نیرنگِ خیال/عریشہ اقبال
نہ تجھے خبر نہ مجھے خبر
جو ہے رب کے پردہ راز میں
محبت کا اظہار اور اس سے جڑے احساسات اپنے اندرایک الگ سی انفرادیت رکھتے ہیں اوراس انفرادیت کا تعلق براہ راست چاہت سےہوتا ہے، جب بھی
اس دل میں کسی محبت کا احساس پنپتا ہےتواس میں موجود دھڑکن چاہت سےاپنا تعلق جوڑتی ہے اور یہ چاہت ہی احساس کی شکل اختیارکرکےاس محبت سے وابستگی کومزید گہرا کر دیتی ہے میرے نزدیک محبت اسی لیےاس قدر منفرد جذبہ ہے کیونکہ اس جذبے سے زیادہ کشش کسی جذبے میں نہیں اوراس کے اظہار سے زیادہ تاثیر کسی اظہارمیں نہیں ،لہذا سمجھنے کی بات محض یہ ہےکہ محبت میں موجود انفرادیت کو سمجھنے کے لیے چاہت کے مفہوم کو سمجھ لینا بہت اہم ہے۔ میں سمجھتی ہوں زندگی میں جب بھی آپ کو کسی کی چاہت کا رنگ اپنی جانب کھینچتا ہےتو وہ لمحہ آپ کی اور میری زندگی میں دو طرح کی حیثیت رکھتا ہے۔ ایک قسم تواس دل میں موجود چاہت کے رنگ سے متعلق جانچنے کی ہے کہ آیا وہ رنگ کس حد تک پختہ ہےاگر تو وہ رنگ پختہ نہ ہوا تو آپ کی چاہت کو خوبصورت بنانے کا کام انجام نہیں دے سکتا اور اس میں انفرادیت اور تاثیر کا عنصر اسی حد تک کم ہوگا اور دوسری قسم اس دل سے دھڑکن تک کے سفر میں چاہت کی طلب کو سمجھنے کا معاملہ ہے کہ آیا اگر تو میں اور آپ اپنی زندگی میں کسی محبت سے خود کو جوڑ لینے کے بعد اپنے دل میں اس محبت کو محسوس کرتے ہیں اور وہ محبت اس حد تک گہری ہوجاتی ہے کہ آپ کے اور میرے قلب میں وہ چاہت کی شکل اختیار کرلیتی ہے تو پھر ہم اس موڑ پر آتے ہیں جہاں ہمیں اس منفرد احساس کو سمجھنے کا موقع ملتا ہے ،جس کی انفرادیت اور تاثیر کو سمجھنا ہر انسان کے بس کی بات نہیں کیونکہ یہی تو وہ راز ہے جس سے واقفیت حاصل کرنے کے بعد راز محبت کا پردہ اٹھتا ہے اور پھر ہجر کی رات ہو یا طلوعِ سحر کا منظر میری اور آپ کی نگاہیں و دل کی ہر دھڑکن محض اسی رازمحبت کی تلاش میں سرگرداں رہتی ہیں ۔
اس درجے پر فائز ہونا ہی میری اورآپ کی آرزو بن جاتا ہے کہ نصیب اورمقدر میں لکھا جانےوالا ہرلفظ اس مفہوم کی عکاسی کرتا ہوا محسوس ہوتا ہے کہ کسی سے اگر محبت ہوجائے تو یہ نہ سوچیں کہ اس کا حاصل ممکن ہے یا نہیں بلکہ اس کو اتنا چاہیں کہ وہ آپ کے نصیب کا حصہ بن جائے اور چاہے جانے کا مفہوم ہی دار آخرت کی فکر ہے اور یہی تو اصل چاہت ہے کہ میں اور آپ اپنے سے وابستہ محبتوں کو رضاۓ الہیٰ کے حصول کی خاطر لگادیں ۔
ہماری نگاہوں کا مرکز اورہمارے دل کی ہردھڑکن سے لےکر اس دل میں پنپتے ہراحساس کا اظہارمجھےاورآپ کواس خوبصورت نصیب اورمقدرکی دعائیں کرنے والا بنادے گا اور یہ یقین ہماری ہرکوشش کے ساتھ ہربڑھتے قدم کو مضبوطی عطا کررہا ہو کہ میں جب اپنی محبت کو رب کےلیے خالص کرکے چلنا چاہتا ہوں یا چاہتی ہوں تو پھر مجھے اس چاہت کی انفرادیت اور اس کی تاثیر اپنےقلب و نظر میں واضح طور پر محسوس ہوگی اور جانتے ہیں اس چاہت کا اظہار انتہائی پرکشش انداز میں میری زندگی کو پاکیزگی اور میرے عمل صالح کے نتیجے میں برائیوں سے بچنے کی شکل میں سامنے آئے گا۔ان شا ء اللّٰہ
اللّٰہ تعالیٰ سےدعا ہے کہ وہ ہم سب کی محبتوں کواصل چاہت کےرنگ میں ڈھال دے اور وہ محبتیں ہمارے اصل نصیب یعنی دائمی ساتھ کی شکل میں جہاں ملنےکے بعد بچھڑ جانے کا کوئی خوف نہیں ہوگا،انتہائی خوبصورت منزل کےساتھ ہماری منتظرہوں ۔آمین یا رب العالمین
