہوکر مغرب کی نماز پڑھتےہی سب نے نکلنےکی کی۔دلہن کافی تھکی ہوئی لگی مگرسب لوگ ہشا ش بشاش سب کام ہوگیا ۔ ہم بھی مغرب کے بعد وہاں سے نکلےاورعشاء پرگھرپہنچ گئے۔جیسا سوچا تھا ویسا بالکل نہیں ہوا سب ٹھیک ٹھاک ہوا جس کی توقع اوردعا کی تھی اللہ کی اس مہربانی پر اللہ کا جتنا شکر ادا کیا جائے کم ہے۔

وہاں جس چیزکی مجھے کمی محسوسی ہوئی وہ میرے بزرگ رشتہ دار تھے جو ایک ایک کرکے گزرگئے۔ ایسے مواقع پر بہت ہی زیادہ یاد آتے ہیں،نگا ہیں ڈھونڈتی ہیں۔ اللہ پاک مرحومین کی بہترین مغفرت فرمائے اور ہم سب کو ان کیلئے صدقہ جاریہ بنائے۔ آمین۔

علاوہ ازیں وہ بہو،بیٹے، بیٹیاں،بہنیں اوربچے جو دور رہتے ہیں نہیں آسکے۔سب ہی بہت یاد آتےہیں۔یقیناً وہ بھی بہت یاد کرتے ہوں گے مگر کیا کیا جائے؟ یہی زندگی کا حسن ہے ۔ اللہ سب کو سلامت رکھے سکھ چین میں رکھے۔  صحت تندرستی اور ایمان کی بہترین حالتوں میں رکھیں اور انہیں بھی یہ خوشیاں مبارک فرمائے اورخوش باش رکھے۔آمین۔

برسات میں یہ شادی اورمیرے بھائی کی سمجھداری سےاللہ کی مہربانی نے سب کام آسان کر دیا۔ ہرحال میں رب کا شکرہےجس نے خوشیاں عطا فرمائیں اورہمیں بھی اپنی ذمہ داریوں کا احساس اورعمر کے گزرنے کے مراحل یاد دلا کراپنے مستقبل کیلئےمزید اچھا کرنے، اللہ سے جڑنے اور اس کی رضا کیلئے اچھے کام، عبادات اور شکر گزاری کا احساس جگایا۔ اللہ تعالیٰ ہمیں اپنی رضا کے کام لینے والا بنا دے اور ہم سے راضی رہے۔ آمین یارب العالمین