مسرت جبیں / لاہور
اللہ وطن عزیز کی حفاظت فرمائے۔افواج پاکستان کے بہادر سپوت،ماؤں کے لخت جگر،شریک سفر کےسہاگ، بہنوں کے مان اور معصوم پھول بچوں کے
باپ محاذ پرسلامت رہیں ۔استقامت ،صبر، حوصلوں ،جرات، ہمت اورفرض شناسی سے رب کریم کی رضامندی کے سائےہمیشہ ان پہ سایہ فگن رہیں ۔پاکستان کی جغرافیائی سرحدوں پہ فرشتوں کے لشکر پل پل محافظ ہوں ۔اہل وطن کی محب وطن عوام کا اللّہ نگہبان ہو ۔
ارض پاک تو سلامت رہے تا قیامت رہے ۔تیری عسکری قوت قوت ربانی سےمزید مستحکم ہو ۔تیرے ایوانوں کی خیرہو۔ تیرےکھیت کھلیان پھلے پھولیں ۔تیرے پہاڑوں کی ہیبت دشمن کو زیر کرے ۔تیرے صحراؤں میں بہاروں کی برکھا برسے۔تیرے جوانوں کی پرواز اوج ثریا تک جائے ۔ مانند شاہین فضاؤں کو مسخر کریں ۔ تیرے بزرگوں کا وقار بلند ہو ۔ان کی پاکیزگی تقویٰ ، طاقت اور دعائیں نسلوں کا پرتو ہوں ۔ تیری ماؤں کی آغوش میں تیرے غازی تیرے شہید پروان چڑھیں ۔
دعاؤں سے تھرتھراتےماؤں کےہونٹوں پہ قبولیت بھری دعائیں جاری وساری رہیں۔مائیں ہیں تودعائیں ہیں۔بچوں کی امید افزا مسکراہٹیں ہمیشہ مسکراتی رہیں ۔
اے وطن تو ہمیشہ سربلند رہے ۔تیرا پرچم کبھی سر نگوں نہ ہو ۔تیری دھرتی ان جری فرزندوں کو جنم دے جن ہاتھوں نے پوری دنیا میں اسلام کا پرچم لہرانا ہو ۔
خدا کرے کہ مری ارض پاک پر اترے
وہ فصل گل جسے اندیشہ زوال نہ ہو
یہاں جو پھول کھلے وہ کِھلا رہے برسوں
یہاں خزاں کو گزرنے کی بھی مجال نہ ہو
اللہ کرے دشمن کو تیری طرف میلی آنکھ بھی کرنے کی مجال نہ ہو اور تیری شکست کا کسی کو خیال نہ ہو۔اللہ کی رحمتیں شامل حال ہوں ۔تو ہے تو ہم ہیں ۔اے وطن تو ہمیشہ سلامت رہے ۔تجھ سے آباد ہے دنیا ہمارے ارمانوں کی ۔
پاکستان زندہ باد
تیرے محافظ زندہ باد
آمین ثم آمین
