لطیف النساء

عموما اکتوبر نومبر سے ہی خنکی کبھی کم کبھی زیادہ ہونے لگتی ہے اوراگست کےمہینے کی بارشیں بڑی ہی سہانی لگتی ہیں ،اس احساس کے ساتھ کہ

اب سردیاں شروع ہونے والی ہیں۔ ہم عموماً اپنے ایسے کپڑے ریشمی اسٹائل کےجن میں گرمی بھی نہ لگتی ہو اورزیادہ استری بھی نہ کرنی پڑے ان مہینوں میں بڑے شوق سے پہنتے تھے۔ ویسے بھی طویل گرمی وہ بھی شدید گرمی کے مارے، سردیوں کی ہلکی جھلک کو بھی بڑی اچھی طرح انجوائے کرتے ہیں لیکن اس مرتبہ گرمیاں کچھ زیادہ ہی ٹک گئی ہیں خاص کر دوپہر میں تو لگتا ہے جون جولائی کا مہینہ ہی چل رہا ہو ۔۔۔ پھر سورج کے غروب ہونے کے بعد ذرا سی تبدیلی رونما ہوتی ہے۔

شکر کا احساس! اس لیے شام آتے ہی سکون محسوس ہونے لگتا ہے مگر پھر بھی پنکھے کی ضرورت ہوتی ہے کیونکہ کھلی جگہوں کا فقدان ہوتا جا رہا ہےجگہ جگہ محلے دومحلے نہیں ملٹی  

اسٹوریز بلڈنگ نے سارا ماحول پیک کر کے رکھ دیا ہے۔گھروں میں بھی روشنی مطلب قدرتی روشنی کا اتنا اچھا انتظام ہی نہیں۔ بجلی کے اپنے نخرے ہیں ہرچند گھنٹوں بعد شور مچتا ہے "بجلی آگئی "گویا کےگرمی اور اندھیرے سے ترسے لوگ عموماً بچے شورمچا جاتے ہیں جبکہ بڑے کاموں کو کرنے کے لیے تیاررکھتے ہیں کہ جی شکر اللہ کا بجلی آگئی ہے۔

ایسےمیں بیچارا پنکھا ہروقت خطرے میں ہوتا ہے کوئی کہتا ہے بند کرو،اب اس کی ضرورت نہیں،کوئی کہتی ہےمیرا دم گھٹ رہا ہے۔ اسے کھولے رکھو۔  ایسے میں سب کوہی سردیوں کا انتظار رہتا ہے۔میں نے تو ڈیڑھ مہینہ پہلے ہی سردی میں پہننے والے کپڑے نکال لیے تھے،مفلرز اور ہلکے پھلکے سوئیٹرز بھی ۔  گرمی کے کپڑے تھیلا بنا کر الگ رکھ چھوڑے تھے مگر بار بار اسے ہی کھول کرسارے کپڑے استعمال کر لیے جبکہ الماری میں زبردستی کا گھسا گرم کپڑوں کا حصہ منہ چڑاتا ہی رہا۔

میری دوست کہنےلگی اگلے مہینے اتنی شادیاں ہیں ،یہ ویلویٹ کا سوٹ، یہ مرینا کا سوٹ سب ہی کام آجائیں گے۔ بڑی خوش تھی نئی گرم شالیں دیکھ کرجو کئی سال پرانی تھیں مگر دل کو نئی معلوم ہو رہی تھی مگر مہینہ بھی گزر گیا ۔ گرمی کی وجہ سے کچھ پہننے کو جی نہ کیا، سردی کا انتظار ہی رہا۔کہنے لگی فکر نہ کرو ایک دم سے آئیں گی پتا لگے گا؟ مجھے توسردیاں بہت ہی اچھی لگتی ہیں،موزے، ٹوپی،جیکٹ،کوٹ، سو ئیٹر، شالیں اورمرغن کھانے، چائے،  کافی واہ کیا مزے ہیں! واقعی سردیاں توسردیاں ہیں۔

 پرسوں ایک رشتہ دار رات ملنے آئے اورگرم گرم مونگ پھلیاں لائے۔ انٹرنیٹ سروس بند تھی ،ہم نے بہت مزے سے فل پنکھے میں مونگ پھلیاں کھائیں۔لگتا ہی نہیں تھا کہ ذرا بھی سردی ہےمگر مونگ پھلی وہ بھی گرم۔۔۔ اس مونگ پھلی نےسردیوں کے احساس کو خوش گوار بنا دیا۔ امی کہتی تھیں بس بیٹا یہ زندگی ہے۔ کبھی موقع نہیں،کبھی نظارہ نہیں مطلب سردیاں نہیں تھیں تو گرم مونگ پھلیاں لطف دے رہی ہیں اور کبھی شدید سردی میں مونگ پھلی والے دور دور تک نظر بھی نہیں آتے۔ آج کل لوگ گھروں میں چائنیز ڈشز بنانے کے لیے،سوپ بنانے کے لیے،سردیوں کا مزہ دوبالا کرنے کے لیے اشیاء اکٹھا کر رہے ہیں۔ اب تومرغی، انڈے،گوشت اورمچھلی کو پر بلکہ بڑے بڑے پر لگنے والے ہیں کیونکہ سردیاں آنے والی ہیں۔ پائے تو ہائے ہائے کہنے والے ہیں؟ کرونا کے بعد دنیا بھر میں مہنگائی کی وبا نےسر اٹھایا ہے مگر پاکستان میں مہنگائی کے سرکو بجلی کے کھمبے پر لگا دیا ہے۔ اس کو کہتے ہیں ٹو ان ون! اللہ کی پنا ہ!اللہ ہمارے حال پر رحم فرمائے اور گیس بجلی کی خیر رہے۔

گیس کا شیڈول پچھلا ہی اتنا خطرناک تھا کہ صبح چھ بجے سےپہلے گیس نہ آئے تو 2 سے 5 بجے شام پھر چلی جائے!رات بھر گیس نہ ہو سردیوں میں کتنی مشکل  ہوتی ہے ،بیمار بچے بڑے سب ہی یکساں مصیبت میں گرفتار!نہ کچھ گرم بنا کر پلا سکتے ہیں،نہ ٹکور کرنے کو،غرارے کرنے کو گرم پانی دیا جا سکتا ہے، بچوں کو بھی ٹھنڈے ٹھارپانی میں صفائی کر کے محلے والوں کو مزید جگایا جاتا ہے۔ اللہ نہ کرے اب کی سردیاں ایسی ہوں؟مجھے سردیاں یوں پسند ہیں کہ پہن اوڑھ کر رہو، اچھی طرح جسم ڈھانپ کرسو، اس کا مزہ ہی اور ہے گرمی میں کیا کتنا کوئی ہلکا پہنےگا ۔مرد بچے بیچارے مختصر ترین پاجامے، جانگیے میں بھی پنکھا تکتے رہتے ہیں اوپر سے بجلی والے مزید جلتی پر تیل کا کام کرتے ہیں۔ بہرحال شکر ہے دسمبر آگیا ہے ۔ اب تو ضرور سردیاں آئیں گی۔ خوشی کے احساس سے میں نے موبائل کھولا ہی تھا کہ ایک موسمی ا طلاع ملی کہ انہوں نے بتایا کہ کراچی والے 15 دسمبر تک سردیوں کا انتظار کریں۔ اب سردیاں بھی لیٹ ہیں۔ اللہ تعالی رحمتوں والی سردیاں بھیجے اورگیس بجلی والوں کو نیک ہدایت دے کہ ہماری ان مختصر سردیوں کو روگ نہ لگائیں اور دیگر کاروباری حضرات قیمتوں کوکم کریں اور فطری ماحول کو خوشگواری سے گزروائیں۔ڈرائی فروٹ والے خوشیار خبردار! اگر سردیوں میں کوئی دو چلغوزے بھی خریدے تو ڈبل تھیلی میں دینا،نقصان نہ کرنا۔ یاد رکھیں "کربھلا ہو بھلا "منع ہرگز نہ کرنا کیونکہ ہو سکتا ہے وہ اپنے بچوں کو چلغوزے متعارف کروانے کیلئے خرید رہاہو۔