بنت خلیل
بابا مجھے کیک لا کر دیں اور ایک پیزہ بھی
احمد شام سے بابا سےضد کررہا تھا کہ رات کو پارٹی کریں گے لیکن وہ مسلسل اسےٹالےجارہے تھے۔
بیٹا ابھی دو دن پہلے ہی تو آپ سب کو ریسٹورنٹ سے کھانا کھلوا کر آیا ہوں۔
انہوں نے چشمہ لگا کر اخبار کھولتے ہوئے جواب دیالیکن بابا آج فادرز ڈے ہے تو میرے سب دوست فادرز ڈے مناتے ہیں ہم بھی پارٹی کرتے ہیں ناں ۔
اس نے منہ بسورتے ہوئے کہا۔
لیکن بیٹا فادرز کا صرف ایک دن تو نہیں ہوتا ناں آپ سمجھو ہم نے پرسوں فادرز ڈے منا لیا ۔
بابا مسکرا کر بولے
تو احمد کو غصہ آنے لگا
یہ کیا بات ہوئی ۔۔۔ ؟
آپ کو مجھ سے بالکل پیار نہیں ہے میرے دوستوں کے پاپا ان کی ساری باتیں مانتےہیں۔
کافی تکرار کرنے کے باوجود جب احمد کی بات نہ مانی گئ تو وہ منہ بناکر کمرے میں چلاگیا
بات یہ نہیں تھی کہ عمیر صاحب احمد سے پیار نہیں کرتےتھےدراصل وہ ایک مڈل کلاس گھرانے سے تعلق رکھتے تھے اور معمولی سی تنخواہ میں ہر فرمائش پوری کرنا ان کے بس میں نہ تھا احمد کو منع کرکے وہ خود بھی دکھی ہوگئے تھے جبھی آمنہ بیگم کو کہا کہ گھر پہ ہی اس کی پسند کا کچھ بنالیں تاکہ اس کا موڈ اچھا ہوجائے۔
جب ماما نے کھانے کے لیے بلایا تو احمد نے ناراضگی کا اظہار کرتے ہوئے کھانے سے منع کر دیا ۔
احمد کیا ہوا ہے بیٹے؟
ماما نے سولہ سالہ احمد کو چمکارکرپوچھا
ماما بابا کو میرا بالکل خیال نہیں وہ میری کوئی بات نہیں مانتے۔
نہیں بیٹا ایسا نہیں کہتے بابا آپ سے کتنا پیار کرتے ہیں ہر بات تو مانتے ہیں۔
وہ پوری بات جانتی تھیں اب اسے منانے آئی تھیں
جی نہیں ماما اگر پیار کرتے تو مجھے منع نہیں کرتے۔ وہ احمد کی تربیت کے بہترین موقع کو گنوانا کسی صورت گوارا نہیں کر سکتیں اسی لیے بولیں۔
ماما : بیٹا پتا ہے
آپ کے بابا کی سیلری کتنی ہے؟
احمد: 40 ہزار
ماما : جی تو بیٹاآپ کی میتھس اچھی ہےناں۔آج آپ حساب لگائیں سارے اخراجات کا اس میں میں بھی آپ کی مدد کروں گی ۔
ماما اس کا فادرز ڈے سے کیا تعلق ہے؟
وہ حیران تھا۔
گہرا تعلق ہے آپ پہلے بناؤ تو سہی۔۔ احمد اوراس کی ماما جی جب اخراجات کا رف سا سکیچ بنا چکے تو ماما احمد کو سمجھانے لگیں کہ تنخواہ کس طرح پوری ہوتی ہے اور بیٹا اگر ہم اسراف سے کام لیں گے تو آپ کی فیس بھی نہیں ادا کر پائیں گے اور پھر آپ کی کتابیں ، سٹیشنری اور باقی سارے اخراجات کیسے پورے ہوں گے۔۔۔؟
اس بار احمد جناب اپنی ماما کو حیرانی سے دیکھ رہے تھے اور پھراحمد فادرزکا کوئی ایک دن کیسے ہو سکتا ہےجب کہ وہ تو روز اولاد کے لیے محنت کرتے ہیں ۔۔۔
احمد اننکی باتیں غور سے سن رہا تھا۔ بیٹا کبھی سوچا ہے جب ہم ٹھنڈے کمرے میں آرام سے سو رہے ہوتے ہیں تو آپ کے بابا گرمی میں کام کر رہے ہوتے ہیں ۔۔۔
بیٹا فادرز ڈے بس کیک کاٹنے کا نام نہیں ہے ۔۔۔ اگر آپ اپنے بابا سے پیارکرتے ہیں تو ہر روز کریں ان کو احساس دلائیں کہ وہ کتنے اچھے بابا ثابت ہوئے ہیں اور عمل سے ثابت کریں کہ آپ ان سے کتنی محبت کرتے ہیں ۔۔۔
اپنے بابا کو تنگ کرنا ان سے ان کی حیثیت سےبڑھ کر مطالبات کرنا یہ کیسا فادرز ڈے ہوا ؟اب وہ کافی شرمندہ نظر آنے لگا اور دل ہی دل میں اپنے رویے پر پچھتا رہا تھا۔۔۔
اب وہ سمجھ چکا تھا کہ وہ اپنے ماما بابا کو خوش کر کے اس جنت میں اپنے لیے گھر کیسے بنا سکتا ہے جہاں اس کی تمام تر خواہشات پوری ہوں گی ان شاءاللہ
