محمودہ تفسیر

حضور صلی الله علیہ و سلم منبر پر قدم رکھتے جاتے تھے۔ اور آمین کہتے جاتے تھے۔ یہاں تک کہ تین بار آمین کہا۔ اور بیٹھ گئے۔ یہ ایک غیر

معمولی واقعہ تھا کیونکہ مسجد نبوی میں داخل ہونے کے بعد نبی صلی الله علیہ و سلم اکثر و بیشتر صحابہ کے سامنے منبر پر تشریف فرما ہوتے۔ ایمان و عقائد کی درستگی اور دنیا و آخرت میں کامیابی و کامرانی کی باتیں کرتے مگر ایسے تو کبھی نہ ہوا کہ منبر پر چڑھتے ہوئے آمین کہہ رہے ہوں۔ جب آپ صلی الله علیہ و سلم بیٹھ گئے۔ تو صحابہ کرام بڑی محبت سے پوچھنے لگے

یا نبی الله صلی اللہ علیہ و سلم ہمارے ماں باپ آپ پر قربان آج یہ غیر معمولی عمل ہمیں حیرت میں ڈالے دیتا ہے جسے سن کر نبی صلی الله علیہ و سلم نے فرمایا کہ جبریل تشریف لائے تھے اور تین اشخاص کے لیے بد دعا کر رہے تھے کہ تباہ ہو جائے وہ شخص جس کے سامنے آپ صلی الله علیہ و سلم کا نام لیا جائے اور وہ آپ پر درود نہ بھیجے۔ جسے سن کر میں نے آمین کہا۔ حضرت جبرائیل بولے تباہ ہو جائے وہ شخص جس کی زندگی میں اس کے والدین حیات ہوں اور وہ ان کی عدم خدمت اور نافرمانی کی  بدولت جنت سے محروم ہو جائے۔ میں نے کہا آمین پھر بولے تباہ ہو جائے وہ شخص جس کی زندگی میں رمضان کا مہینہ آئے اور وہ اپنی بخشش نہ کرائے۔

رحمت اللعالمین کی اس بات سے پتہ چلتا ہے کہ ماہ رمضان کی اہمیت و فضیلت اور تقدس ناقابل بیان حد تک عظمت کا حامل ہے۔ تمام اہل ایمان کو مبارک ہو کہ نیکیوں کا یہ موسم بہار اپنی تمام تر رعنائیوں کے ساتھ ایک بار پھر جلوہ افروز ہونے کو ہے۔ الله کے گرانقدر انعامات میں سے ایک بڑا انعام یعنی رمضان سے ہم مستفید ہونے جا رہے ہیں۔ الله ہم پر ایک بار پھر اپنی رحمت و برکت کی خصوصی بارش برسانے والا ہے۔ ماہ رمضان میں نزول قرآن ہوا تو الله نے اس کے تمام دنوں کے روزے فرض کر دیے۔ تاکہ اہل ایمان تقویٰ کی معراج کو پالیں۔واضح طور پر ماہ رمضان کا مقصد انسانوں میں مومنانہ صفات پیدا کرنا ہے۔ یعنی الله کی بندگی کرنا، سچ بولنا، صبر کرنا، عاجزی، اطاعت گزاری کرنا، خیرات کرنا، اپنے ستر کی حفاظت کرنا اور الله کا کثرت سے ذکر کرنا۔ خواہ روزہ دار مرد ہو یا عورت میرے الله نے اس کیلئے مغفرت اور اجر عظیم کا وعدہ کر رکھا ہے۔(الاحزاب 33_35)

روزہ خالص ہو کر الله کی عبادت کرنےکا نام ہے۔ یہ بےریا عبادت ہے۔روزہ بندے اورمالک کے براہ راست تعلق کا نام ہے۔ چنانچہ نبی پاک صلی الله علیہ وسلم نے فرمایا

بندے پر الله کا حق ہے کہ وہ خالص ہو کر اس کی عبادت بجا لائے اور الله پر بندوں کا حق ہے کہ وہ اسے عذاب نہ دے۔ الله روزہ دار سے خوش ہو کر فرمائے گا

 الصوم لي و انا اجزى بة

روزہ خالص میرے لیے ہے اور میں ہی اسکی جزا دوں گا۔

ایک روایت یوں بھی ہے کہ رمضان میں مومن کا رزق بڑھا دیا جاتا ہے۔ روزہ گناہوں کو جلا دیتا ہے۔روزہ ڈھال ہے۔ رمضان مبارک میں اجر بڑھا دیا جاتا ہے یعنی ایک نفل کا ثواب فرض کے برابر اور ایک فرض کا ثواب ستر فرضوں کی ادائیگی کے برابر ہے۔ رمضان مبارک کی پہلی رات ہی سے سرکش شیاطین کو جکڑ دیا جاتا ہے۔ دوزخ کے دروازے بند کر دیئے جاتے ہیں اور جنت کے دروازے کھول دیئے جاتے ہیں۔ ایک پکارنے والا پکارتا ہے اے طالب خیر! آگے بڑھو اور اے طالب شر! رک جاؤ ۔ الله بندوں کو جہنم سے آزاد کر دیتا ہے اور پھر یہ معاملہ ہر رات جاری رہتا ہے۔

ہر سال یہ مہینہ مومنین کی ایمانی تجدید اور اخلاقیات کی تربیت اور مشق کروانے کیلئے سایہ فگن ہوتا ہے۔ مگر ہم اس متبرک مہینے کے مقاصد کو نظر انداز کر دیتے ہیں۔ ایک ماہ کی تربیت لے کر پھر دوبارہ اپنی پرانی ڈگر پر چل پڑتے ہیں۔ اگر تربیت کے اثرات قبول نہ کیے جا سکیں گے تو ایک ماہ تک بھوکا پیاسا رہنے رات کو اٹھ اٹھ کر عبادت کرنے ایثار و ہمدردی کے نت نئے انداز دکھانے اور انفاق فی سبیل الله کرنے کا کیا فائدہ ؟ ہمارا رویہ تو اس ورزش کی مشین یا سائیکل کے مماثل ہوا جسے کمرے

میں رکھ کر ہم اس پر دوڑتے ہیں اور زمین پر کھڑی سائیکل کا ہینڈل پکڑ کر چلاتے ہیں اس طرح ہماری ورزش تو ہو جاتی ہے۔ مگر ہم کمرے کی حدود سے باہر نہیں نکل پاتے حالانکہ مشین کا میٹر تو چار پانچ کلومیٹر کا فاصلہ دکھا رہا ہوتا ہے اسی طرح ہم بھی تقویٰ کی مشق تو ایک ماہ کرتے ہیں۔ مگر شوال کا چاند دیکھتے ہی ہم تمام تربیت کو بھول کر پرانی روش پر چل پرتے ہیں۔

آئیں ذراسوچیں کیا اس مرتبہ بھی ہم اس روایت پر عمل پیرا ہو کر خود کو دھوکہ دیتے ہوئے تمام پابندیاں قبول کریں گے یا پھر شعور کی گہرائیوں کے ساتھ رمضان المبارک کے اصل مقاصد کو اپنی زندگی میں رچا بسا لیں گے کہ اگلے  گیارہ ماہ تک اس کے اثرات نمایاں رہیں۔ پھر اگر کچھ سستی یا کمی آنے لگے تو ایک ماہ کی تربیت کےساتھ اس کی پھر تجدید کر کے نئے عزم کے ساتھ شاہراہ زندگی پر کامیابی کے ساتھ اپنا سفر جاری و ساری رکھیں گے۔ ان شاء الله۔

مُشکلیں اُمّتِ مرحُوم کی آساں کر دے

مُورِ بے مایہ کو ہمدوشِ سلیماں کر دے

جنسِ نایابِ محبّت کو پھر ارزاں کر دے

ہند کے دَیر نشینوں کو مسلماں کر دے