کراچی (ویب ڈیسک)سندھ حکومت نے حالیہ بارشوں اور اس سے پیدا ہونے والی صورتحال کے باعث کراچی کو اب آفت زدہ قراردے دیا
ہے،اس سلسلے میں کراچی کے چار اضلاع کو آفت زدہ قرار دینے کے بعد اس کا نوٹیفکیشن جاری کردیا گیا ہے۔
ریلیف کمشنر سندھ کی جانب سے جاری نوٹیفکیشن میں شہر قائد کے چھ اضلا ع شرقی،غربی،وسطی،جنوبی،ملیر اور ضلع کورنگی کو آفت زدہ قرار دیا گیاہے۔ادھر ریلیف کمشنر نے سندھ کے چارڈویژنز کے بیس اضلا ع کو بھی آفت زدہ قرار دینے کا نوٹیفکیشن جاری کر دیا ہے،جن میں حیدرآباد،نواب شاہ،میرپور خاص ٹھٹھہ،مٹیاری،ٹنڈو الہ یار،عمرکوٹ،سانگھڑ،دادواورتھر پارکر بھی شامل ہیں،محکمہ ریلیف نے ان اضلا ع کے ڈپٹی کمشنرز کو بارشوں سے ہونے والے نقصانات کا تخمینہ لگا کر رپورٹ پیش کرنے کی ہدایت جاری کی ہے۔
کراچی اور سندھ بھر میں ریکارڈ حالیہ بارشوں سے شہریوں کو ابتر صورتحال کا سامنا ہے،بڑے پیمانے پر لوگ نہ صرف نکل مکانی پر مجبور ہوئے ہیں بلکہ کھانے پینے،پانی سمیت دیگر مسائل کا بھی سامنا ہے۔پاک فوج،رینجر اس سلسلے میں بھرپور کام کررہی ہے،جبکہ الخدمت سمیت دیگر کئی این جی اوز بھی لوگوں کی بھر پور مدد کر رہی ہیں۔
