لطیف النساء
واقعی کتنی صحیح بات ہے!ہمارا اور آپکا اور ہماری ساری زندگی کی کہانیاں بنانےوالا مصنف اللہ تعالی ہی تو ہے۔ بھلااس سے اچھا مصنف کوئی ہوہی نہیں سکتا! زندگی یوں
بھی امتحان ہے اور الحمدللہ ہم سب مسلمان ہیں۔ وہ توہر دم ہماری سُنتا ہے اور توکل کے ساتھ جھولی پھیلانے اوریقین رکھنے والوں کیلئے وہ کیسے کیسےمعجرے دکھاتا ہے؟ ظاہر ہے وہ خالق اپنی مخلوق سے کیسے بے خبرہو سکتا ہے؟ باقی ایمان والے ہی تو آزمائے جاتے ہیں۔ آپ نے سنا ہےنا:۔
کہ قدم قدم پہ وہی آز مائے جاتے ہیں
کہ زندگی کے نشاں جن میں پائے جاتے ہیں
آج کی مہنگائی میں لوگ زیادہ پریشان اورمایوس نظر آتے ہیں۔ ہروقت مایوس اورڈپریشن کا شکاررہتےہیں اورمطمئن نہیں ہوتے کیوں؟ وقت کا کام تو گزرنا ہے مگر ہم بھی تو اپنا پورا کام کریں اور ہر لمحہ اپنی آخرت کو پیش نظر رکھیں! واقعی شادی کرنا، بچے پیدا کرنا، پالنا پوسنا، بڑا کرنا یہ تو مسلم غیر مسلم کیا جانورتک کرہی لیتے ہیں۔ پرندے بھی انجام دے لیتے ہیں! مگر سو چیں مسلمان ماں باپ کی کتنی بڑی ذمہ داری! یہ ذمہ داری دیگر مخلوق سے مختلف اور منفرد ہے کیسے؟
مسلمان والدین کی حقیقی ذمہ داری در اصل اپنی اولاد کو دین کی تربیت دینا اسلام والاما حول فراہم کرنا ہےتا کہ اپنےبعد آنے والی نسلوں کو ایمان والی نسلیں بنا کررکھیں یعنی اپنے بعد ایمان والی نسلیں چھوڑجائیں جو ہمارے لیے صدقہ جاریہ ہوں کیونکہ روزِ قیامت ایک اہم اور بڑاسوال ہم سے ہماری اولاد کے متعلق بھی پوچھا جائے گا! تو ہم کیا جواب دیں گے؟
ہمیں اپنے رب کو ہمیشہ منانا ہے۔ راضی رکھناہے کیونکہ" رب راضی تو سب راضی " ہمیں اپنےبیٹوں بیٹیوں سب کیلئےنمونہ بننا ہے اور پھر ان کےلئے دعائیں کرنا ہیں کہ اے رب کریم انہیں حفظ وامان میں رکھ، انہیں ہدایت عطا فرما، ان کے نصیب اچھے بنا، انہیں متقیوں کا امام بنا، انہیں پہلے اپنا اورہمارا بھی فرمانبردار بنا تاکہ یہ ہماری اور ہماری نسلوں تک کیلئے صدقہ جاریہ ہوں۔ اس طرح اللہ پاک ہمیں قلبی اور دائمی سکون عطا فرمائے۔ آمین۔ اس کیلئے ہمیں خود پہلے ہدایت مانگنا ہے،رو رو کر توفیق مانگنا ہے کیونکہ رب کی ناراضی توسجدوں کی تو فیق چھین لیتی ہے۔
اللہ نہ کرے؟ ہم ایسے تو نہیں!اللہ ہدایت دے توفیق دے فرض نماز یں ادا کر والے، ہمیں اپنا بنا لے، تہجد میں ہمیں بیدار کراورہمیں تہجد میں کھڑا ہو کررورو کرتوبہ کرتے گناہوں کو معاف کرنے کی اہلیت دے، ہم سے راضی ہو جا۔ اگرہم نے توفیق حاصل کرلی تو وہ ضرورہم سب کو ایسے سجدوں کی توفیق دے گا کہ ہماری تمام حاجات اوردعاؤں کو قبول ومقبول فرمالے گا۔بس طلب، تڑپ اور سچی لگن درکار ہے۔ نیکیوں کامو سم بہار ہے،اللہ کا احسان ہے کہ ہمیں ر مضان نصیب فرمارہاہے۔
سبحان اللہ! گویا ہمیں اپنا ہی کردار سنوارنا ہے،اپنے سے ہی یہ کہنا ہے سہنا ہے کہ:
کسی کو زخم مت دینا
خراشیں زندہ رہتی ہیں
زباں سے وار مت کرنا
صدائیں زندہ رہتی ہیں
بس ایک کردار ہے
جو حشر میں جلوے دکھائے گا
مثالی بن کے رہنا ہے
مثالیں زندہ رہتی ہیں
