ساٸرہ امین
سورج غروب ہونے کو بے تاب تھا اور پرندے اپنے گھونسلوں میں جانے کو پر تول رہے
تھے ۔۔۔۔۔۔۔۔۔ شہر کے وسط میں بنا گاؤں اور اس گاؤں کے لوگ اپنے کاموں میں مصروف تھے ۔۔۔۔۔۔۔
گاؤں کا چھوٹا سا اور خوبصورت گھر جس کو چاروں اطراف سے پھولوں اور چھوٹے چھوٹے پودوں سے سجایا گیا تھا اپنی مثال آپ بیان کر رہا تھا ۔۔۔۔۔۔۔۔
اس گھر کی چھت پر شاہ زین بیٹھا آسمان کو اپنی آنکھوں کی زینت میں لیے ہوئے تھا ۔ آنکھوں میں بلا کی پریشانی لئے نجانے آسمان پر کیا تلاش کر رہا تھا ۔
شاہ زین بیٹے کیا ہوا جو ایسے بیٹھے ہو ۔۔۔۔۔۔ نانا جان کی آواز سن کر شاہ زین مسکرایا اور بولا ،
کچھ نہیں نانا جان ۔۔۔۔۔۔۔ اچھا تو کیا بات ہے جو اتنے پریشان لگ رہے ہو ۔۔۔۔۔۔۔۔
شاہ زین: کچھ نہیں نانا جان بس سر نے ایک اسائنمنٹ دیا ہے اس لیے تھوڑا پریشان ہوں ۔
نانا جان: ایسا کون سی اسائنمنٹ ہے جس نے تم جیسے ہونہار شاگرد کو پریشان کر دیا ہے ۔
شاہ زین: نانا جان سر نے سقوط ڈھاکہ کے بارے میں اسائنمنٹ دیا ہے جس کے بارے میں مجھے کچھ علم نہیں ہے ۔
نانا جان: یہ تو بہت افسوس کی بات ہے تم اتنے اہم واقعے کے بارے میں نہیں جانتے ۔
شاہ زین: آپ اتنے سنجیدہ کیوں ہو گئے نانا جان آپ کو معلوم ہے تو مجھے بتا دیں تاکہ میرے علم میں کچھ اضافہ ہی ہو جائے ۔
نانا جان: سقوط ڈھاکہ ایک المناک واقعہ ہے بیٹا ، جس نے پاکستان کو دو حصوں میں تقسیم کر دیا ۔
شاہ زین: کیا یہ پاکستان سے جڑا واقعہ ہے نانا جان؟
نانا جان: جی بیٹا ، 16 دسمبر 1971 کو مشرقی پاکستان بنگلہ دیش کے نام سے ایک نئے ملک کے طور پر معرضِ وجود میں آیا ۔
شاہ زین: کیا مطلب نانا جان ، کیا واقعی میں بنگلہ دیش پاکستان کا مشرقی حصہ تھا ، تو یہ دو حصوں میں تقسیم کیوں ہوا ؟
نانا جان: اس واقعے کے پس پشت کچھ عوامل کار فرما ہیں بیٹا ۔۔۔۔۔۔۔۔اس میں بھارت کی سازشیں اور ہماری داخلی کمزوریاں شامل ہیں ۔
بھارت نے پاکستان کو توڑنے کے لئے خفیہ ایجنسی کو ٹاسک دیا ۔ انہوں نے مکتی باہنی کو مالی ، مسلح اور ہدایتی تعاون فراہم کیا تاکہ مشرقی میں افراتفری پھیلائی جا سکے ۔عوامی لیگ اور بھارت نے آپریشن سرچ لائٹ کو علیحدگی پسند منصوبے کے طور پر استعمال کیا۔ شیخ مجیب نے اپنے حامیوں کو ملک کے وسائل لوٹنے اور انفراسٹرکچر تباہ کرنے پر اکسایا ۔
شاہ زین: نانا جان اس تحریک میں کن شخصیات نے اپنا کردار ادا کیا ؟
نانا جان: شیخ مجیب الرحمٰان بنگلہ دیش کی آزادی کی تحریک کے رہنما تھے ۔ 1970 کے انتخابات میں ان کو اکثریت ملی ۔ بھارتی وزیراعظم اندرا گاندھی نے مشرقی پاکستان کی علیحدگی میں اہم کردار ادا کیا ۔اس وقت کی مغربی پاکستان کی حکومت بھی اس افسوس ناک حادثہ کی ذمہ دار تھی ۔
شاہ زین: نانا جان سقوط ڈھاکہ کے نتائج کیا نکلے ؟
نانا جان: اس کے نتائج بیٹا ،
مشرقی پاکستان بنگلہ دیش کے نام سے ایک نئے ملک کے طور پر معرض وجود میں آیا ۔
پاکستان دولخت ہوگیا ۔
لاکھوں لوگ بے گھر ہوئے اور ہزاروں شہید ہوئے ۔
شاہ زین : شکریہ نانا جان آپ نے مجھے اتنا کچھ سمجھایا جس کے بارے میں مجھے کچھ علم نہیں تھا ۔اب میں بہت اچھے سے اسائنمنٹ بنا سکوں گا ۔
نانا جان شاہ زین کو دیکھ کر مسکراتے ہوئے آذان سننے لگے جس کی آوازیں چاروں اطراف پھیل رہی تھی ۔۔
